Egaununo 3
Nonsapi mbali edi adi ninkisa nonkwara di karerere
1, 2. (a) Siruwo sokuhura kupi ngano nonkwara da hepere kukara? (b) Ngapi ngano ya vhulika eyi?
APA Karunga ga tulire mugara nomukadi wokuhova mononkwara, kapi pwa kere elikido asi elikwatakano ngano ngali kara lyopokaruwogona tupu. Adamu naEva va hepere kukara kumwe narunye. (Genesis 2:24) Mpango zaKarunga kononkwara defumadeko kuna kara kugwanekedesa kumwe mugara gumwe nomukadi gumwe. Kuliza noMatjangwa, nokuvhura si kulizumba nokukakwara hena, ntudi nsene gumwe govalikwali kuna hondere.—Mateusa 5:32.
2 Ya vhulika kovantu vavali va paruke kumwe noruhafo posiruwo sosire sanarunye ndi? Yimo, ntani Bibeli za gava nonsapi mbali domulyo edi nadi va vatera mokuyisikisa mo. Mouvali wawo mugara nomukadi nsene va di ruganesa, ngava vhura kugwana ruhafo nomatungiko gomanzi. Nonsapi musinke edi?
NSAPI ZOKUHOVA
3. Maharo musinke gatatu va hepa kutunga po valikwali?
3 Nsapi zokuhova kuna kara eharo. Nye, kuliza noBibeli, pwa kara maharo gokulisiga-siga. Limwe kuna kara eharo eli lya kara pokatji kovakaume wovanene. (Johanesa 11:3) Ano limwe kuna kara eharo eli lya kara pokatji kava vemepata. (Varoma 12:10) Lyautatu kuna kara eharo eli lya kara pokatji komugara nomukadi. (Yisewe 5:15-20) Yimo, maharo nagenye aga va hepa kugatunga po mugara namukadendi. Nye pwa kara hena eharo lyaune ano alyo mulyo unene kupitakana gapeke.
4. Eharo musinke lyaune?
4 Meraka lyene-lyene lyoMatjangwa goRugereka goSikriste, eharo lyaune, nkango zalyo kuna kara asi agape. Nkango ozo kwa zi ruganesa mwa-1 Johanesa 4:8, omu vana kututantera asi: “Karunga yige eharo.” Yimo, “ose kwa hara vakwetetu, yeeyi Karunga yige ga hova kutuhara.” (1 Johanesa 4:19) Mukriste kutunga po eharo lyangoso pomuhowo kwaJehova Karunga ntani konyima kovakwawo. (Marukusa 12:29-31) Nkango agape kwa zi ruganesa hena moVaefeso 5:2, omu va tanta asi: “Omu lihara-hare, moomu ga tu here Kristusa, yiyo ga tu ligavera mwene.” Jesus ga uyungire asi eharo eli yilyo ngali nongwenesa vasikuli vendi wousili: “Nsene mu lihara-hara [agape], yipo ngava divira vantu asi one sili varongwa vange.” (Johanesa 13:35) Koneka hena omu va ruganesa agape mo-1 Vakolinte 13:13: “Ano eyi ya kererera po yeyi, epuro nehuguvaro neharo—eyi yitatu, nye sosinene po pweyi eharo [agape].”
5, 6. (a) Morwasinke eharo lya pitakanena epuro nehuguvaro? (b) Ngapi omu eharo nali vatera mokuninka nonkwara di karerere?
5 Yisinke ayi ninkisa eharo lyoagape li pitakane epuro nehuguvaro? Alyo kuligendesa ndi kulipangera nompango douhunga domoNonkango daKarunga. (Episarome 119:105) Alyo eharo lyokuruganena vapeke youhunga kosipara saKarunga, yi kare asi ogu ono kuyiruganena ya mu fire ndi hawe. Eharo lyangoso kuninkisa valikwali va kwame epukururo eli lyomoBibeli: “Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa.” (Vakorosi 3:13) Valikwali wokulihara kwa kara ntani kutunga po ‘eharo [agape] lyenene lya hara mukweni a ku hare, yeeyi eharo kudongwenesa po nonzo dononzi.’ (1 Peturusa 4:8) Koneka asi eharo kudongwenesa po mapuko. Kapi ayi tanta asi kapi ngapa kara mapuko, yeeyi asi kwato muntu gokudira kusikilira mo na dira kuzona.—Episarome 130:3, 4; Jakopo 3:2.
