Buke zaRukasa

6 MEsabata, age kwa pitire momapya gorukokotwa makura varongwa vendi tava tezagura rukokotwa nokurudiga va lye. 2 Apa Vafalisayi va yi mwene eyi, tava pura asi: “Morwasinke muna kuruganena eyi va silika mEsabata?” 3 Nye Jesus ta va limburura asi: “Nani kapi mwa resa eyi ga rugene Ndafita novantu vendi apa za va kwete nzara ndi? 4 Omu ga hwililire monzugo zaKarunga, tava mu pe nomboroto donzambo* makura ta li, ta pe ko vantu vendi, eyi za dira kupulisira Veta ntudi vapristeli velike?” 5 Age ta va tantere asi: “MunwaMuntu yige Hompa gEsabata.”

6 MEsabata limwe, ta hwilire mosinagoge, ta tameke kuronga. Amo kwa kere mo mugara ogu ga fa kuwoko korulyo. 7 Valirongi womatjangwa noVafalisayi kwa nomenene Jesus va tare nsene na verura mEsabata, yipo va gwanene po mpito zokumupa unzoni. 8 Nye age ga divire eyi va gazarere, makura ta tantere mugara gokufa kuwoko asi: “Katuka o ya sikame pokatji.” Age ta katuka, ta ka sikama. 9 Makura Jesus ta va pura asi: “Yisinke nani va pulisira mEsabata, yoyiwa ndi yoyidona? Yokuparura ndi yokuzonagura?” 10 Konyima zokuvatarurura, ta tantere mugara ogo asi: “Gonyonona kuwoko koge.” Age ta yi rugana makura kuwoko kwendi ta ku veruka. 11 Nye awo tava handuka unene, tava liyongo eyi nava rugana Jesus.

12 Ezuva limwe, age kwa zire kondundu a ka kanderere, age kwa ka kanderere kwaKarunga masiku nagenye. 13 Apa lya sire, ta zigida varongwa vendi, ta horowora mo 12, ta va ruku asi vapositoli. 14 Awo yiwo ava, Simoni ogu ga rukire hena asi Peturusa namumbyendi Andiliyasa ntani Jakopo naJohanesa naFilipusa naBaratoromeusa, 15 naMateusa naTomasa naJakopo munwaArufeusa gomugara naSimoni ogu ngava tumbura asi “gomupampi,” 16 Judasa munwaJakopo gomugara ntani Judasa Isikalyoto ogu ga ya mu horwere.

17 Ta gurumuka a tunde nawo kondundu, ta ya sikama pevango lyokuhetakana, apo kwa kere po mbunga zonene zovarongwa vendi nombunga zonene zovantu ava va tundire koJudeya nokoJerusarema ntani nokonomukunda dekefuta lyaTirusi naSidoni, awo kwa wizire va ya mu purakene ntani va ya va verure. 18 Ava ngadi hepeke nompepo donondona nawo kwa va verwire. 19 Vantu navenye kwa here kumukwata morwa nonkondo kwa tundire mwendi di verure mauvera govantu navenye.

20 Ta tara varongwa vendi makura ta tanta asi:

“One vahepwe kuna kara vantu woruhafo, yeeyi Uhompa waKarunga weni.

21 “One muna kufa nzara ngesi kuna kara vantu woruhafo, yeeyi ngava ka mu kutika.

“One muna kulira ngesi kuna kara vantu woruhafo, yeeyi ngomu ka zora.

22 “One vantu woruhafo nsene vantu tava mu nyenge, tava mu tjida mo mokatji kawo, tava mu swaura ndi tava mu rundire asi mu vadona medina lyaMunwaMuntu. 23 Hafeni morwa mfeto zeni nene meguru, yeeyi ozinyakurwawo yimo ngorooro va hepekere vaporofete.

24 “Nane vakwetu one nongawo, yeeyi mwa gwana nare mauwa nagenye.

25 “Nane vakwetu one muna kuta ngesi yeeyi ngomu fa nzara.

“Nane vakwetu one muna kuzoragana ngesi yeeyi ngomu guva nokulira.

26 “Nane vakwetu nsene vantu tava mu uyunga momuwa, yeeyi ozinyakurwawo nawo yimo ngorooro ngava uyunga vaporofete woyimpempa.

