Konakona novantu monkedi zombili

OSE tuna hafa komarunduruko aga Nonkango daKarunga da reta momaparu getu ntani tuna hara wopeke nawo va gwanene mo uwa. Mokugwederera ko, ose twa dimburura asi monkedi omu vantu ava limburukwa kombudi zongwa kukundama meho zawo. (Mat. 7:13, 14; Joh. 12:48) Ose tuna hara ngano va tambure usili. Nampili ngoso, mokuninka asi yi tu tompoke, epuro lyetu lyokupama nouradi wetu twa hepa kuuruganesa nonondunge.

Kuhorora kuvyukilira monkedi zondona epuliro lyepuko eli ga hara muntu, nampili ngomu eyi ono kuuyunga kuna kuyipameka noMatjangwa gomanzi, kapi ayi reta etompoko lyewa. Pasihonena, nsene no nyokera yipito ya divikwa morwa kwa tundilira kovapagani, eyi kuvhura yi dire kurundura omu ava yi tara vantu wopeke. Kukonakona novantu monkedi zombili kuvhura ngayi ku tompoke. Yisinke ya kwatera mo?

Matjangwa kututantera asi “unongo ou wa tunda meguru . . . kwa hara mpora, kwa kara nombili.” (Jak. 3:17) Nkango zoRugereka ezi va toroka asi “kukara nombili,” kutanta asi “kupulisira magano gava wopeke.” Vatoroki vamwe kwa zi toroka asi “kugazadara ko wopeke,” ndi “kulididimikira.” Didilika asi nkango ezi kwa zi kwatakana nompora. MwaTitusa 3:2, kwa zi tumbura kumwe nonkenda ntani kapi za lifana nomarwanambo. MoVafilipi 4:5 kwa zi toroka asi “ufenkenda.” Muntu gombili kugazadara ko ntundiliro nomaukaro nomalizuvho gava wopeke ava ana kuuyungisa. Age kapi a sininike yuma nsene kapi yina kara hepero. Kuruganena nava wopeke monkedi zangoso kuvatera mokuzegurura magano nonomutjima dawo yipo va yi tambure apa no konakona nawo moMatjangwa.

Oku no tamekera. Munahistoli Rukasa kwa tjenge asi apa mupositoli Paurusa ga kere moTesaronika, kwa ruganesere Matjangwa, “ta va fwatwire oku ta va likida asi, Kristusa yige sili kunyanda, ntani ana kuvhumbuka koufe.” (Yirug. 17:2, 3) Nongonona asi Paurusa ga yi rugene eyi mosinagoge zoVajuda. Owo ga uyungisire va tambwire Matjangwa goRuhebeli. Ayo ya wepe mokutameka noyininke eyi va pulire.

Apa Paurusa ga uyungisire Vagereka posigongi soAreyopagi moAtena, age kapi ga tamekere kutumbura Matjangwa. Mevango lyoyo, age kwa tamekere noyininke eyi va divire nokutambura, makura ta yi ruganesa mokutwaredesa konzogera zokuhamena Musiti nositambo sendi.—Yirug. 17:22-31.

Moyiruwo yantaantani, pwa kara mamiliyona govantu ava ava tara Bibeli asi kwato mulyo. Nye konyara eparu lyankenye gumwe kuna likundama maukaro gomadona gomouzuni ou. Vantu kuna hara eparu lyewa. Nsene pomuhowo o likida sinka kweyi yina kuvakundama nokuvalikida omu Bibeli za yi faturura, kukonakona monkedi zombili zangoso kuvhura yi va ninkise va purakene kweyi azi uyunga ko Bibeli kuhamena sitambo saKarunga kovantu.

Kuvhura yi kare asi eyi ga pinga kovakurona vendi ogo murongwa kwa kwatera mo epuliro lyoukareli nonompo dimwe. Makura apa murongwa na dimburura asi mapuliro nonompo odo kapi adi hafesa Karunga, ta di nyoka morwa yeeyi azi rongo Bibeli. Ngapi omu murongwa na fatwilira etokoro olyo vakurona vendi? Vakurona kuvhura va lizuvhe asi pokunyoka ukareli woupingwa ou va mu pa, age kuna kuvanyoka. Murongwa goBibeli kuvhura a gazadare ko asi komeho zokuvafatwilira moBibeli kuhamena etokoro lyendi, ta hepa kuvahuguvaresa asi ga va hara nokuvafumadeka.

Siruwo sokupulisira magano gava wopeke. Jehova, nampili ngomu ga kara nononkondo dononene dokupangera, age kukonakona novantu monkedi zombili. Apa ga parwire Roto nepata lyendi mositata saSodoma, muengeli gwaJehova kwa mu tanterere asi: “Dukira konondundu, ntani no dira kufa!” Nye Roto ta likwambere asi: “Hawe, kapisi ngoso, tate lyange!” Age kwa likwamberere kwaJehova a mu pulisire mokudukira moSowara. Jehova ga gazadarere ko Roto pokumupulisira mokurugana eyi ga pulire. Apa yitata yopeke ga yi zonagwire, Sowara kapi va si zonagwire po. Nampili ngoso, konyima Roto ga ya kweme evyukiso lyaJehova lyomuhowo nokudukira konondundu. (Gen. 19:17-30) Jehova ga divire asi mpango zendi kwa kere mouhunga, nye ga likidire elididimiko dogoro Roto ga ya kwete egano mpango zendi.