6 Apa ava likida valikwali eharo lyangoso kwaKarunga ntani kwavene-navene, nonkwara dawo ngadi kara doruhafo nokukarerera, morwa “eharo kapi ali haga.” (1 Vakolinte 13:8) Eharo kukwata nayinye kumwe ‘momalikwatakano gene-gene.’ (Vakorosi 3:14) Nsene wa kwara, ngapi nove nomulikwali goge nomu vhura kulikida eharo eli? Reseni kumwe Nonkango daKarunga ntani nokudizogera. Lirongeni omu ga likidire Jesus eharo ntani hetekereni ko kumutemwinina, mokugazara nokurugana ngwendi yige. Kugwederera ko, kuza komapongo goSikriste, oku ava rongo Nonkango daKarunga. Ano kanderereni kevatero lyaKarunga mu tunge po eharo eli lyokuzeruka eli lya kara hena siyimwa sompepo zokupongoka zaKarunga.—Yisewe 3:5, 6; Johanesa 17:3; Vagarata 5:22; Vahebeli 10:24, 25.
NSAPI ZAUVALI
7. Yinke ayi tanta kufumadeka muntu, ntani yilye ngano na likida efumadeko mononkwara?
7 Nsene valikwali va lihara sili, awo ngava lifumadeka hena, ano efumadeko kuna kara nsapi zauvali zokureta ruhafo mononkwara. Nonkango daKarunga kupukurura Vakriste navenye, kukwatera mo vagara novakadi asi: “Omu gave sihonena sokulifumadeka-fumadeka.” (Varoma 12:10) Mupositoli Peturusa kwa tjenge asi: “Vagara, omu kare nonondunge novakadi veni, mu dive asi awo vantu va pira nonkondo, mu va fumadeke.” (1 Peturusa 3:7) Ano mukadi kuna kumupukurura asi “a fumadeke yendi.” (Vaefeso 5:33) Kufumadeka muntu kutanta asi kukara nombili nage, kufumadeka untu nomagano gendi, nokuliwapaikira kusikisa mo nkenye eyi ana ku hundira ya zira mo.
8-10. Ngapi omu nali vatera efumadeko mokuninka malikwatakano gononkwara ga kare goruhafo gokukarerera?
8 Owo vana hara kukara nononkwara doruhafo kulikida efumadeko kovalikwali vawo ‘pokudira tupu kulipakera mbili nyamwawo, nye kupakera hena valikwali vawo mbili.’ (Vafilipi 2:4) Kapi ava liharere tupu uwa wanyamwawo. Nye, awo kupakera hena mbili mauwa govalikwali vawo. Awo kutura muhowo mauwa govalikwali vawo.
9 Efumadeko ngali vatera valikwali mokumona nokutambura malisigo gomagano. Vantu vavali nokuvhura si kukara nomagano gokulifana mwanayinye. Eyi nayi vhura kumoneka mulyo komugara, komukadi kuvhura yi moneke asi kwato mulyo, ntani eyi ga hara mukadi kapisi yiyo walye ga hara mugara. Nye nkenye gumwe ga hepa kufumadeka magano nomatokoro gamukwawo, sinene tupu kuliza nonompango nomagano gaJehova. (1 Peturusa 2:16; hetakanesa Firemoni 14.) Kugwederera ko, nkenye ogu ga hepa kufumadeka untu wamukwawo pokudira kumusensa ndi kumuswawisisa moyitarameho ndi pwavelike.
10 Yimo, eharo kwaKarunga neli lyavene-navene ntani nefumadeko ado kuna kara nonsapi mbali domulyo kononkwara dokuwapera. Nye, ngapi omu nava vhura kudiruganesa mononkwara?
