Buke zaRukasa

1 Tiyofirusa gekuto, wovanzi kwa tjanga eyi ya horoka, eyi twa pura nose, 2 eyi va tjenge kwa liza neyi twa zuvhire kwava va yi mwene ntani kwava ngava zuvhisa mbudi zaKarunga. 3 Yipo nye, ame kwa konakona yininke nayinye eyi, yiyo na tokora kuyikutjangera moomu ya likwamena, 4 ame kwa yi ruganena eyi yipo o dive nawa-nawa asi eyi va ku ronga usili.

5 Posiruwo saHerodesa* mupangeli gwaJudeya, pwa kere mupristeli gedina Sakaliya ogu ga kere gomombunga zaAbiya. Mukadendi kwa kere gemezimo lyaArona, ano edina lyendi Elisabeta. 6 Valikwali owo kwa kere vahungami kosipara saKarunga, awo ngava kwama noveta daJehova nadinye. 7 Nye awo kapi va kere nomuna, morwa Elisabeta kwa kere nganze ntani navenye mouvali wawo kwa kurupire unene.

8 Age kwa rugene sirugana sendi soupristeli kosipara saKarunga morwa kwa kere rufo rwawo rokurugana kontembeli kumwe novapristeli vakwawo. 9 Kuliza nompo zovapristeli, aro kwa kere rufo rwendi rokukahwika nzambo zedumba lyewa posizambero. Age makura ta hwilire montembeli zaJehova. 10 Mbunga zovantu kwa kanderere ponze zontembeli posiruwo esi ga hwikire nzambo zedumba lyewa. 11 Muengeli gwaJehova ta mu monekere, ta sikama korulyo rosizambero sokuhwikira nzambo zedumba lyewa. 12 Nye Sakaliya apa ga mu mwene, ta tukuka unene nokukara nowoma. 13 Nye muengeli ta mu tantere asi: “Sakaliya, wa ha tjira, morwa Karunga ana zuvhu elikwambero lyoge. Mukadoge Elisabeta nga reta munona gomumati, makura ngo mu ruke Johanesa. 14 Ove ngo hafa unene, ano wovanzi nawo ngava hafa apa ngava mu hampuruka, 15 yeeyi age nga kara munene kosipara saJehova. Nye kapisi nga nwe vhinyu ndi nkenye yikorwesa, age nga zura mpepo zokupongoka nampili komeho ngava mu hampuruke* 16 ntani nga vatera Vaisraeli wovanzi va tengure kwaJehova, Karunga gwawo. 17 Karunga nga tuma munoge a pite komeho zendi nompepo nononkondo ngwendi daEliya. Age nga ninka nomutjima dovaguhya di kare ngwendi dovanona, ano ava ava dili kulimburukwa nga va ninka va kare nonondunge nokurugana yoyiwa yipo ngava karere Jehova.”

18 Sakaliya ta pura muengeli asi: “Ngapi nani yi diva asi ngayi horoka? Yeeyi ame nina kurupa ntani mukadange nage ana kurupa.” 19 Muengeli ta mu limburura asi: “Nyame Ngabiliyera, ogu ga kara komeho zaKarunga, ntani kwa tumu nge ni ya ku tantere mbudi ezi zongwa. 20 Kutunda apa, ove ngo mwena, kapi ngo vhura kuuyunga dogoro nga yi sike mo nayinye eyi, morwa kapi ono pura nonkango dange edi ngadi sika mo posiruwo sado.” 21 Posiruwo oso, vantu kwa ndindilire Sakaliya, ntani awo kwa tetukire morwa age kwa ka kere siruwo sosire montembeli. 22 Apa ga pwege mo, kapi ga vhulire kuvauyungisa, makura tava gazara asi nampo kuna ka mona emoneko montembeli. Age kwa va uyungisire tupu morupuru-puru nye kapi ga uyungire. 23 Apa rwa pwire rufo rwendi rokurugana kontembeli, ta tengura kembo.

24 Konyima zomazuva gongandi, mukadendi Elisabeta ta kara nomarutu gavali, age kapi nga tundu mo membo ure womakwedi gatano, ta tanta asi: 25 “Eyi yiyo ana ruganene nge Jehova. Age kuna tara nge eho yipo a guse nge nomuga dange.”

26 Konyima zomakwedi ntazimwe, Karunga ta tumu muengeli Ngabiliyera kositata somoGalireya, sedina Nasareta, 27 komukadona ogu ga vandekerere Josefa gemezimo lyaNdafita, gedina Mariya. 28 Apa ga wizire muengeli kwendi, ta mu tantere asi: “Moro, Jehova kwa kuhara unene, age kumwe nove ana kara.” 29 Nye age kwa tukukire unene, ta hetekere ko kukwata egano eyi dina kutanta nonkango odo. 30 Muengeli makura ta mu tantere asi: “Mariya, wa ha tjira, yeeyi Karunga ana kuhafere. 31 Ove ngo kara nomarutu gavali, makura ngo hampuruka munona gomumati, ngo mu ruke Jesus. 32 Age nga kara munene ntani ngava mu tumbura asi MunwaKarunga gekeguru-guru ntani Jehova Karunga nga mu pa uhompa wozinakuru Ndafita, 33 age nga pangera ngaHompa ruvharo rwaJakopo ntani Uhompa wendi kapi ngau haga.”