Mokuninka asi yi tu wapere mokuruganena nawa kumwe nava wopeke, nose twa hepa kukara nombili. Kuvhura tu dive nawa asi muntu mepuko ana kara ntani kuvhura tu kare noumbangi momagano getu wokuvhura kuyipameka. Nye poyiruwo yimwe kapi ya wapa kusininika muntu a tambure asi mepuko ana kara. Kukara nombili kapi ayi tanta asi kuteza po nompango daJehova. Ayo kuvhura yi wape kupandura tupu muntu ogo kokupwagesa magano gendi ntani kapisi hepero nkenye apa kulimburura magano gepuko, hansa kudemenena kweyi nayi reta yitundwamo yoyiwa. Nampili a rwanese eyi wa pura, wa ha handuka. Kuvhura o mu pure eyi ana kulizuvhira ngoso. Purakena nawa kelimbururo lyendi. Eyi ngayi ku vatera mokudiva eyi ana kugazara. Eyi kuvhura yi kare ngetateko lyonzogera zongwa komeho.—Yis. 16:23; 19:11.

Jehova kwa pa vantu evhuliko lyokutulisa po matokoro. Age kuvapulisira mokuruganesa evhuliko olyo, nampili ngomu nava dira kuliruganesa nawa. Ngomuuyungilipo gwaJehova, Josuwa kwa tumbagwire omu Karunga ga ruganene kumwe noVaisraeli. Makura ta tanta asi: “Nsene kapi muna hara kuruganena HOMPA, tokoreni naina ngesi ogu muna hara kuruganena, va kare vakarunga ava ngava ruganene ozinyakurweni moMesopotamiya ndi vakarunga woVaamoli, venyasirongo esi muna kara. Nye ame ko nepata lyange, ose kuna hara kuruganena HOMPA.” (Jos. 24:15) Sirugana setu naina kuna kara kugavera “umbangi,” ntani ose kuuyunga nomukumo, nye kapi atu heteke kusininika vapeke va pure. (Mat. 24:14) Va hepa kutokora nyamwawo, ntani kapi atu va nyokesa etokoro lyawo.

Pura mapuro. Jesus kwa tulire po sihonena sosiwa sokukonakona novantu monkedi zombili. Age kwa gazadarere ko nontundiliro dawo ntani nokuruganesa yifanekeso eyi nava kwata egano. Age hena kwa ruganesere nawa mapuro. Eyi ya pere wopeke mpito mokupwagesa malizuvho gawo ntani nokuhorora eyi ya kere monomutjima dawo. Ayo hena ya va korangedere va konakone eyi ga uyungire.

Mulirongi gomatjangwa kwa pulire Jesus asi: “Murongi, yinke eyi nani vhura kurugana, nkumwe ngani gwanene po mwenyo gwanarunye?” Jesus ngano ga vhulire kumulimburura noureru. Nye kwa pulire mugara gwina mokupwagesa magano gendi. “MoVeta yinke eyi va tjanga mo? Omu o resa mo ngapi?” Mugara kwa limbwilire mouhunga. Mokugava kwendi elimbururo lyouhunga ya hagekesere nzogera zina ndi? Hawe. Jesus kwa geve mpito komugara gwina mokutwikira, ntani epuro eli ga pulire mugara kwa likidire asi age kwa here kulihungika mwene. Ta pura asi: “Mwene ogo mukwetu yilye?” Mevango lyokumupa elimbururo eli nampo ngano ga vhulire kupatana morwa nkareso ezi va kere nazo Vajuda koVapagani noVasamaliya, Jesus kwa pulire mugara gwina a konakone sifanekeso. Aso kwa kere soMusamaliya ogu ga vaterere mugara gomorugendo ogu va hakanene nokumutoona, ano siruwo oso mupristeli noMurevhi kwato eyi va rugene ko mokuvatera gwina mugara. Pokumupura epuro lyoureru, Jesus kwa divilisire asi mugara gwina a kwate egano sitambo sosifanekeso sina. Nkedi omu Jesus ga konakonene nkango “mukwetu” ya ninkisire mugara gwina a kwate nawa egano etanto lyazo. (Ruk. 10:25-37) Ee, sihonena musi sosiwa kutemwinina! Mevango lyokuuyunga nyovelike, lironga omu no ruganesa mapuro noyifanekeso monkedi zongwa mokukorangeda vapurakeni woge va gazadare ko.

Gava nokonda. Apa mupositoli Paurusa ga uyungire mosinagoge moTesaronika, age kapi tupu ga resere moveta ezi vapurakeni vendi va pulire. Rukasa kwa uyungire asi Paurusa kwa fatwilire nokupameka ntani nokutura pasirugana eyi ga resere. Ngoyitundwamo, “vamwe po tadi va zi konomutjima, makura tava hama kwaPaurusa naSirasa.”—Yirug. 17:1-4.

Yi kare asi wolye vana kara mo movapurakeni woge, kukonakona monkedi zangoso zombili kuvhura kureta etompoko. Ayo usili apa o gavere umbangi kovanekoro nokuuyunga novarugani vakweni ndi vanasure ndi vageni ava o gwanekere nawo moyirugana yokuzuvhisa ndi pokurugana elirongo lyoBibeli ndi pokugava siuyungwa mombungakriste. Apa no resa etjangwa kuvhura li ku faturukire nye nampo kuvhura li dire kufaturukira wopeke. Efatururo lyoge ndi nkedi omu ono kuruganesa etjangwa kuvhura yi zuvhike monkedi zelinenepeko. Kuhorowora nokufaturura nonkango dongandi domomatjangwa kuvhura yi vatere ndi? Kuvhura o gave umbangi wokunkondopeka, nampo mosireswa ndi etjangwa limwe eli lya zogera ko kosirongwa oso ndi? Kuvhura sifanekeso si faturure eyi ono tamba ndi? Mapuro kuvhura ga vatere vapurakeni woge va tede ko koyo ono kuzogera ndi? Kufaturura monkedi zangoso zombili kukundama wopeke ntani kuvasiga neyi yoyinzi eyi nava gazadara ko.