KUHONENA UPANGELI WAKRISTUSA
11. Kuliza noBibeli, yilye mupangeli mononkwara?
11 Bibeli kututantera asi mugara kwa mu ungire noyikara eyi ngano ngayi mu ninkisa a kare mupangeli gepata gomuwa. Yipo nye, kosipara saJehova mugara ga kara nositumbukira kuhamena ukalinawa wopampepo ntani wopanyama wamukadendi novana vendi. Age ga hepa kutura po matokoro gomawa mokuliza nompango zaJehova ntani nokukara sihonena sosiwa sonkareso zoSikriste. “Vakadi, omu zuvhe vagara veni moomu omu zuvhu Hompa. Yeeyi mugara yige mupangeli gomukadi, moomu ga kara Kristusa mutwe, kuninka asi mupangeli gongereka.” (Vaefeso 5:22, 23) Yimo, mukadikwara kapi hena ana kara mepangero lyovakurona vendi. Mugara ta kara mupangeli gwendi, ano age ga hepa kulimburukwa kwendi. Nampili ngoso, Bibeli kuuyunga asi mugara nage ga kara nomupangeli gwendi. Mupositoli Paurusa kwa tjenge asi: “Ame kuna mu harere mu kwate egano lyeyi asi, Kristusa yige mupangeli gwankenye mugara, mugara mupangeli gomukadi, ano Karunga yige mupangeli gwaKristusa.” (1 Vakolinte 11:3) Mugara gonondunge kulironga omu na ruganesa upangeli pokutemwinina mupangeli gwendi, Jesus Kristusa.
12. Sihonena musinke sosiwa ga tulire po Jesus sokulikida ulimburukwi ntani nokuruganesa upangeli?
12 Jesus nage ga kara nomupangeli, Jehova, ntani age kumulimburukwa monaruwa. Jesus kwa uyungire asi: “Kapi ani kwama mpango zanyamwange, nye mpango zaTate ogu ga tuma nge.” (Johanesa 5:30) Eh, sihonena musi sosiwa! Jesus age “mbeli, muhoverera goyisitwa nayinye.” (Vakorosi 1:15) Age ga ya kere Mesiyasa. Ga divire asi ngava mu horowora a kare Mutwe gombungakriste zovagwavekwa ntani Hompa goUhompa waKarunga, kupitakana vaengeli navenye. (Vafilipi 2:9-11; Vahebeli 1:4) Nampili ngoso, apa ga kere Jesus pevhu, kapi ga kere noukenya ndi noukukutu ndi gokupangera kupitakanena. Kapi ga kere mupangeli gonyanya, gokudiworokesa nkenye apa varongwa vendi asi va hepa kumulimburukwa. Jesus kwa kere neharo nonkenda, unene po kovanaruhepo. Ga uyungire asi: “Wizeni kwange namuvenye, one ava wa rorora udigu, ni ya mu pwizumukise. Likambekeni ndjoko zange, mu lirongere nge po, yeeyi ame kwa gomoka, yiyo na linunupika momutjima, ngomu gwane rufuwo monomwenyo deni. Yeeyi ndjoko zange nderu, ano mudigo gwange kwa pepuka.” (Mateusa 11:28-30) Ya kere uwaawa kukara kumwe nendi.
13, 14. Mokutemwinina Jesus, ngapi omu mugara geharo na ruganesa upangeli wendi?
13 Mugara ogu ana hara kukara nepata lyoruhafo ga hepa kutarurura yikara yoyiwa yaJesus. Mugara gomuwa kapi a kara noukenya ndi mupangeli gonyanya, mokuruganesa mepuko upangeli wendi a hepeke mukadendi. Nye, age kumuhara nokumufumadeka. Jesus ‘kwa linunupikire momutjima,’ ano mugara ga kara nokonda zonene mokuyirugana, morwa age kutura mapuko, kapisi ngwendi Jesus. Apa a lipuka, age kundindira mukadendi mokumulikida mbili. Yipo nye, nampili yi kare udigu, mugara gokulinunupika kutambura mapuko gendi, nokuuyunga asi: “Kani lipukire, gusira nge po.” Tayi rerupire mukadi mokufumadeka upangeli womugara gokulinunupika gomugomoki kupitakana mugara gokulinenepeka gondino. Ano mukadi ogu ga kara nefumadeko, nage kuhundira egusiropo nsene ana lipuka.
