Yisinke azi uyunga ko Bibeli kuhamena ukaume?
Eyi za uyunga ko Bibeli
Vakaume kuvhura va tu vatere tu kare noruhafo ntani yi tu tompoke meparu. Vakaume wovawa kulivatera va kare vantu wovawa.—Yisewe 27:17.
Nye Bibeli kututantera tu horowore nawa vakaume. Azo kututantera yitundwamo yokukara novakaume wovadona. (Yisewe 13:20; 1 Vakolinte 15:33) Vakaume wovadona kuvhura kuninkisa muntu a ture po matokoro gomadona ndi kuvhura kuzonagura yikara yendi yoyiwa.
Eyi ya hamene mosirongwa esi
Yisinke ayi ninkisa muntu a kare kaume gomuwa?
Bibeli kuronga asi ukaume wounene kapi tupu wa korera pokuhara yininke yokulifana. Pasihonena, Episarome 119:63 kutanta asi: “Ame mukwawo zava navenye ava kua kerere ava navenye ava limburukwa konoveta doge.” Mutjangi govelise ozo kwa tente asi age kukara ndi kutulisa po ukaume novantu ava ava karere Karunga ntani ava va tokomena kuparuka kuliza nonompango daKarunga.
Bibeli za tumbura hena yikara eyi ga hepa kukara nayo kaume gomuwa. Pasihonena:
“Vantu namukwawo kulihara. Ano vantu namumbyendi wovagara nani kapisi kwa karera po, va likwafe moudigu?”—Yisewe 17:17.
“Ukwawo umwe kapi au karerere, nye vakweni vamwe kuvahuguvara unene, kupitakana vamumbya woge wovagara.”—Yisewe 18:24.
Novelise edi kuturonga asi kaume gomuwa mulimburukwi, ga kara neharo, nonkenda ntani ugavi. Kaume gomuwa kuvhura a tu vatere apa atu kara nomaudigu. Kaume gousili kutupukurura ndi kututantera apa a dimburura asi kuna kutura po etokoro lyedona.—Yisewe 27:6, 9.
Yihonena yovantu womoBibeli ava va kere vakaume wovawa?
MoBibeli kwa kara mo yihonena yovantu wonomvhura, nontundiliro, nonompo dokulisiga ntani nava va kere noyitumbukira yoyinene ava va kere vakaume wovawa. Tara yihonena yitatu.
Rutu ntani Naomi. Rutu kwa kere ngumweyi zaNaomi, awo kwa li sigire unene monomvhura. Ntani mpo zaRutu za lisigire ne zi zaNaomi. Nye nampili ngomu va kere nomalisigo ogo, awo kwa tu lisire po ukaume wounene.—Rutu 1:16.
Ndafita naJonatana. Nampili ngomu Jonatana naNdafita va li sigilire ponomvhura 30, Bibeli kutanta asi “mpepo zaJonatana . . . tazi gwanekere nezi zaNdafita.”—1 Samwere 18:1.
Jesus ntani vapositoli vendi. Jesus kwa kere mupangeli kovapositoli vendi morwa age kwa kere murongi gwawo. (Johanesa 13:13) Nye age kapi ga va mwene asi kapi ta vhuru kutulisa po ukaume nawo. Jesus kwa kere nelikwatakano lyenene nava ngava kwama marongo gendi. Age kwa tente asi: “Ame kumutumbura asi vakwetu, yeeyi na mu tantera nayinye eyi na zuvha koTate.”—Johanesa 15:14, 15.
Muntu kuvhura a kare kaume kaKarunga ndi?
Nhi, vantu kuvhura va kare vakaume vaKarunga. Bibeli kuuyunga asi: “Vahungami ta va tura mougami wendi.” (Yisewe 3:32) Kutanta asi Karunga kutura po ukaume novantu ava ava hetekere ko kurugana yoyiwa, ava ava tanta usili ntani ava va kara nefumadeko ntani ava vana tokomene kuparuka kuliza nonompango dendi douhunga. Pasihonena, mugara gomulimburukwi Abirahamu kwa mu tumbura momatjangwa asi kaume kaKarunga.—2 Histoli 20:7; Jesaya 41:8; Jakopo 2:23.
a Kuliza noyikaramo yemEpisarome eli kulikida asi “ku” movelise ezi kwa tamba Karunga.