27 “Nye ame tani mu tantere one muna kupurakena asi hareni nonkore deni, ruganeneni uwa ava va mu nyenga, 28 uyungeni momuwa ava ava mu fingi ntani kanderereni po ava ava mu swaura. 29 Nsene a ku kapura muntu ketama limwe, mu pirwira nekwawo. Ano nsene a gusa sikoverero soge sokontunda, mu sigira nesi sokonhi. 30 Gava kwankenye gumwe ogu ana kukuhundira, nye wa ha yi tondora hena.

31 “Ntani hena, eyi mwa harera vantu asi va yi mu ruganene, none omu yi va ruganene.

32 “Nsene mu hara tupu vaava va mu hara, uwa musinke ngomu gwanena po? Nampili vananzo nawo kwa hara tupu ava va va hara. 33 Ntani nsene mu ruganena tupu uwa ava ava mu ruganene uwa, yinke ngomu gwanena po? Yeeyi vananzo nawo yiyo ava rugana. 34 Ntani hena, nsene mu gava makongo kwa va mwa diva asi ngava yi futa, uwa musinke ngomu gwanena po? Nampili vananzo nawo kugava makongo kovananzo yipo va gwanene po yoyinzi. 35 Nye one, hareni nonkore deni nokudiruganena uwa ntani gaveni mwa hana kundindira mfeto, makura mfeto zeni ngazi kara zonene, one ngomu kare vana vaKarunga gekeguru-guru, yeeyi age kuruganena uwa wokudira rupandu ntani wovadona. 36 Omu kare nonkenda ngwendi moomu ga kara Guhyeni nonkenda.

37 “Ntani hena, hagekeni kupangura yipo none ngava dire kumupangura, hagekeni kutara komapuko govakweneni none yipo ngava dire kutara komapuko geni. Gusireni po vakweni none ngava mu gusire po. 38 Kareni nougavi yipo none ngava mu pe. Awo ngava zwida malimba gopononturo deni,* yeeyi sihetekeso esi omu hetekesa, none yiso ngava mu hetekesa.”

39 Age makura tava tantere sifanekeso esi asi: “Mutwiku nokuvhura si kupitisira mutwiku mukwawo, morwa navenye kuvhura va gwire mekero. 40 Murongwa kapi ga pitakana murongi gwendi, nye nsene ana pu kumuronga age kuyakara ngwendi murongi gwendi. 41 Yisinke no zigira kavambi* meho lyamukweni, nye ove wa hana kumona nkambo ezi zina kara meho lyoge? 42 Ngapi omu no tantera mukweni asi: ‘Hewa, ninka ni ku guse kavambi aka kana kara meho lyoge,’ ove wa hana kumona nkambo ezi zina kara meho lyoge? Muyilipaki ove! Hova tanko kuligusa nkambo ezi zina kara meho lyoge yipo o mone nawa ntani nye no wapa kugusa kavambi meho lyamukweni.

43 “Yeeyi kwato sitji sosiwa esi asi yimi enyango lyedona ndi asi sitji sosidona si yime enyango lyewa. 44 Yeeyi nkenye sitji kusidimbwilira kenyango lyaso. Pasihonena, vantu kapi ava nyanga ekuzu komega ndi va nyange mandjembere kosihwa somega. 45 Muntu gomuwa kuuyunga yoyiwa eyi ya kara momutjima gwendi ano muntu gomudona kuuyunga yoyidona eyi ya kara momutjima gwendi, yeeyi eyi ya zura momutjima yiyo a uyunga muntu.

46 “Morwasinke nye omu tumbwire nge asi: ‘Hompa, Hompa’ nye kapi omu sikisa mo eyi ani mu tantere? 47 Ame ngani mu likida omu ga fana nkenye ogu a wiza kwange nokuzuvha nonkango dange oku ta di sikisa mo. 48 Age kwa fana ngwendi mugara ogu ga dikire nzugo, age kwa simine unene mukanko makura ta dikire etateko pemanya. Apa rwa wizire ruhanzo, kwa litoonene monzugo nye kapi rwa vhulire kuzonagura po nzugo zina morwa kwa zi dikire nawa. 49 Nye ogu a zuvhu nonkango nye ga hana kudisikisa mo, kwa lifana nomugara ogu ga dikilire nzugo zendi pevhu age ga hana kuhova kusima etateko. Apa ga litoonene mo mema, nzugo tazi zunguruka, azo kwa zungurukire unene.”