34 Nye Mariya ta tantere muengeli asi: “Ngapi omu ngayi horoka eyi, yeeyi ame kapi na ligwanekera rumwe panyama nomugara?” 35 Muengeli makura ta mu limburura asi: “Mpepo zokupongoka ngazi ku wizira ntani nonkondo dogu gekeguru-guru ngadi ku kudumika. Yiyo nye ngava mu tumbwira ogu ngo hampuruka asi ga pongoka, MunwaKarunga. 36 Ekoro lyoge Elisabeta nage nezimo ana kara moukurupe wendi, ano oku ngesi kwedi kwauntazimwe nampili ngomu ga kere nganze; 37 yeeyi nkenye eyi a tanta Karunga kusika mo.” 38 Mariya makura ta tanta asi: “Ame mukareli gwaJehova. Yi horokere nge tupu moomu ono tanta.” Muengeli makura ta tundu po pwendi.

39 Konyima zomazuva gongandi, Mariya ta genderere kuza kosirongo sonondundu kositata somoJuda, 40 ta hwilire membo lyaSakaliya nokumorora Elisabeta. 41 Elisabeta tupu ga zuvhire Mariya kuna kumorora, munona mezimo lyendi ta vatuka, Elisabeta kwa zulire mpepo zokupongoka, 42 ta zigire asi: “Ove kwa kutungika mokatji kovakadi, nomunona ogu ngo hampuruka nage kwa mu tungika! 43 Ee mfumwa musi mokuyadingura nge zinyaHompa gwange! 44 Yeeyi apa tupu nina zuvhu ezwi lyoge, munona yipo ana vatuka mezimo lyange morwa ruhafo. 45 Muntu goruhafo googu a yi pura, yeeyi nayinye eyi ga mu tantera Jehova ngayi sika mo.”

46 Mariya ta tanta asi: “Ame tani hamberere Jehova, 47 ntani mutjima gwange guna hafa unene morwa Karunga Muzowoli gwange, 48 ana diworoka mukareli gwendi. Kutunda naina, nomuhoko nadinye ngadi tumbura nge asi munerago, 49 yeeyi Munankondo nadinye ana ruganene nge yininke yoyinene ntani edina lyendi kwa pongoka, 50 age kufira nkenda ava ava mu tjira, ava vana kara po nava ngava ka kara ko komeho. 51 Age kwa rugana yininke yoyinene nokuwoko kwendi, ntani age kwa haraganesa ava ava linenepeke monomutjima dawo. 52 Age kwa gusa ko vanankondo koyipundi yawo nokuzerura ava va linunupika, 53 age kwa kutika wonzara noyininke yoyiwa ano nongawo yiyo ga di tjida mawoko-woko. 54 Age kwa vatera mukareli gwendi Israeli, pokudiworoka nkenda zendi 55 moomu tupu ga yi tumbwidilire zinyakurwetu Abirahamu noruvharo* rwendi narunye.” 56 Mariya kwa kere naElisabeta makwedi gatatu makura ta tengura kembo.

57 Apa sa sikire mo siruwo sokuhampuruka, Elisabeta ta hampuruka munona gomumati. 58 Ano vamusinda nekoro lyendi apa va zuvhire asi Jehova ana mu fire nkenda zonene, makura tava ya mu hafesa ko. 59 Mezuva lyauntantatu, tava wiza va ya rugane munona yovamba ntani awo kwa here va mu ruke edina lyoguhwe, Sakaliya. 60 Nye ozina tava tanta asi: “Hawe! Edina lyendi Johanesa.” 61 Awo tava mu tantere asi: “Mekoro lyoge mwato ogu va ruka rumwe edina olyo.” 62 Makura tava pura oguhwe womunona morupuru-puru asi edina musinke va here kumuruka. 63 Sakaliya ta pura va mu pe siperende makura ta tjanga po asi: “Edina lyendi Johanesa.” Awo makura tava tetuka. 64 Poopo ngoso, kana neraka lyendi ta yi mahuka, ta tameke kuuyunga a hamberere Karunga. 65 Vamusinda ta yi va tetukisa unene makura tava tameke kuyihanesa konomukunda dokonondundu nadinye domoJudeya. 66 Navenye ava va yi zuvhire tava lipura monomutjima dawo asi: “Munona ogu muntu musinke nga kara?” Yeeyi nonkondo daJehova kwa kere pwendi.

67 Sakaliya oguhwe womunona ogo kwa zulire mpepo zokupongoka makura tava porofeta asi: 68 “Jehova, Karunga gwaIsraeli va mu hamberere, yeeyi age ana diworoka vantu vendi yipo nga va zowore. 69 Age ana tu pe muzowoli gononkondo* gemezimo lyomukareli gwendi Ndafita, 70 ngamoomu ga uyungire nare kupitira movaporofete vendi wokupongoka, 71 asi nga tu zowora kononkore detu ntani kwanavenye ava va tu nyenga, 72 nokulikida nkenda ozinyakurwetu ntani nokudiworoka egwanekero lyendi lyokupongoka, 73 age kwa gene kwaAbirahamu zinyakurwetu, 74 asi konyima zokutupopera kononkore detu, nga tu pa mpito zokumukarera 75 noulimburukwi ntani nouhungami komeho zendi mazuva getu nagenye. 76 Nye ove munona, ngava ku tumbura asi muporofete gogu gekeguru-guru, yeeyi ove ngo pita komeho o wapaikire Jehova nonzira dendi, 77 ngo gave ediwo kovantu vendi asi age nga va zowora pokuvadongwenena po nonzo dawo, 78 morwa nkenda zaKarunga gwetu. Age kwa tu fira nkenda yiyo ngatu pumisira ezuva, 79 li rete uzera kwava va hingira momundema nomomundwire gonomfa nokutupitisira monzira zombili.”

80 Munona makura ta kuru, ta koro mompepo, age kwa kere momburundu dogoro apa sa sikire mo siruwo sokuza a ka zuvhisire Vaisraeli.