Bibeli kwa tumbura yihonena yovakadi wovanzi ava va here Jehova nokumukarera. Awo kwa lipangerere mwanayinye’ ntani ‘kwa limburukwire mwanayinye.’ (1 Tim. 3:11) Mokugwederera ko, vanavazinyetu wovakadi kuvhura va lirongere ko yoyinzi koyihonena yovanavazinyetu wovakadi womombungakriste zawo ava va hara Jehova. Vanavazinyetu wovadinkantu wovakadi kuvhura mugazadare ko koyihonena yoyiwa yovanavazinyetu wovakadi ava no mu honena. Nomeneni yikara yawo yoyiwa. Ntani gazadareniko omu no mu honena yikara yawo yoyiwa. Elinunupiko kuna kara sikara esi twa hepa yipo tu honene Jesus. Nsene mukadi a li nunupika, age nga kara nelikwatakano lyewa naJehova ntani nava wopeke. Pasihonena, mukadi ogu ga hara Jehova, kukwatesa ko nelinunupiko ewapaiko lyoupangeli eli ga tulisa po Jehova. (1 Kol. 11:3) Mpango ezi zoupangeli kuziruganesa hena mombungakriste ntani mepata. w23.12 18-19 ¶3-5

Jehova kundindira ko kovagara va hare vakadi vawo nokuvapakera mbili, nokukara vakaume vawo ntani nokuvavatera va hedere Jehova pepi. Kukara nonondunge, kufumadeka vakadi ntani kukara gokuhuguvara, ngayi kuvatera yipo ngo kare nturagumbo gomuwa. Konyima zapa ngo kwara, kuvhura ngo kare guhya. Yisinke no lirongera ko kwaJehova kuhamena kukara guhya gomuwa? (Efe. 6:4) Jehova kwa tanterere Munendi Jesus asi ga mu hara ntani ga mu za komutjima. (Mat. 3:17) Nsene ngo kara guhya, ngo tantere vana woge nkenye apa asi wa va hara. Ngo va pandadeke koyininke yoyiwa eyi ava rugana. Vaguhya ava ava honene Jehova, kuvatera vana vawo ngava kare Vakriste ava ava honene Jesus. Kuvhura o liwapaikire situmbukira oso ngesi pokupakera mbili womombungakriste nava vemepata lyoge ntani pokuvalikida eharo nokuvapandura.​—Joh. 15:9. w23.12 28-29 ¶17-18

Nampili ngomu atu karere Jehova noulimburukwi, nose kuligwanekera nomaudigu ngwendi aga ava ligwanekere nago vantu navenye. Ntani kuvhura tu ligwanekere nomarwaneso ntani nomahepeko gokutunda kwava va nyenga vantu vaKarunga. Nampili ngomu Jehova a dili kutupopera komaudigu ogo, nye age kwa tumbwidira asi nga tu vatera. (Jes. 41:10) Nevatero lyendi, ose kuvhura kutwikira kuhafa nokutura po matokoro gomawa ntani nokutwikira kumulimburukwa nampili momaudigu gomanene. Jehova kwa tumbwidira asi nga tu pa eyi azi tumbura Bibeli asi “mbili zaKarunga.” (Fil. 4:6, 7) Mbili ezi kwa tamba pokukara tuna litura ntani azo kuwiza po tupu morwa twa kara nelikwatakano lyenene naJehova. Mbili ezi kapi ava ‘vhuru kuzikwata egano vantu’ morwa azo ngwa unene kupitakana omu natu yi gazarera. Pasihonena, wa kanderera kwaJehova, ano konyima ya ku tetukisire morwa wa lizuvhire asi ono litura ndi? Yosili ove kwa lizuvhire “mbili zaKarunga” morwa yige ga zi kupere. w24.01 20 ¶2; 21 ¶4