Esira
3 Apa kwa sikire kwedi kwauntambali, awo Vaisraeli* vana tungu moyitata yawo, tava lizuvhu va ka ponge kumwe moJerusarema. 2 Jesuwa munaJehosadaka novapristeli vakwawo ntani Serubabeli munaSeyalitiyeli novakwawo, tava tameke kudika sizambero saKarunga goVaisraeli, yipo va zambere po nonzambo deswakerero ngwendi moomu va yi tjanga moVeta zaMosesa, mukareli gwaKarunga gousili.
3 Awo kwa dikire sizambero oso pevango apa sa kere nare ntani tava tameke kuzambera po nonzambo deswakerero kwaJehova ngurangura nongurova. Awo kwa dikire sizambero nampili ngomu va tjilire vantu wokonomuhoko edi da va kundurukidire. 4 Makura tava dana sipito soyikorogo* ngwendi moomu va yi tjanga ntani ngava gava nonzambo deswakerero nkenye ezuva kuliza nosivaro sononzambo esi va tura po. 5 Kutunda opo, awo kwa twikilire kugava nzambo zeswakerero zankenye ezuva ntani nononzambo dopoyipito yokwedi kokupe nononzambo dopoyipito yokupongoka yaJehova ntani nononzambo edi ngava gava vantu kwaJehova meharo lyavene. 6 Awo kwa tamekere kugava kwaJehova nonzambo deswakerero mezuva lyokuhova lyokwedi kwauntambali, nampili ngomu va dilire kudika etateko lyontembeli zaJehova.
7 Awo kwa geve yimaliwa kovantu ava ngava tete mamanya nokovahongi. Awo kwa geve hena nondya, yikunwa nomagadi koVasidoni ntani kovantu womoTirusi kweyi va va tuminine yitji yosedeli eyi va menge kumwe yi gendere mefuta, yi tunde koLibanoni yi ze koJopa. Koresi hompa gwaPeresiya yige ga va pere epulisiro olyo.
8 Mokwedi kwauvali komvhura zauvali kutunda apa va ya sikire konzugo zaKarunga gousili moJerusarema, Serubabeli munaSeyalitiyeli naJesuwa munaJehosadaka novakwawo wovapristeli nava woVarevhi ntani novantu navenye ava va zire koJerusarema va tunde kounkwate, tava tameke sirugana. Awo kwa horowere Varevhi wonomvhura 20 yikandwise va tarere sirugana sokonzugo zaJehova. 9 Makura Jesuwa novana vendi wovagara novakwawo naKadimiyeli novana vendi wovagara ava va tundire morudi rwaJuda ntani naHenadadi novana vendi wovagara noVarevhi vakwawo, tava lipakerere kumwe va tarere sirugana sokonzugo zaKarunga gousili.
10 Apa va mene vantu kutunga etateko lyontembeli zaJehova, vapristeli ava va dwere marwakani ava va kwaterere nombendo ntani noVarevhi womoruvharo rwaAsafa ava va kwaterere nonkonkweso, tava katuka va hamberere Jehova ngwendi moomu ga va pangerere Ndafita hompa goVaisraeli. 11 Awo kwa litambagwire kudimba va hamberere nokupandura Jehova asi: “Yeeyi age muwa, eharo lyendi koVaisraeli lyanarunye.” Makura vantu tava zigire unene va hamberere Jehova, yeeyi awo kwa mene kudika etateko lyonzugo zaJehova. 12 Sinzi sovapristeli noVarevhi ntani nomasimbi gomomazimo goVaisraeli (ava va mwene omu za fene nare ntembeli ntani ava va kere vakurupe) tava lili unene apa va mwene asi etateko lina pu kulidika. Ano sinzi sovantu wopeke kwa zigilire unene noruhafo. 13 Vantu kwa zigilire unene dogoro tava yi zuvhu ava va kere koure ntani vantu kapi va divire nsene asi vantu kuna kulira ndi kuna kuzigira morwa ruhafo.