MAPURO AGA AVA PURA VADINKANTU
Ngapi omu Bibeli nazi vatera nge?—Ruha 1: Diva Bibeli zoge
“Ame na hetekera ko kuresa Bibeli nye kapi ayi tovara nge morwa azo nde!”—Briana, 15.
Nove yimo o lizuvhu ngoso ndi? Sirongwa esi nasi kuvatera.
Morwasinke nani resera Bibeli?
Ove kulizuvha udwadwa kuresa Bibeli ndi? Nsene yimo o lizuvhu ngoso, ku yi kwata egano. Ove nampo kugazara omu Bibeli za kara nomapenuno gomanzi ntani mwato mafano, kapisi ngwendi moomu za kara TV nonovidiyo.
Nye gazadara ko si: Ngapi nsene o gwana sikesa esi ngava ruganesa uye wanare sina kara nougawo, kuvhura o guse ugawo owo ndi?
Bibeli nazo kwa kara ngwendi sikesa oso. Amo kwa kara mo maugawo gomanzi aga naga kuvatera
O ture po matokoro gomawa
O kare nelikwatakano lyewa novakondi woge
O gwane vakaume wovawa
O lididimikire yinka
Ngapi omu buke ezi va tjenge nare nazi vhura kutuvatera naina? Morwa “nayinye eyi va tjanga moMatjangwa gokupongoka kwa tunda kwaKarunga.” (2 Timoteusa 3:16) Kutanta asi magano ga kara moBibeli kwa tunda komuntu gokuhuguvara.
Bibeli kuna kara sikesa sougawo esi sa kara nougawo wounongo
Ngapi omu nani resa Bibeli?
Nkedi zimwe kuna kara kuresa tunda epenuno zende epenuno. Oyo nayi kuvatera o kwate egano mbudi zomoBibeli. Nonkedi nonzi omu no resa Bibeli. Tara yihonena yivali:
Kuvhura o rese nobuke domoBibeli 66 moomu da likwamena, kutundilira kwaGenesis dogoro kEhororo.
Kuvhura o rese Bibeli kuliza nomu ya likwama yihorokwa yomoBibeli.
Heteka: MoAppendix A7 moBibeli zoNew World Translation kwa kara mo elikwamo lyoyihorokwa eyi ya horokere meparu lyaJesus apa ga kere pevhu.
Nkedi zauvali omu no resa Bibeli kuna kara kuhorowora sihorokwa esi sa lizi noukaro ou ono kuligwanekera nawo. Pasihonena:
Ono hara kukara novakaume wokuhuguvara ndi? Resa esimwititi lyaJonatana naNdafita (1 Samwere, egaununo 18-20) Makura ruganesa sirongwa “Omu no gwana vakaume wokuhuguvara” yipo o lirongere ko yirongwa yomulyo.
Ono hara kunyokera po mazedo gomadona ndi? Resa esimwititi kuhamena omu Josefa ga nyokerere po ezedo. (Genesis, egaununo 39) Makura ruganesa sirongwa “Omu no nyokera po mazedo . . . Josefa—Ruha 1” ntani “Kwa mu rundilire! Josefa—Ruha 2” yipo o lirongere ko yirongwa yomulyo.
Ono hara kudiva omu ekanderero nali kuvatera ndi? Resa sihorokwa saNehemiya. (Nehemiya, egaununo 2) Makura ruganesa sirongwa “Karunga kwa limbwilire ekanderero lyendi” yipo o lirongere ko yirongwa yomulyo.
Heteka: Apa no resa Bibeli, divilisa asi pevango apa ono kuresera pwato mazogerero, yipo o demenene kweyi ono kuresa.
Nkedi zautatu omu no resa Bibeli kuna kara kuhorowora sihorokwa noku tara eyi no lirongera ko. Apa no mana kuresa, lipura mapuro aga:
Morwasinke Jehova ga yi tulira moBibeli?
Yisinke yina kulikida nge eyi kuhamena yikara yaJehova ndi omu a rugana yininke?
Ngapi nani yi tura pasirugana?
Heteka: Ruganesa Bibeli study edition zoNew World Translation yipo o gwane novidiyo, nokarata ntani noyininke yimwe eyi nayi kuvatera o gwanene mo uwa mereso lyoge lyoBibeli.