Apa Adamu naEva va va tjidire mosikunino saEdeni, awo kwa ya kere novana vawo wovanzi. Mbeli zawo, Kaini, kwa kere munandima, ano sikwamambeli, Abeli, kwa kere musita gononzwi.

Ezuva limwe Kaini naAbeli kwa geve nonzambo kwaJehova. Wa diva asi yisinke nzambo ndi? Nzambo kuna kara sininke esi o gava kwaJehova. Jehova kwa haferere nzambo zaAbeli, nye zaKaini kapi ga zi haferere. Eyi kwa handukisire Kaini. Jehova yipo ga rondwere Kaini asi ehandu tali mu ninkisa a ture nzo. Nye age kapi ga purakenene.

Kaini yipo ga tanterere Abeli asi: ‘Tu ze tu ka gendagure po.’ Apa va gendere, Kaini ta toona mumbyendi makura ta mu dipaga. Yisinke ga rugene ko Jehova? Jehova kwa tengekere Kaini pokumutjida a ka kare ure novakurona vendi. Kapi va mu pulisilire hena a tengure kembo.

Yisinke natu lirongera ko? Nsene yininke kapi yina kutugenda po nawa nose kuvhura tu handuke. Nsene kuna handuka, makura vakwetu va tu rondore asi tu hageke kuhanduka, twa hepa kupurakena komeho ehandu li tu pangere.

Abeli kwa here Jehova ntani kwa rugene yininke yoyiwa, Jehova kapi ga mu divara. Apa Karunga nga ka ninka evhu li ka kare paradisa, age nga ka pindura Abeli konomfa.

Vantu kwa vhukire unene pevhu. Sinzi sawo ngava rugana yoyidona. Vaengeli vamwe vemeguru nawo kwa ya donapere. Awo kwa tundire meguru nokuwiza pevhu. Ono diva asi morwasinke va tundilire mo meguru ndi? Yipo va ya guse marutu gopasintu nokukwara vakadi.

Vaengeli novakadi owo kwa ya retere vanona. Vanona owo apa va kulire kwa kere nononkondo ntani nyanya. Awo ngava toona vantu. Jehova kapi ga here udona owo u twikire. Yipo ga tokwere kuzonagura po vantu wovadona noruhanzo.

Nye pwa kere mugara ogu ga lisigire novakwawo. Age kwa here Jehova. Edina lyendi Nowa. Age kwa kere namukadendi novana vawo vatatu, Sema naHamu ntani naJafeta. Ano vana ava vatatu vaNowa, nawo kwa kere novakadi vawo. Jehova kwa tanterere Nowa a tunge emuwato, yipo epata lyendi li paruke koRuhanzo. Alyo kwa fene ngwendi emupakote lyemunene. Jehova kwa tanterere hena Nowa a hwilide yikorama memuwato yipo ngayi paruke koruhanzo.

Nowa ta tameke kutunga emuwato. Nowa nepata lyendi kwa tungire emuwato olyo nomvhura 50. Awo kwa li tungire moomu ga va tanterere Jehova. Ntani Nowa ga rondwere vantu kuhamena Ruhanzo. Nye kapi va mu purakenene.

Konyima, siruwo sa ya sikire mo sokuhwilira memuwato. Ngatu ka zogera eyi ya horokere mosirongwa sokukwama ko.