Mapukururo gomawa kuhamena udike nononkwara
“Eyi ame kuna kuyimutanterera . . . yokumuwapeka mu kare vakuhuki, mu kerere Hompa mwa hana yipigauka.”—1 KOL. 7:35.
1, 2. Morwasinke muntu na paparera mapukururo gomoBibeli kuhamena udike nononkwara?
MALIKWATAKANO pokatji komugara nomukadi kuvhura kureta ruhafo ndi enyegenyo ndi sinka sosinene. Morwa kuligwanekera nomalizuvho gangoso gokulisiga-siga, twa hepa kupapara evyukiso lyaKarunga, nye pwa kara hena nokonda dononzi eyi twa hepera mavyukiso gendi. Vakriste ava ava hafere kukara vadike kuvhura va lizuvhe asi vanekoro novakaume kuna kuvakondjesa asi va kware. Vamwe kuvhura va hare kukwara nye kapi va gwana simpe mulikwali gouhunga. Vamwe va hepa mavyukiso omu nava liwapaikira koyitumbukira yokukara nturagumbo ndi mugolikadi. Vakriste navenye va kare asi vadike ndi va kwara va hepa kulikunga vene koyirugana yoruhonda.
2 Ukaro wangoso kuvhura kukundama ruhafo rwetu, nye unene po elikwatakano lyetu naJehova Karunga. Megaununo 7 lyombilive zendi zokuhova koVakolinte, Paurusa kwa geve mavyukiso kuhamena udike nononkwara. Sitambo sendi kwa here kukorangeda varesi vendi ‘va wapere kukara vakuhuki, va kerere Hompa va hana yipigauka.’ (1 Kol. 7:35) Mapukururo gendi kuhamena yuma oyo yomulyo kuvhura kukuvatera, age kwa here vadike nava va kwara va ruganese maukaro gawo monkedi zongwa zokukarera Jehova.
Etokoro lyenene ga hepa kutura po nkenye gumwe
3, 4. (a) Yisinke nayi vhura kuhoroka nsene vakaume ndi vanekoro kuna kusininika mudike a kware? (b) Ngapi omu epukururo lyaPaurusa nali vatera muntu a kare nomutaro gouhunga kononkwara?
3 Ngwendi Vajuda womouye wokuhova, sinzi sovantu naina kwa pura asi ya kara nomulyo unene kukwara. Nsene mudinkantu gomugara ndi gomukadi a pitakana nomvhura dongandi ga hana kukwara, vakaume novanekoro kuvhura va kare nosinka nokugazara asi va hepa kumupa ko mavyukiso gokuhamena kukwara. Kuvhura va mu tantere asi ga hepa kulitura mo unene mokupapara mulikwali. Awo kuvhura va mu pe ko magano asi muntu musinke ga hepa kukwara. Vamwe kuvhura va ture po mawapaiko gongandi yipo vadike vavali va ka ligwane. Pamwe mawapaiko gangoso kutwaredesa konomuga nokutezesa po ukaume nokukoresa malizuvho gava vana hamene mo.
4 Paurusa kapi ga sininikire vapeke va kare vadike ndi va kware. (1 Kol. 7:7) Age ya mu gwanenenene po mokukarera Jehova ga hana mukadi, nye ga fumadekere etokoro lyava wopeke lyokukwara. Vakriste vanaina va kara nononkondo dokutokora vene nsene asi kuvhura va kware ndi hawe. Vapeke kapisi va va sininike mokutura po etokoro lyongandi.
Omu nayi ku tompoka ngomudike
5, 6. Morwasinke Paurusa ga korangederere Vakriste mokukara vadike?
5 Nonkango daPaurusa koVakolinte kutuvatera tu kwate egano asi Mukriste gomudike kuvhura kukarera Jehova monkedi zongwa. (Resa 1 Vakolinte 7:8.) Nampili ngomu Paurusa ga dilire kukwara, age kapi ga limwene mwene asi age mulyo kupitakana wokukwara, ngwendi moomu ava yi rugana vampitisili vamwe wonongereka. Nye, age kwa fatwilire mauwa aga ava hafere vazuvhisi wovadike wombudi zongwa. Mauwa musinke ogo?