14 Karunga kwa ungire mukadi noyikara yoyiwa eyi na vhura kuruganesa mokugwederera koruhafo rononkwara. Mugara gonondunge kuyinongonona ntani kapi ta kondere mukadendi mokuyiruganesa. Sinzi sovakadi kulikida nokudimburura usimbu malizuvho gava wopeke ntani kwa kara nonkenda, yikara eyi ya hepa po mokufira sinka epata ntani eyi ayi pameke malikwatakano govantu. Rorunzi, mukadi ga diva nawa mokuninka embo lyawo li kare evango lyewa lyokutunga. “Mukadi-kadi” ogu va singonona moYisewe egaununo 31 kwa kere noyikara yoyiwa noudivi, ntani epata lyendi kwa gwanenene mo uwa mwayo. Morwasinke? Morwa mutjima gwayendi “gwa mu huguvara.”—Yisewe 31:10, 11.
15. Ngapi omu mugara na likida eharo nefumadeko kwamukadendi ngwendi Kristusa?
15 Monompo dimwe, upangeli womugara kuupameka kupitakanena, yipo nye asi nampili pokumupura epuro kuyitara asi kudira efumadeko. Mugara kuvhura a tekure mukadendi ngwendi mupika. Kuruganesa upangeli wangoso mepuko kukaretesa po maliwatakano gomadona kapisi namukadendi tupu nye naKarunga. (Hetakanesa 1 Johanesa 4:20, 21.) Ano vagara vamwe kuncenuna mokupitisira, kusigilira vakadi vawo va pangere embo. Mugara ogu a limburukwa monaruwa kwaKristusa, kapi a hepeke mukadendi ndi a mu guse mfumwa zendi. Nye, age kutemwinina eharo lyaJesus lyokulizambera ntani nokurugana ngamoomu ga pukwilire Paurusa asi: “Vagara, omu hare vakadi veni, moomu ga hara Kristusa ngereka, yiyo ga lizumbilira mwarwazo monomfa.” (Vaefeso 5:25) Jesus Kristusa kwa here vasikuli vendi unene dogoro ga va fililire. Mugara gomuwa nga hetekera ko kutemwinina nkareso zangoso, kupapara uwa wamukadendi, kupitakana tupu mokumupangera. Apa mugara a limburukwa kwaKristusa ntani nokulikida eharo nefumadeko ngwendi Kristusa, mukadendi ngayi mu tumangeda mokumulimburukwa.—Vaefeso 5:28, 29, 33.
ULIMBURUKWI WOMUKADI
16. Yikara musinke na likida mukadi melikwatakano kumwe nayendi?
16 Konyima zokumuunga Adamu, “HOMPA Karunga makura ta ninki asi: ‘Kapisi nawa asi muntu a kare gelike. Tani mu ruganene ko gokumuhamena, mukwafi gwendi.’” (Genesis 2:18) Karunga kwa ungire Eva ‘ngomuhameni’ kapisi ngomurumbasani. Nonkwara kapi da kere ngwendi wato novadugi vavali, nkenye gumwe kuna hara kuza nzira zamwene. Mugara ga hepa kuruganesa upangeli weharo, ntani mukadi ga hepa kulikida eharo nefumadeko ntani elimburuko lyokomutjima.
17, 18. Mononkedi musinke dimwe omu na vhura mukadi kukara mukwafi gomuwa gwayendi?
17 Nampili ngoso, mukadi gomuwa ga pitakana tupu kukara noulimburukwi. Age kuhetekera ko kukara mukwafi gomuwa, mokukwatesa ko matokoro aga a tura po yendi. Nye nampili ga lilimbe nomagano gendi, age kapi nga dukira kovakondi vendi. Nye, nga kwatesa ko etokoro lyayendi yipo yi ka kare yitundwamo yokuwapera.
18 Mukadi kuvhura kuvatera mugara gwendi a kare mupangeli gomuwa mononkedi dapeke. Kuvhura a likide rupandu kelituromo lyayendi mokupitisira, mevango lyokumutangwisa ndi kuninka yendi a lizuvhe asi kapi a mu hafesa. Pokuruganena kumwe nayendi monkedi zongwa, ga hepa kudiworoka asi ‘mpepo za tenda zombili yizo za fumana po kosipara saKarunga,’ kapisi kosipara sayendi tupu. (1 Peturusa 3:3, 4; Vakorosi 3:12) Ngapi nsene mugara muhapuli? A kare asi mupuli ndi hawe, Matjangwa kukorangeda vakadi ‘va hare vagara vawo novana vawo. Va kare vakuhuki, va kare vagolikadizuni. Awo ava zuvhe yovagara vawo, nonkango daKarunga neisi va di swaura.’ (Titusa 2:4, 5) Nsene mukadi a nyoka kurugana yuma yongandi morwa ezwi lyendi lyokomutjima, mugara gomuhapuli kuvhura a fumadeke etokoro lyamukadendi nsene kuna li gava “nombili nefumadeko.” Vagara vamwe wovahapuli kwa ‘va tezwilisa po yikara yovakadi vawo, awo va hana kuuyunga, nsene va mona ukuhuki netjirokarunga lyawo.’—1 Peturusa 3:1, 2, 15, 16; 1 Vakolinte 7:13-16.
