Omu sa tu zowora sizoweseso
“Ogu a pura Muna, kukara nomwenyo gwanarunye. Nye ogu a dili kuzuvha Muna, kapi a kara nomwenyo, age ehandu lyaKarunga ali mu kerere.”—JOH. 3:36.
1, 2. Konda musinke zeyi va zi ndurukilire Zion Watch Tower?
SIRONGWA simwe somoRuhungu romokwedi kwaSikukutu 1879 kwa tente asi: “Nsene muntu a lironga nawa Bibeli, age nga mona mulyo gonomfa daKristusa.” Sirongwa oso kwa hulisire nononkango edi domulyo asi: “Twa hepa kunyokera po nkenye eyi ayi likida asi nomfa daKristusa kapisi nzambo ndi egusopo lyononzo.”—Resa 1 Johanesa 2:1, 2.
2 Konda zeyi va zi ndurukilire Zion Watch Tower moPembankuru 1879 kwa kere mokupopera erongo lyoBibeli lyosizoweseso. Eyi va tjenge mo kwa geve “nondya posiruwo sado,” morwa kehagero lyomvhura 1800 wovanzi ava ngava lininkisa asi Vakriste kwa tamekere kusinganyeka asi nomfa daJesus kapisi sizoweseso sononzo detu. (Mat. 24:45) Posiruwo sina, wovanzi kwa tamekere kupura merongo lyelisinto, egano eli ali li rwanesa nousili ou asi muntu kapi ga sikilira mo. Ava va pura melisinto kuronga asi vantu kurunduruka pwavene, ano awo kapi va hepa sizoweseso. Mupositoli Paurusa kwa pukurwire Timoteusa asi: “O takamese eyi va ku huguvarera. O likare ure noyiuyunga yokunyata ya hana mulyo nonompata dougova ou ava tumbura vamwe mepuko asi awo nondunge po. Vamwe va u tambura, makura yiyo wa va zumbanesesa epuro.”—1 Tim. 6:20, 21.
3. Mapuro musinke natu ka konakona?
3 Yosili, ove ono tokomene mokudira ‘kuzumba epuro.’ Mokunkondopeka epuro lyoge, ayo ngano nayi wapa o konakone mapuro aga: Morwasinke na hepera sizoweseso? Yisinke ya hepere po mokusigava? Ngapi omu nani vhura kugwanena mo uwa mewapaiko eli lyewa lyokuparura nge mehandu lyaKarunga?
Kuparuka ehandu lyaKarunga
4, 5. Yisinke ayi likida asi ehandu lyaKarunga kwa kara mouzuni ou woudona?
4 Bibeli ntani nehistoli lyovantu kulikida asi kutundilira tupu apa ga zonene Adamu, ehandu lyaKarunga ‘kwa kara’ povantu. (Joh. 3:36) Eyi kuyimonenena mousili ou asi kwato muntu ogu a vhuru kuhenduka nomfa. Upangeli waSatana kapi wa yi tompoka mokupopera vantu komaudigu gankenye ezuva ntani kwato epangero lyomuntu lya vhura kusikisa mo yihepwa yovantu valyo. (1 Joh. 5:19) Yipo nye vantu vana kuhepera simpe koyita nokoukorokotji ntani nokoruhepo.
5 Yosili, Jehova kapi nga tungika uzuni ou woudona. Paurusa kwa uyungire asi: “Ehandu lyenene lyaKarunga ngali tunda keguru li gwane udinikarunga naunye.” (Rom. 1:18-20) Yipo nye, vadinikarunga kapi ngava henduka yitundwamo yonkareso zawo. Naina, Ehandu lyaKarunga kuna kulidivisa kupitira monombudi dompanguro edi vana kutjisa ngwendi uvera mouzuni waSatana, ano nombudi dangoso kumoneka moyimbapiratjangwa yetu yoBibeli.—Ehor. 16:1.
6, 7. Sirugana musinke vana kupitisira Vakriste wovagwavekwa, ntani mpito musinke simpe zina zegurukire nkenye gumwe ogu ana kara ruha rouzuni waSatana?
6 Eyi ngesi kutanta nye asi kwato eyi natu vhura kurugana ko mokumanguruka mo mepangero lyaSatana yipo a tu hafere Karunga ndi? Hawe, morwa simpe mpito zina tu zegurukire mokulikwatakana naJehova. Vakriste wovagwavekwa, “vatumwa vaKristusa” awo kuna kulitura mo unene mepitisiro lyoyirugana yokuzuvhisa omu vantu wonomuhoko nadinye vana kuvazigida va ‘likwatakane naKarunga.’—2 Kol. 5:20, 21.