6 Mukriste gomudike kumanguruka mokutambura nkenye situmbukira mosirugana saJehova esi na dira nampo kuvhura kukara naso ogo ga kwara. Paurusa kwa gwene situmbukira sokulikarera ‘ngomupositoli govapagani.’ (Rom. 11:13) MoYirugana egaununo 13 dogoro 20, tatu resa yilimonena yaPaurusa apa ga zire novakwawo mosirugana soutumwa konomukunda donompe nokukatulisa po nombungakriste dononzi donompe. Mosirugana sendi, Paurusa kwa lididimikilire maudigu aga vana kuligwanekera nago naina wovasesu tupu. (2 Kol. 11:23-27, 32, 33) Nye elididimikiro lyendi lyokutulisa po varongwa kwa mu reterere ruhafo rorunene. (1 Tes. 1:2-7, 9; 2:19) Ngano Paurusa kwa kwere, ngano kapi nga vhulire kusikisa mo nayinye oyo.
7. Gava sihonena sava va ruganesere udike wawo mosirugana soUhompa.
7 Sinzi soVakriste wovadike kuruganesa ngesi ukaro wawo mokurugana unene mosirugana sokuzuvhisa. Sara naLimbania, vazuvhisi wokukarerera wovadike womoBolivia, kwa dirukilire komukunda oku va dira kuzuvhisira nomvhura dononzi. Momukunda ogo kapi mwa kere rutjeno. Awo kwa tente asi: “Mokumona asi kwato radio notivi, vantu kwa hara unene kuresa yifo.” Vamwe kwa likidire vazuvhisi owo yimbapiratjangwa yoNombangi daJehova eyi ngava resa eyi vana kudira kunduruka hena. Morwa nkenye embo eli ngava zi vantu ngava likida elituromo, kwa va gusire siruwo sosire mokumana mukunda ogo. Mukurukadi gumwe kwa va tanterere asi: “Uhura pepi una kara morwa Nombangi daJehova dina ya siki momukunda gwetu.” Vamwe kwa tamekere kuza komapongo.
8, 9. (a) Morwasinke Paurusa ga uyungilire asi ya wapa kukarera Jehova ngomudike? (b) Mauwa musinke ava gwana Vakriste wovadike?
8 Vakriste wokukwara nawo kwa kara noyitundwamo yoyiwa apa ava zuvhisire konomukunda oku ava dili kupurakena nawa. Nye yitumbukira yimwe eyi ava kara nayo vazuvhisi wokukarerera wovadike kuvhura kukara udigu kovalikwali ndi kwava va kara novanona. Apa Paurusa ga tjangerere konombungakriste, ga divire asi pana kara simpe hepero zokuzuvhisa mbudi zongwa. Age kwa harerere navenye va gwane ruhafo ngwendi yige. Eyi yiyo Paurusa ga uyungilire asi ya wapa mokukarera Jehova ngomudike.
9 Munazinyetukadi gomudike gomoAmerika kwa tjenge asi: “Vantu vamwe kugazara asi vadike kapi ava gwana ruhafo. Nye ame na yi dimburura asi kukara nelikwatakano naJehova kureta ruhafo rwene-rwene. Nampili ngomu udike kuna kara elizambero, awo uhwi wouwa nsene o u ruganesa monkedi zongwa.” Kombinga zokugwana ruhafo, age kwa tjenge asi: “Udike kapi au kondere muntu a dire kukara noruhafo, nye awo kuvhura kureta ruhafo rorunene. Ame na yi diva asi Jehova kwa hara nkenye ogu, a kare mudike ndi gokukwara.” Age ngesi kuna kukarera noruhafo mosirongo omu mwa kara hepero zonene zovazuvhisi woUhompa. Nsene o mudike, kuvhura o ruganese umanguruki woge mokuronga vapeke usili ndi? Nove kuvhura o dimburure asi udike kuna kara uhwi wouwa wokutunda kwaJehova.
Vadike ava vana hara kukwara
10, 11. Ngapi omu Jehova a vatere ava vana dili simpe kugwana mulikwali gouhunga?
10 Konyima zokukara vadike nomvhura dongandi, vakareli wovanzi vaJehova kutokora mokupapara mulikwali. Morwa va dimburura hepero zomavyukiso, awo kuhundira Jehova evatero yipo va gwane mulikwali gouhunga.
11 Nsene ono hara kukwara gumwe ogu a karere Jehova nomutjima gwendi nagunye, twikira kukanderera kwaJehova kuhamena yuma oyo. (Fil. 4:6, 7) Yi kare asi siruwo sokuhura kupi wa hepa kundindira, ya ha ku dompesa. Huguvara mwaKarunga gwetu geharo ngoMuvateli goge, ano age nga ku vatera o lididimikire ukaro woge.—Heb. 13:6.
