mpango zaKarunga ntani nokuzisikisa mo. Eyi kutanta asi ngaku ka kara sirugana sosinene serongo. Yosili, “navenye ngava lirongera mo asi uhungami yinke.” (Jesaya 26:9) Nampili ngoso, kapisi navenye ngava ka hara ku ka sikisa mo mpango zaKarunga. Jesaya 26:10 kuuyunga asi: “Vadinikarunga nampili o va fire nkenda, kapi ava lirongo eyi ya hungama. Nomosirongo si esi sovahungami, awo kurugana udona; awo kunyoka kudimburura unene woge.” Vadinikarunga ava ngava ka va zonagura po narunye mosiruwo sEzuva lyoMpanguro.—Jesaya 65:20.

Pehagero lyEzuva lyoMpanguro, vantu ngava ka paruka hena ngovantu wokusikilira mo. Mosiruwo sEzuva lyoMpanguro vantu ngava ka va tengwidira koukaro wanare wokusikilira mo. (1 Vakolinte 15:24-28) Makura eheteko lyokuhulilira ngali ka horoka. Satana ngava ka mu mangurura monomango dendi ntani nokukamupulisira mokukaheteka ku ka pukisa vantu sikando sokuhulilira. (Ehororo 20:3, 7-10) Owo ngava mu nyokera ngava ka hafera esikiliromo lyene-lyene lyetumbwidiro lyoBibeli asi: “Muhungami nga gusa sirongo nga tunge mo narunye-narunye.” (Episarome 37:29) Yosili, Ezuva lyoMpanguro ngali ka kara etungiko kovantu navenye wovalimburukwi!

NOMVHURA nomurongo ne komeho yi ka moneke, valirongi woBibeli kwa divisire asi ngano ngaku kara yihorokwa yomulyo mo-1914. Yihorokwa musinke ya kere, ntani silikido musinke asi likida 1914 ngwendi mvhura zomulyo?

Moomu va yi tjanga mwaRukasa 21:24, Jesus kwa uyungire asi: “Jerusarema ngava zi lyatagura vapagani dogoro noku ngasi sika mo siruwo sawo.” Jerusarema kwa kere nkurusitata somuhoko goVajuda—sipundi soupangeli wovahompa kutundilira membo lyahompa Ndafita. (Episarome 48:1, 2) Vahompa ava kwa kere wokulikerera movapangeli wonomuhoko. Awo kwa pangerere “mouhompa ou ga tulire po HOMPA” ngovakarelipo vaKarunga mwene. (1 Histoli 29:23) Yipo nye Jerusarema kwa fanekesere upangeli waJehova.

Ngapi ntani siruwoke va varekere ‘kulyatagura vapagani’ upangeli waKarunga? Eyi kwa horokere mo-607 K.S.N. apa Jerusarema va zi fundire Vababironiya. Vahompa womoruvharo rwaNdafita ava va kererere po Karunga va va hagekesere, ntani kwato gumwe ga pangerere “mouhompa ou ga tulire po HOMPA.” (2 Vahompa 25:1-26) Ngava u “lyatagura” narunye ndi? Hawe, morwa muengeli Ngabiliyera ga tanterere Mariya asi Jesus ngava “mu pa uhompa wazinakuru Ndafita.” (Rukasa 1:32, 33) Yipo nye ‘elyatango’ ngano lya hege apa Jesus ga ya kere Hompa.

Siruwoke ngano ngayi horoka eyi yomulyo? Jesus ga likidire asi Vapagani ngano ngava pangera posiruwo sokuhetekera tupu. Etjango lyaNdaniyera egaununo 4 kwa kara nelikido mokuvarura asi siruwo sokusika kupi ngano ngayi kara. Alyo kusingonona nzodi zouporofete ezi ga rotere hompa Nebukadenesara gwaBabironi. Age kwa mwene etji lyenene eli va tetere. Sisindi salyo kapi sa vhulire kumena morwa kwa si menge nomalyenge gosivera songoporo. Ngava si manga “nomvhura ntano-nambali.”—Ndaniyera 4:10-16.

