None kugava evatero poyimpagwa ndi?

Nhi, apa ayi horoka yimpagwa Nombangi daJehova kugava evatero. Ose kugava evatero koNombangi ntani nava va kara asi awo kapisi Nombangi, kuliza nepukururo lyomoVagarata 6:10 eli ali tanta asi: “Atu ruganeneni navenye uwa, unene po vapuli vakwetetu.” Ose kugava hena evatero lyopampepo kwanavenye ava sina horokere simpagwa.—2 Vakolinte 1:3, 4.

Mbunga

Konyima zosimpagwa, vakuronambunga womomukunda omu sina horokere simpagwa kuhetekera ko kudivilisa asi ngapi omu vana kerere vanavazinyawo ntani evatero musinke vana hepa. Vakuronambunga makura tava gava mbudi ezi nava gwana komberewa zomutayi zoNombangi daJehova

Nsene nombungakriste edi da kundurukida evango lyosimpagwa kapi dina kuvhura kugava evatero eli lina hepa po, Mbungagendesi zoNombangi daJehova kutura po mawapaiko mokugava evatero olyo. Eyi ya lifana nomu Vakriste wokuhova va livatere-vaterere mosiruwo serumbu. (1 Vakolinte 16:1-4) Mberewa zomutayi kuhorowora Komitiye zokuvatera yipo zi wapaike nokugendesa yininke. Nombangi dokoyirongo yapeke kulizambera siruwo nayiweka yawo yipo va ka vatere poyimpagwa.—Yisewe 17:17

Yifutwa

Yigava yimwe eyi ava tumu konomberewa domutayi doNombangi daJehova kuyiruganesa mokuvatera owo sina horokere sipampagwa. (Yirugana 11:27-30; 2 Vakolinte 8:13-15) Morwa yirugana eyi kuyirugana valizambeli, yifutwa nayinye kuyiruganesa mokuvatera posimpagwa kapisi yokufuta ava ava vatere posimpagwa. Ose kugendesa yigava nayinye momuwa.—2 Vakolinte 8:20