12. Morwasinke Mukriste na konakonena nawa muntu ogu ana kumuheha?
12 Ngapi nsene gumwe ogu ga dira kukara nelikwatakano lyokupama naKarunga ndi muhapuli ta ku hehe? Nsene yi ku horokera oyo, diworoka asi kukora oku aku tundilire pokutura po etokoro lyedona mononkwara kureta ruguwo rorunene kupitakana mukuma ogu ngo lizuvhu apa wa kere mudike. Nsene ono kwara, li kare asi etokoro lyedona ndi lyewa, ayo ngayi kundama eparu lyoge nalinye. (1 Kol. 7:27) Wa ha tura po etokoro lyedona mokukwara eli ngo ka livera konyima.—Resa 1 Vakolinte 7:39.
Kuliwapaikira nonkwara
13-15. Maudigu musinke va hepa kuzogera valivandekeli komeho zokukakwara?
13 Nampili ngomu Paurusa ga tente asi ya wapa kukarera Jehova ngomudike, kapi ga tere wokukwara asi kwato mulyo. Nye age kwa here kuvatera valikwali va kwate egano eparu lyomononkwara nomu nava kara nelikwatakano lyokukarerera.
14 Valikwali vamwe va hepa kuwapukurura magano gawo. Apa va livandekere, kuvhura va gazare asi eharo lyawo kuna kara lyokulikarera ntani kapi ngava ligwanekera nomaudigu mononkwara. Awo kuza mononkwara nomalizuvho gangoso nokugazara asi kwato eyi ngayi zonagwisa po ruhafo rwawo. Magazaro gangoso kapisi usili. Kuligwanekera panyama kureta ruhafo, nye kapi ayi kohonona po maudigu gomononkwara.—Resa 1 Vakolinte 7:28.a
15 Konyima zononkwara, valikwali vamwe kuvatetukisa ndi kuvadompesa apa ava dili kuligwasana moyuma yimwe yomulyo. Pasihonena, awo kuvhura va dire kuligwasana omu nava ruganesa yimaliwa yawo nosiruwo soyilihafeso noku ngava ka tunga ntani rungapi ngava vhura kudingura vanekoro. Ntani nkenye ogu kwa kara nomapuko gendi aga naga vhura kuhandukisa mukwawo. Posiruwo selivandekero, awo kuvhura va gazare asi kwato hepero zokuuyunga kuhamena yuma oyo yomulyo, nye yangoso kuvhura kukareta maudigu mononkwara konyima sosiruwo. Ayo ya wapa kovalivandekeli va zogere yuma oyo komeho zokukakwara.
16. Morwasinke valikwali nava ligwasanena omu nava kohonona po maudigu?
16 Mokukara nononkwara doruhafo, valikwali va hepa kuligwasana omu nava pakera mbili yitumbukira yawo. Va hepa kuligwasana omu nava deura vana vawo nomu nava pakera mbili vakurona vawo wokukurupa. Valikwali va ha pulisira maudigu gemepata ga va gaunune. Pokutura pasirugana mapukururo gomoBibeli, awo ngava kohonona po maudigu gomanzi nokulididimika ntani nokukara kumwe noruhafo.—1 Kol. 7:10, 11.
17. Sinka musinke “seyi youzuni” na kara naso mulikwali?
17 Paurusa ga fatwilire yoyinzi kuhamena eparu lyomononkwara mo-1 Vakolinte 7:32-34. (Resa.) Valikwali “kwa kara nosinka seyi youzuni,” ngwendi nondya noyidwara nembo ntani nayimwe hena ngoso. Morwasinke? Pasihonena, apa munazinyetu ga kere mudike, nampo nga ruganesa siruwo sendi sosinzi moyirugana yokuzuvhisa. Nye konyima zokukwara, age ga hepa kuruganesa siruwo nononkondo dendi dimwe mokupakera mbili mukadendi nomu na za mukadendi komutjima. Mukadi nage ngosikwawo. Mounongo wendi, Jehova ga diva sihepwa oso. Age ga yi diva asi mokukara nononkwara dokuwapera, valikwali va hepa kuruganesa siruwo nononkondo dawo dimwe edi ngava ruganesa nare mosirugana sendi apa va kere simpe vadike.