MoBibeli, yitji pamwe kuyiruganesa mokufanekesa upangeli. (Hesekiyeli 17:22-24; 31:2-5) Eteto lyositji sosifanekeso, aso kulikida omu upangeli waKarunga, ou va likidire kupitira movahompa womoJerusarema, ngano ngava u hagekesa. Emoneko kudivisa asi eli ‘elyatango lyaJerusarema’ ngano ngali kara karuwogona—“nomvhura ntano-nambali.” Edi kapisi nomvhura dene-dene, nye douporofete. Nomvhura dokuhura kupi?

Ehororo 12:6, 14 kulikida asi nomvhura ntatu noharufa douporofete kusika po “mazuva eyovi nomafere gavali nomazuva nomurongo ntano-nazimwe.” “Nomvhura ntano-nambali” (3 ¹⁄2 + 3 ¹⁄2) douporofete kwa kara mazuva 2 520 (1 260 + 1 260). Nye nomuhoko doVapagani kapi da hagekere ‘mokulyatanga’ upangeli waKarunga mazuva 2 520 tupu konyima zegwo lyaJerusarema. Yipo nye, ya zera asi uporofete ou kwa kara siruwo soruveze rorure. Kuliza naNumeri 14:34 ntani Hesekiyeli 4:6, kuuyunga kuhamena “mvhura zimwe mwankenye ezuva,” “nomvhura ntano-nambali” douporofete ngano kusika po nomvhura 2 520.

Nomvhura 2 520 kwa tamekere mwaSikukutu 607 K.S.N. apa za gwire Jerusarema koVababironiya ntani uhompa wemembo lyaNdafita ou wa kererere po Karunga kwa u zonagwire po. Siruwo kwa hagere mwaSikukutu 1914. Poruveze oro, ‘siruwo sovapagani’ kwa hege, ntani Jesus Kristusa kwa mu tulire ngoHompa gwaKarunga meguru.a—Episarome 2:1-6; Ndaniyera 7:13, 14.

Moomu tupu ga yi pumbire Jesus, ‘ewizo’ ndi ekaropo lyendi ngoHompa gemeguru kwa li nongwenesa koyihorokwa yokutetukisa youzuni—yita nerumbu nekankamo lyevhu nehamba lyomukagu. (Mateusa 24:3-8; Rukasa 21:11) Yihorokwa oyo kugavera umbangi wononkondo kousili asi 1914 yosili kwa nongwenesere ehampuruko lyoUhompa waKarunga wemeguru ntani etameko ‘lyomazuva gopouhura’ gouzuni ou woudona.—2 Timoteusa 3:1-5.

SISITWA sopampepo Mikayera kapi va si tumbura rorunzi moBibeli. Nye, apa ava mu tumbura, age kuna kurugana yuma. Mobuke zaNdaniyera, Mikayera kuna kurwa novaengeli wovadona; mombilive zaJuda, age kuna kulitatagana naSatana; ntani mEhororo, age kuna kurwa yita noMuzonaguli novaengeli vendi. Pokupopera upangeli waJehova ntani nokurwanesa nonkore daKarunga, Mikayera kuparuka kuliza nontanto zedina lyendi: “Yilye ga fana Karunga?” Nye yilye Mikayera?

Pamwe muntu kwa kara nomadina gavali ndi kupitakana pogo. Pasihonena, esimbi Jakopo kwa li divire hena asi Israeli, ntani mupositoli Peturusa, yige Simoni. (Genesis 49:1, 2; Mateusa 10:2) Mokulifana, Bibeli kulikida asi Mikayera edina limwe lyaJesus Kristusa eli nga ruganesa komeho ntani nokonyima zeparu lyendi pevhu. Tu zeni tu tarurure nokonda dopatjangwa mokuwiza kehagero lyangoso.

Muengeli gomunene. Nonkango daKarunga kutumbura Mikayera asi “muengeli gomunene.” (Juda 9) Koneka asi nkango “muengeli gomunene” kwa moneka moBibeli pasimwe tupu, narumwe si asi payinzi. Tayi likida asi pwa kara muengeli gumwe tupu gwangoso. Mokugwederera ko, Jesus kuna mu kwatakanesa noukaro womuengeli gomunene. Kombinga zaHompa Jesus Kristusa gomuvhumbuki, 1 Vatesaronika 4:16 kutanta asi: “Ngazi zuvhika nzigo nezwi lyomuengeli gomunene