7 Mupositoli Paurusa kwa tente asi Jesus ‘nga ya tu zowora kehandu lyaKarunga, eli ngali wiza.’ (1 Tes. 1:10) Ehandu olyo lyaJehova lyokuhulilira ngali retera ezonauko lyanarunye kovananzo wokudira kulitezurura. (2 Tes. 1:6-9) Wolye ngava lihenduka? Bibeli kutanta asi: “Ogu a pura Muna, kukara nomwenyo gwanarunye. Nye ogu a dili kuzuvha Muna, kapi a kara nomwenyo, age ehandu lyaKarunga ali mu kerere.” (Joh. 3:36) Yosili, navenye ava vana kuparuka ngesi nokulikida epuro mwaJesus nomosizoweseso, awo ngava henduka ezuva lyehandu lyaKarunga lyokuhulilira apa nga zonagura po uzuni ou.
Omu sa kara sizoweseso
8. (a) Ehuguvaro musinke va kere nalyo oAdamu naEva? (b) Ngapi omu Jehova ga yi likida asi age Karunga gomuhungami?
8 OAdamu naEva kwa va ungire ngovantu wokusikilira mo. Ngano va kere ngorooro noulimburukwi kwaKarunga, ngesi awo ngano kuna kuparuka noruhafo kumwe noruvharo rwawo pevhu moParadisa. Nampili ngoso, vakurona vetu wokuhova kwa tezere po veta zaKarunga mowina. Ngoyitundwamo, awo kwa va pangwilire konomfa danarunye ntani nokuvatjida mo moParadisa zokuhova. Komeho oAdamu naEva va ya kare novana, nzo azo nare zina kundama vantu, ano awo va tamekere kukurupa nokuyafa. Eyi kwa likida asi nonkango daJehova usili. Mokugwederera ko, age Karunga gomuhungami. Jehova ga rondwere nare Adamu asi nsene a lya kositji sokusilika ngano nga fa, nye age ga lire ko.
9, 10. (a) Morwasinke ruvharo rwaAdamu aru fire? (b) Ngapi omu natu vhura kuhenduka nomfa danarunye?
9 Ngoruvharo rwaAdamu, ose twa pinga rutu rokudira kusikilira mo oru aru tu twaredesa konzo nokonomfa. Apa ga zonene Adamu, ose ngwendi kwa kere mevha lyendi. Yipo nye, nose za tu kundama mpanguro zonomfa. Ngano Jehova ga gusa po nomfa pwa hana mfuto zosizoweseso, age ngano kapi ga sikisa mo nonkango dendi. Paurusa kwa tu kwatera mo natuvenye apa ga uyungire asi: “Twa diva asi Veta zopaMpepo, nye ame ni muntu tupu gokufa, kwa randesa nge ni kare mupika gononzo. Oru ruhepo rwange ame muntu ame rureru oru! Yilye ogu nga yoworora nge mo morutu oru rokutwara nge konomfa?”—Rom. 7:14, 24.
10 Jehova Karunga gelike gokuvhura kutokora nsene asi kuvhura a tu dongwenene po nonzo detu ntani nokutumangurura konomfa danarunye. Age kwa yi rugene pokutuma Munwendi ogu ga hara a tunde meguru nokuyamuhampuruka ngomuntu gokusikilira mo, aya gave mwenyo gwendi ngosizoweseso mwarwetu. Jesus kwa kere ngorooro gokusikilira mo, kapisi ngwendi Adamu. Yosili Jesus “kapi ga tulire nzo.” (1 Pet. 2:22) Jesus ya mu vhulikire mokukara guhya govantu wokusikilira mo. Nye mevango lyoyo, age ga sigililire nonkore daKarunga di mu dipage yipo a vhure kuzowora ruvharo rononzo rwaAdamu ntani nokuninkisa ava ava likida epuro mwendi va ka gwane mwenyo gwanarunye. Matjangwa kufaturura asi: ‘Karunga gumwe tupu, ano ogu a gwanekedesa Karunga novantu, nage gumwe tupu, age muntu, Jesus Kristusa, ogu ga ligava mwene, a kare sizoweso sokuzowora vantu navenye.’—1 Tim. 2:5.
11. (a) Ngapi omu natu ga fanekesa mauwa gosizoweseso? (b) Mauwa musinke ga kara mo mosizoweseso?
