Kupi ayi tundu yimaliwa yokukwatesa ko sirugana seni sokuzuvhisa?

Yirugana yetu yokuzuvhisa unene po kuyikwatesa ko yigava yokutunda komutjima yoNombangi daJehova.a Momavango getu goukareli mwa kara yikesa yoyigava ntani nonkedi dimwe dokugava yigava kwa di tumbura koDonations page zetu. Muntu kuvhura a horowore nyamwendi nsene ana hara kugava yigava ngava ka yi ruganese kosirugana souzuni mudima ndi koyihepwa yomombungakriste ndi ta gava yigava ngava ka yi ruganese nakunye.

Nombangi daJehova kapi adi rugana sumina ndi va pure yimaliva eyi na gava nkenye muntu. (2 Vakolinte 9:7) Kapi atu pura mfuto komapongo ndi tu pure muntu a fute komeho va mukuhwe, a rugane ehoreko, ekwareko ndi yilika yimwe eyi ya hamena koukareli wetu. Ose kapi atu rugana maudano noyilika yokulisiga-siga yipo tu gwane yimaliva ntani kapi atu hundagere yimaliva. Ose kapi atu divisa muntu ogu ana gava yigava. (Mateusa 6:2-4) Kapi atu rugana matjingiso kointaneta zetu ntani nomoyimbapiratjangwa yetu.

Nkenye kwedi, nombungakriste doNombangi daJehova nadinye kugava erapoto lyoyimaliva kepongo. Yigava eyi azi ruganesa nkenye mbungakriste ku yi didilika yipo tu divilise asi yigava kuna ku yi ruganesa nawa.—2 Vakolinte 8:20, 21.

Nonkedi omu no gava yigava

• Yikesa yoyigava: Kuvhura o gave yigava pokutura yimaliva ndi tjeka mosikesa soyigava koSinyanga soUhompa, kosigongi ndi komavango gamwe aga atu pongere.

• Kugava kupitira kointaneta: Moyirongo yoyinzi, kuvhura o ruganese “Donate to Jehovah’s Witnesses” yipo o gave pokuruganesa sikarata, o tume yimaliva nomarupe gamwe gokutuma yimaliva kupitira kointaneta.b Nombangi dimwe ‘kupungura ko yuma’ nkenye kwedi eyi nava gava pokuruganesa nonkedi odo.—1 Vakolinte 16:2.

  

• Kutura po ewapaiko: Nonkedi dimwe dokugava kuhepa pomuhowo kutura po ewapaiko lyopaveta. Mawapaiko ogo kuvhura ga kuvatere o gwanene mo mauwa gomutero gomosirongo seni. Sinzi sovantu kutura po mawapaiko ndi kutjangesa yiweka yawo asi yilye ngayi pinga nsene vana fu. Gwanekera nomberewa zoNombangi daJehova zomomukunda gweni komauzera gomanzi nsene ono hara kugava yigava eyi:

  • account zokombanga

  • upungwiromeho

  • evango ndi etungo

  • stocks and bonds

  • kutjangesa upingwa

Komauzera gomanzi kuhamena nonkedi dokugava yigava momukunda ogu wa kara, tara koruha “Donate to Jehovah’s Witnesses.”