19. Ngapi nsene mugara a pura mukadendi a teze po veta zaKarunga?
19 Ngapi nsene mugara a pura mukadendi a rugane eyi ga silika Karunga? Nsene yi horoka oyo, mukadi ga hepa kudiworoka asi Karunga yige Mupangeli gwendi gomunene. Ta kwama sihonena seyi va rugene vapositoli apa vapangeli va va pulire mokuteza po veta zaKarunga. Yirugana 5:29 kutanta asi: “Peturusa novapositoli vakwawo tava limburura asi: ‘Ose twa hepa po kulimburukwa unene Karunga, kupitakana vantu.’”
EUYUNGOKUMWE LYEWA
20. Moruha musinke romononkwara omu nava vhura kuruganesa eharo nefumadeko?
20 Euyungokumwe kuna kara hena ruha rumwe romulyo romononkwara omu nava vhura kuruganesa eharo nefumadeko. Mugara geharo nga zogera namukadendi kuhamena yirugana nomaudigu nomagano gamukadendi moyininke yokulisiga. Mukadi ga yi hepa eyi. Mugara ogu a litulire po siruwo mokuuyunga kumwe namukadendi ntani nokupurakena nawa eyi ana kuuyunga kulikida eharo nefumadeko kwamukadendi. (Jakopo 1:19) Vakadi vamwe kusivana asi vagara vawo kapi ava zogere nawo. Olyo eguwo. Yimo, mosiruwo esi soyiviyauka, vagara kuvhura kurugana novili dononzi koyirugana ntani maukaro goyikweparu kuninkisa vakadi vamwe va rugane nawo. Nye valikwali va hepa kulitulira po siruwo mokukara kumwe. Mokudira kuyirugana, awo ngava likara ure vene-navene. Eyi kuvhura kutumangeda gumwe a papare ukaume ponze zononkwara nokutwaredera komaudigu gomanene.
21. Ngapi omu ruuyungo roruwa aru vatere mokuninka nonkwara di kare dehafo?
21 Monkedi omu vakadi novagara ava uyunga kumwe mulyo unene. ‘Nonkango dombili nontovara mokumakera, ado nongwa kekanguko lyoge.’ (Yisewe 16:24) Yi kare asi mulikwali goge mupuli ndi hawe, epukururo eli lyoBibeli kwa fira navenye: “Nonkango deni adi kare nkenye apa donongwa donontovara domungwa.” (Vakorosi 4:6) Nsene mulikwali goge ezuva olyo kapi yina mu gendi po nawa, nonkango donongwa komulikwali goge kuvhura kumuvatera. “Nonkango edi vana uyunga nawa, kwa fana ngwendi siapere songorodo esi vana tura posiyaha sokulimbagura sosisiliveli.” (Yisewe 25:11) Muhagaro gezwi ntani nononkango edi no ruganesa mulyo unene. Pasihonena, monkedi zehandu zokupangera, muntu kuvhura a tantere mukwawo asi: “Zedira evero!” Hansa o uyunge nonkango “donontovara domungwa,” pokuuyunga monkedi zokulitura nemezwi lyokugomoka asi: “Kuvhura o zedire evero ndi?”
22. Nkareso musinke va hepa kukara nazo valikwali yipo va tulise po euyungokumwe lyewa?
22 Euyungokumwe lyewa kutompoka apa nonkango donongwa ava di uyunga. Omu yipara yetu ayi moneka ntani nomu atu ruganesa mawoko getu apa atu uyunga, yi likide nkareso zombili. Pokurugana unene mokutulisa po euyugokumwe lyewa, mouvali wawo mugara nomukadi ngava lizuvha emanguruko mokuuyunga yihepwa yawo, ntani awo ngava likorangeda nokulivatera moyiruwo yeguwo ndi yomaudigu. Nonkango daKarunga kukorangeda asi: ‘Omu korangede wompwagetjima.’ (1 Vatesaronika 5:14) Ngapa kara po yiruwo apa mugara nga guva ntani yiruwo eyi mukadi nage nga guva. Awo kuvhura ‘kulikorangeda,’ kulitunga vene-navene.—Varoma 15:2.