11 Sizoweseso kuvhura kusifanekesa kovantu ava va pungwisa yimaliwa yawo mombanga yiyo va yi va vaka makura tava kara nomakongo. Venyambanga tava va tomene nomvhura dononzi modorongo. Nye ngapi kuhamena vantu vena va pungwisa mo yimaliwa? Konyima zokuyakara moruhepo, awo kwato oku nava vhura kuvyuka ntudi muntu gumwe gonkenda gongawo ta gusa mbanga ozo a zi gendese nokutengwidira po yimaliwa nayinye yovantu owo, ntani nokuvazowora mo momakongo. Mokulifana, Jehova Karunga naMunwendi ogu ga hara kwa randa ruvharo rwaAdamu nokudongonona po nonzo dawo kupitira metjisango lyohonde zaJesus. Eyi yiyo ga uyungire Johanesa Mukuhwi kuhamena Jesus asi: “Tareni, Nzwigona zaKarunga ezi azi gusa po nonzo douzuni.” (Joh. 1:29) Nonzo douzuni edi va gusa po kapi tupu da kwatera mo dovanamwenyo nye hena nedi dovafe.
Eyi ya hepere po mokugava sizoweseso
12, 13. Yisinke natu lirongera ko keharo lyaAbirahamu lyokuzamba Isaka?
12 Ayo udigu unene kwetu mokuyikwata egano eyi Guhyetu gemeguru ntani naMunwendi va hepere kurugana mokutuzowora. Nye, mwa kara sihorokwa moBibeli esi nasi tu vatera tu yi kwate nawa egano. Pasihonena, gazadara tupu omu ga lizuvhire Abirahamu apa ga zire rugendo romazuva gatatu koMoliya mokulimburukwa kompangera zaKarunga ezi asi: “Gusa munoge Isaka, empogwe lyoge, ogu wa hara, o ze kosirongo saMoliya o ka mu gave nzambo zeswakerero kondundu zimwe ezi ngani ku likida.”—Gen. 22:2-4.
13 Konyima Abirahamu ga ka sikire kevango eli va mu likidire. Gazara tupu kukora oku ga kere nako Abirahamu apa ga menge mawoko nomaguru gaIsaka nokumutura posizambero esi ga rugene mwene. Ee, kukora musi ga kere nako Abirahamu pokuzerura mbere ezi nkare a dipagese munwendi! Gazadara tupu omu ga lizuvhire Isaka ngomu ga rere posizambero nokundindira kukora kombere zontwe oku nkare ku mu twaredese konomfa. Poopo tupu muengeli gwaJehova ta hagekesa Abirahamu. Eyi va rugene oAbirahamu naIsaka posihorokwa oso kutuvatera tu kwate egano kweyi ya hepere po kwaJehova mokupulisira vantu vaSatana va dipage Munwendi. Eruganeno kumwe lyaIsaka naAbirahamu kwa fanekesere eharo lyaJesus lyokulididimikira kukora ntani nokutufira.—Heb. 11:17-19.
14. Yisinke eyi ya horokerere Jakopo nayi vhura kutuvatera tu kwate egano eyi ya hepere po mokugava sizoweseso?
14 Eyi ya hepere po mokugava sizoweseso kuvhura hena kuyifanekesa kweyi ya horokerere Jakopo. Povana vendi navenye, age kwa here po unene Josefa. Nye, vakuru vaJosefa kwa mu fililire mfudu ntani nokumunyenga. Nampili ngoso, Josefa ga kere neharo lyokumutuma oguhwe a ka tare omu va kererere vakuru vendi. Awo kwa ka kungire siunda saguhyawo nokilometa konyara 100 koMuzogo gwembo lyawo moHeburoni. Gazadara tupu omu ga lizuvhire Jakopo apa vana vendi va mu reterere erwakani lyaJosefa alyo lina gehe honde! Age kwa zigilire asi: “Erwakani lyamunwange! Sikasama sa mu lya! Ga likana, ani nda Josefa ga likana!” Nayinye oyo kwa kundamene unene Jakopo, ogu ga lilire munwendi Josefa mazuva gomanzi. (Gen. 37:33, 34) Nye Jehova kapi a tara yininke ngwendi moomu ava yi tara vantu wokudira kusikilira mo. Nampili ngoso kuteda ko kweyi ya horokerere Jakopo kuvhura kutuvatera tu kwate egano omu Karunga ga lizuvhire apa Munwendi ogu ga hara va mu rugene momudona ntani nokumudipaga.
Gwanena mo mauwa mosizoweseso
15, 16. (a) Ngapi omu Jehova ga likida asi ga tambura sizoweseso? (b) Ngapi omu wa gwanena mo uwa mosizoweseso?
15 Jehova Karunga ga vhumbwire Munwendi gomulimburukwi morutu ropampepo. (1 Pet. 3:18) Mazuva 40 Jesus kwa monekerere varongwa vendi nokunkondopeka epuro lyawo ntani nokuvawapaikira kosirugana sosinene sokuudisa. Makura ta rondo meguru. Ano meguru yipo ga ka gave kwaKarunga mulyo gwetjisango lyohonde zendi va gu ruganese morwa vasikuli vendi wousili ava ava likida epuro momulyo gonzambo zendi zosizoweseso. Apa Jehova Karunga ga pere Jesus situmbukira sokupoomwena mpepo zokupongoka varongwa vendi ava va pongere moJerusarema mezuva lyoPentekoste 33 S.N., age kwa likidire asi ana tambura sizoweseso saKristusa.—Yirug. 2:33.