18. Marunduruko musinke va hepa kutura po kuhamena koyilihafeso konyima zononkwara?
18 Kuvhura simpe tu lirongere ko yoyinzi. Nsene valikwali kugusa siruwo nononkondo dawo dimwe edi ngava ruganesa kosirugana saKarunga mokunkondopeka nonkwara dawo, kuvhura va rugane yokulifana nosiruwo nononkondo dawo edi ngava ruganesa nare moyilihafeso apa va kere vadike. Ngapi omu nayi kundama mukadi nsene yendi a lihameka unene momaudano novakaume vendi? Ndi ngapi na lizuvha mugara nsene mukadendi a ruganesa siruwo sosinzi kweyi ga hara novakaume vendi? Navenye kuvhura va lizuvhe mukuma nokudira ruhafo neharo. Eyi kuvhura kuyikandana po nsene valikwali va kondja unene mokunkondopeka elikwatakano lyomononkwara.—Efe. 5:31.
Jehova kwa tu harera tu kuhuke pamukaro
19, 20. (a) Morwasinke valikwali va hepera kulikunga vene koyirugana yoruhonda? (b) Siponga musinke sa kara po nsene valikwali va ligaunuka siruwo sosire?
19 Vakareli vaJehova kukondja mokukara vana kuhuka pamukaro. Vamwe kutokora kukwara yipo va nyokere po yirugana yokunyata. Nye, kukwara kapi kwa gwanena po mokulikunga koyirugana yoruhonda. Mosiruwo sanare, sitata somakuma gokupama ngasi popere vantu nsene tupu va kara monda zositata. Nsene muntu a pwaga ponze zositata oku ava gendagura vanamahaka novakorokotji, age kuvhura va mu vake ndi va mu dipage. Mokulifana, valikwali kugwana epopero koyirugana yoruhonda nsene tupu va kwaterera konoveta deligwanekero panyama edi ga tulisa po Muretesipo gononkwara, Jehova.
20 Paurusa kwa fatwilire noveta odo mo-1 Vakolinte 7:2-5. Mukadi gelike ga kara nononkondo dokuligwanekera panyama namugara gwendi, ano mugara nage ngosikwawo. Nkenye ogu ga hepa kugava kwamukwawo “yokumupa” kutanta asi eligwanekero panyama. Nsene valikwali va ligaunuka siruwo sosire morwa kwa gusa epwizumuko ndi yirugana yokoure nokuvhura si ‘kupa’ mukwawo eyi ya mu fira. Satana kuvhura kuruganesa mpito ozo mokuzonagura po nonkwara nokuvazeda va hondere. Jehova kutungika vanturagumbo ava ava pakere mbili mapata gawo nye va hana kutura nonkwara dawo mosiponga.—Epis. 37:25.
Limburukwa komapukururo goBibeli
21. (a) Morwasinke ya karera asi udigu kutura po matokoro gokukara mudike ndi kukwara? (b) Morwasinke mapukururo gomo-1 Vakolinte egaununo 7 ga karera nomulyo?
21 Matokoro kuhamena udike nononkwara kuna kara gamwe gomadigu unene na vhura kutura po muntu. Yi kare asi to tura po etokoro lyokukara mudike ndi lyokukwara, simpe ngo ligwanekera nomaudigu morwa kudira kusikilira mo. Nampili vantu ava a tungike Jehova kapi ava vhuru kuhenduka maudigu, va kare asi vadike ndi va kwara. Nsene o tura pasirugana mapukururo gomawa gomo-1 Vakolinte egaununo 7, ove ngo nyokera po maudigu gomanzi. Ngo hafesa Jehova, yi kare asi o mudike ndi wa kwara. (Resa 1 Vakolinte 7:37, 38.) Kukutambura Karunga alyo kuna kara etungiko lyenene meparu. Nehafero lyendi, ove ngo ka twikira kuhafera eparu mouzuni wendi woupe, omu mugara nomukadi ngava ka dira kukara hena nomakondjeso nomaudigu aga vana kara nago naina.
[Nondanda dokonhi]
Kuvhura o limburure ndi?
• Morwasinke natu dilira kusininika vadike va kware?
• Ngapi omu no ruganesa siruwo soge monkedi zongwa ngomukareli gwaJehova gomudike?
• Ngapi nava vhura ava vana kulivandekera kuliwapaikira maudigu gamwe mononkwara?
• Morwasinke valikwali va hepera kulikunga vene koyirugana yoruhonda?
[Mafano gepepenuno 14]
Vakriste wovadike ava ava ruganesa siruwo sawo mokutamununa sirugana sokuzuvhisa kugwana ruhafo
[Efano lyepepenuno 16]
Marunduruko musinke va hepa kutura po vamwe konyima zononkwara?