Ose kuvhura tu hafese Jehova neina mokumuuyunga monkedi ezi azi likida asi twa kara norupandu kwendi ntani twa mu hara. Nsene kuna kuzuvhisa, twa hepa kudiworoka asi sitambo setu sosinene po kuna kara sokuvatera vantu va hedere pepi naJehova ntani kuvavatera va tare Guhyetu gemeguru ngwendi moomu atu mu tara. (Jak. 4:8) Ayo kutuhafesa kweyi atu tantere vantu kuhamena omu Bibeli za faturura Jehova, pasihonena eharo eli ga kara nalyo, uhungami, unongo, nonkondo ntani noyikara yimwe hena yoyiwa. Ose kuhamberera hena Jehova ntani kumuhafesa apa atu kondjo paapa twa hulira yipo tu mu honene. Apa atu yi rugana oyo, wopeke kuvhura va yi dimburure asi ose twa lisiga novantu womouzuni ou woudona. (Mat. 5:14-16) Ngomu tuna kurugana kumwe nawo meparu lyetu lyankenye ezuva, ose kuvhura tu va fatwilire nokonda deyi atu ruganene yininke monkedi zongandi. Ngoyitundwamo, vantu wonomutjima donongwa kuvhura kuvahedesera pepi naJehova. Apa atu hamberere Jehova mononkedi odo, ose kumuhafesa.​—1 Tim. 2:3, 4. w24.02 10 ¶7

Mokukara mugara ogu a honene Jesus, lironga yininke yimwe eyi ngayi kuvatera meparu. Ayo ngayi kuvatera o tambure yitumbukira yomombungakriste ntani yipo ngo gwane yirugana eyi ngo lireresa nyamoge ndi epata lyoge ntani nokukara nelikwatakano lyewa nava wopeke. Pasihonena, lironga kuresa nokutjanga nawa. Bibeli kuuyunga asi mugara goruhafo ntani ogu ngayi tompoka, age kuresa Bibeli nkenye ezuva nokuteda ko. (Epis. 1:1-3) Pokuresa Bibeli nkenye ezuva, age nga diva omu a gazara Jehova ntani ngayi mu vatera yipo a gazare nawa nokulironga omu na tura pasirugana Matjangwa. (Yis. 1:3, 4) Vanavazinyetu va hepa evatero lyokutunda kovagara ava ava rongo nokugava mavyukiso gomoBibeli. Nsene o diva nawa kuresa nokutjanga, ove ngo liwapaikira yiuyungwa yokukorangeda ntani nomalimbururo. Ove ngo vhura kutjanga yitwa yomulyo eyi ngayi kuvatera o kare nepuro lyokupama ntani o korangede wopeke. w23.12 26-27 ¶9-11

Apa o kara noutjirwe, teda ko kweyi Jehova nga ka rugana komeho apa ngava ka gusa po Satana. Elikido limwe lyoposigongi simwe somazuva gatatu somo-2014, kwa likidire omu guhya ga zogerere nepata lyendi nonkango dakara mwa-2 Timoteusa 3:1-5, omu nadi vhura kukara nsene asi ado kwa pumba omu paradisa nga zi ka kara: “Mouzuni woupe nga mu kara yiruwo yokuhafesa. Vantu ngava hara wopeke, ngava hara usili, ngava linunupika, ngava hamberera Karunga, ngava limburukwa vakurona vawo, ngava kara norupandu, ngava kara novakwawo, ngava hara unene vekoro lyawo, ngava lizuvha novakwawo, ngava uyunga wopeke momuwa, ngava lipangera, ngava hara yoyiwa, ngava kara wokuhuguvara, ngava kara nougomoki, ngava hafesa Karunga mevango lyokulihafesa vene, ngava tjira Karunga ntani likara pepi novantu owo.” Ove kuzogera nava vemepata lyoge ndi novanavazinyetu kuhamena omu ngali ka kara eparu moparadisa ndi? w24.01 6 ¶13-14