Ayo kuhengagwida pokudiva asi Jehova kuhafera vantu vendi ngombunga. Bibeli kutanta asi: “HOMPA kwa hafera vantu vendi.” (Epis. 149:4) Poyiruwo yimwe, vamwe kudompa mutjima nokulipura asi, ‘Jehova kuhafera nge pamundinda ndi?’ Sinzi sovakareli vaJehova ava va tumbura moBibeli nawo ngava lipura nsene asi Jehova kuvahafera. (1 Sam. 1:6-10; Joba 29:2, 4; Epis. 51:11) Bibeli kutanta asi Jehova kuvhura a hafere vantu wokudira kusikiliramo. Monkedi musinke? Twa hepa kutura epuro mwaJesus nokugwana ekuho. (Joh. 3:16) Monkedi zangesi ose kuyilikida kwava wopeke asi twa litezurura kononzo detu ntani twa tura po etumbwidiro lyokurugana mpango zaKarunga. (Yirug. 2:38; 3:19) Jehova kumuhafesa apa a tu rugana yininke eyi, yipo tu ture po ukaume kumwe nendi. Nsene tu rugana paapa twa hulira yipo tu sikise mo mugano gwetu gokumukarera, Jehova nga tu hafera ntani nokututara asi vakaume vendi.​—Epis. 25:14. w24.03 26 ¶1-2

Ose kuvhura kuhonena varongwa vaJesus pokutwikira kuzuvhisa nampili apa mapangero aga tu pangere tu hageke. Ose kuvhura tu huguvare asi Jehova nga tu vatera yipo tu sikisemo sirugana setu sokuzuvhisa. Yipo nye, kanderera kwa Jehova yipo a tu pe ko uradi nounongo ntani a ku vatere o lididimikire maudigu. Sinzi setu kuna kuligwanekera nomauvera, maudigu gopamalizuvho, kufisa muntu ogu twa hara, udigu wemepata, mahepeko, ndi maudigu gamwe hena. Ntani yininke ngwendi mauvera gomukagu noyita kwa tu ninkisa yi tu karere udigu unene kulididimikira maudigu. Tantera Jehova kuhamena omu ono kulizuvha. Mu tantera kuhamena ukaro woge ou ono kuligwanekera nawo ngwendi moomu tupu o tantere kaume koge udigu woge. Kara nehuguvaro asi Jehova ‘nga ku kwafa.’ (Epis. 37:3, 5) Kukanderera nkenye apa nga ku tuvatera tu “lididimikireni momaudigu.” (Rom. 12:12) Jehova ga diva eyi vana kuligwanekera nayo vakareli vendi. Age “kuzuvha nkugo zawo.”​—Epis. 145:18, 19. w23.05 5-6 ¶12-15

Nsene tuna kara nomatokoro gomulyo aga twa hepa kutura po, twa hepa kukwata egano ‘eyi ana tu harere Jehova tu rugane’ ntani nokuparuka kuliza nayo. (Efe. 5:17) Apa atu gwana nompango domoBibeli edi da liza noukaro wetu, ose ngoso kuna kupapara magano gaJehova kuhamena omu a tara yuma oyo. Ngomu tuna kutura pasirugana nompango dendi, ose ngatu tura po matokoro gomawa. Nkore zetu Satana kuna tu harere tu liture mo unene moyininke youzuni ou yipo tu dire kukara nosiruwo sokurugana unene mosirugana saJehova. (1 Joh. 5:19) Ayo kuvhura yi kare ureru koMukriste a ture muhowo yimaliwa ntani sure ndi yirugana, mevango lyokupapara nompito a liture mo unene mosirugana saJehova. Nsene yi horoka oyo, age kuvhura kutameka kugazara ngwendi vantu ava ava dili kukarera Jehova. Yimo, yininke eyi kapi ya kara epuko, nye kapisi tu yi ture muhowo meparu lyetu. w24.03 24 ¶16-17