23, 24. Ngapi omu eharo nefumadeko nayi vatera nsene pana kara madiro kulizuvha? Gava sihonena.
23 Valikwali wokulikida eharo nefumadeko kapi ngava mona nkenye kudira kulizuvha ngoudigu wounene. Awo ngava kondja mokudira ‘kulipakera nyanya.’ (Vakorosi 3:19) Mouvali wawo va hepa kudiworoka asi “elimbururo lyombili, kumweneka ehandu.” (Yisewe 15:1) Wa ha sensa ndi o nyokere mulikwali goge nsene ta ku tantere malizuvho gendi. Nye, ga mona asi azo mpito mokudiva eyi a gazara mukweni. Mouvali weni, hetekereni ko kukohonona po kudira kulizuvha yipo mu lizasane.
24 Diworoka posiruwo simwe apa Sara ga tanterere mugara gwendi omu nava kohonona po udigu umwe ntani ayo kapi ya lizire nomalizuvho gaAbirahamu. Nye, Karunga ga tanterere Abirahamu asi: “Nkenye eyi na ku tantera Sara, yi rugana.” (Genesis 21:9-12) Abirahamu ga yi rugene ntani va mu tungikire. Mokulifana, komeho zokutura po etokoro, mugara ga hepa kupurakena tanko komagano gamukadendi, nampili ga lisige naga gendi. Ano, mukadi kapisi gelike tupu na uyunga nye nage ga hepa kupurakena eyi ana kuuyunga mugara gwendi. (Yisewe 25:24) Azo kapisi nkedi zeharo ntani zefumadeko komugara ndi komukadi ogu ga hara asi nkenye apa yininke va yi rugane moomu ga yi harera.
25. Ngapi omu euyungokumwe lyewa nali gwederera koruhafo peligwanekero panyama?
25 Euyungokumwe lyewa mulyo hena meligwanekero panyama lyovalikwali. Eharo lyokulihafesa tupu nyamoge nokudira kulipangera kuvhura kuzonagwisa po sininke esi sokulikerera mononkwara. Kuuyunga kumwe nemanguruko nokulikida edidimiko mulyo. Nsene nkenye gumwe ta litura mo mokuhafesa mulikwali gwendi, kapisi nyamwendi, eligwanekero panyama kapi ngali kara udigu wounene. Moyuma eyi neyi yapeke, “pwa ha kara ogu a kondjere uwa wamwene, nye a kondjere wamukwawo ntani.”—1 Vakolinte 7:3-5; 10:24.
26. Nampili ngomu nkenye nonkwara ngadi kara nomauwa nomaudona gado, ngapi omu kupurakena koNonkango daKarunga nayi vatera valikwali mokugwana ruhafo?
26 Eh, mapukururo musi adi gava Nonkango daKarunga! Yimo, nkenye nonkwara ngadi kara nomauwa nomaudona gado. Nye apa valikwali ava limburukwa komagano gaJehova, moomu va ga horora moBibeli, ntani nokutateka elikwatakano lyawo meharo eli agape nemefumadeko, kuvhura va kare nehuguvaro asi nonkwara dawo ngadi kara doruhafo dokukarerera. Awo kapi ngava lifumadeka tupu vene-navene nye hena nogu ga tulisa po nonkwara, Jehova Karunga.
NGAPI OMU NOMPANGO EDI DOBIBELI NADI VHURA KUVATERA VALIKWALI MOKUKARA NONONKWARA DORUHAFO DOKUKARERERA?
Vakriste wousili va lihara-hara.—Johanesa 13:35.
Vakriste va liwapaikira mokuligusira-gusira po.—Vakorosi 3:13.
Pwa kara ewapaiko lyouhunga kuhamena upangeli.—1 Vakolinte 11:3.
Ya kara nomulyo mokuuyunga yininke ya wapa monkedi zongwa.—Yisewe 25:11.
[Efano pepenuno 28]
Eharo nefumadeko kutwaredesa nonkwara di ka wapere