16 Vasikuli vaKristusa owo va gwavekere kwa tamekere poopo kukorangeda vakwawo va henduke ehandu lyaKarunga pokuvakuhwira medina lyaJesus Kristusa yipo vava dongwenene po nonzo dawo. (Resa Yirugana 2:38-40.) Kutundilira pezuva lina lyoPentekoste dogoro ngesi, mamiliyona govantu wokutunda konomuhoko nadinye kwava kokera momalikwatakano naKarunga kuliza nepuro lyomonzambo zaJesus zosizoweseso. (Joh. 6:44) Ngoso nkenye gumwe gwetu kwa gwana ehuguvaro lyomwenyo gwanarunye morwa yirugana yanyamwetu yoyiwa ndi? Nsene tuna gwana ehuguvaro olyo lyewa, kuvhura tu li zumbanese hena ndi?
17. Ngapi omu no tara etungiko lyewa lyokukara kaume kaKarunga?
17 Sizoweseso aso kuna kara ufenkenda. Nye pokulikida epuro mwaso, mamiliyona govantu naina va ya kara vakaume vaKarunga kumwe nehuguvaro lyomwenyo gwanarunye moparadisa pevhu. Nampili ngoso, mokukara vakaume vaJehova, kapi yina kutanta asi ose ngatu kara ngorooro momalikwatakano ogo nendi. Pokuhenduka ezuva lyehandu lyaKarunga eli lina kuwiza, twa hepa kutwikira kulikida rupandu rorunene ‘kwaJesus Kristusa ogu ga tu zowora.’—Rom. 3:24; resa Vafilipi 2:12.
Twikireni kulikida epuro mosizoweseso
18. Yisinke ya kwatera mo mokulikida epuro mosizoweseso?
18 Etjangwa lyosirongwa esi lyaJohanesa 3:36 kwa likida asi kupura mwaHompa Jesus Kristusa kwa kwatera mo kumulimburukwa. Kulikida rupandu mosizoweseso ngano yi tu tumangede tu paruke kuliza nomarongo gaJesus, kukwatera mo eyi ga rongere kuhamena nonkareso. (Mar. 7:21-23) “Ehandu lyenene lyaKarunga” ngali wizira ava ava lihameke moyirugana ngwendi ruhonda nomuteu dougova ntani ‘nonyata nazinye,’ omu mwa kwatera mo kutwikida kutarera mafano goruhonda.—Efe. 5:3-6.
19. Mononkedi musinke natu vhura kulikida epuro lyetu mosizoweseso?
19 Rupandu rwetu kuhamena sizoweseso rwa hepa kutuninkisa tu lihameke mo unene “moyirugana yokupongoka.” (2 Pet. 3:11, NW) Tu zeni tu litulire po siruwo sokukanderera nkenye apa, nesi selirongo lyanyamwetu nokuza komapongo nosiruwo sokukarera Jehova ngepata ntani nokukara noupampi moyirugana yokuzuvhisa yoUhompa. Ntani hena ‘walye atu divara kurugana uwa oku tatu likwafa-kwafa, yeeyi nonzambo dangoso yido da za Karunga komutjima.’—Heb. 13:15, 16.
20. Etungiko musinke vana kundindira navenye ava ava twikire kulikida epuro mosizoweseso?
20 Ee, ruhafo musi ngatu kara naro apa ehandu lyaJehova ngali gwana uzuni ou woudona morwa ose kwa likida epuro norupandu nkenye apa mosizoweseso! Mouzuni woupe ou ga tumbwidira Karunga, ose ngatu ka likida rupandu rwanarunye kewapaiko lyewa eli lyokutuparura mehandu lyaKarunga.—Resa Johanesa 3:16; Ehororo 7:9, 10, 13, 14.
Ngapi omu no vhura kulimburura?
• Morwasinke twa hepera sizoweseso?
• Yisinke ya hepere po mokugava sizoweseso?
• Mauwa musinke aga aga tundu mosizoweseso?
• Ngapi omu atu likida epuro monzambo zaJesus zosizoweseso?
[Efano lyepepenuno 19]
Simpe mpito zina tu zegurukire mokulikwatakana naJehova
[Mafano gepepenuno 21]
Kuteda ko kweyi ya horokerere oAbirahamu naIsaka ntani naJakopo kuvhura kutuvatera tu kwate egano eyi ya hepere po mokugava sizoweseso