Ronga munoge

Apa Jehova ga tulire po epata, age kwa pere vakondi situmbukira sokurera vanona. (Vakorosi 3:20) Aso situmbukira soge ngomukondi mokuronga munoge a hare Jehova yipo nage nga kare mukondi gomuwa. (2 Timoteusa 1:5; 3:15) Wa hepa kudiva eyi a gazara munoge. Mulyo nove o ture po sihonena sosiwa. Pomuhowo Nonkango daJehova da hepa kukara momutjima goge ntani no vhura kudironga munoge.—Episarome 40:8.

1 KARA GOURERU KUHEDERA

EYI ZA UYUNGA BIBELI: ‘Nkenye muntu a genderere kuzuvha, nye mokuuyunga ta liwora.’ (Jakopo 1:19) Vana woge va hepa kulizuvha emanguruko lyokuuyunga nove ntani va hepa kuyidiva asi no va purakena. Nsene membo mbili mo, vanona ngava kara nemanguruko lyokupwagesa malizuvho gawo. (Jakopo 3:18) Nsene ove ukenya ndi kuvapangura awo kapi ngava ku mangurukira. Lididimikira ntani va tantera nkenye apa asi wa va hara.—Mateusa 3:17; 1 Vakolinte 8:1.

EYI NO RUGANA:

• Purakena nsene vana woge vana hara kuuyunga nove

• Zogera nkenye apa novana woge, nye kapisi dogoro udigu una horoka

2 KWATA EGANO EYI VANA TAMBA

EYI ZA UYUNGA BIBELI: ‘Wonondunge kuhova tanko kugazara ntani vana kurugana.’ (Yisewe 13:16) Nsene munoge ta uyunga, hetekera ko kukwata egano malizuvho gendi. Vanona pamwe kutjira kuvyukilira kuuyunga eyi vana hara ndi eyi vana tamba. “O hove tanko kuzuvha ko, ntani ono kulimburura. Nsene o dira kuyirugana, ugova woge neswau lyaamoge.” (Yisewe 18:13) Wa ha genderera kuhanduka.—Yisewe 19:11.

EYI NO RUGANA:

• Wa ha handuka ndi o kwate munoge meraka nsene ta uyunga

• Diworoka omu wa lizuvhire apa wa kere munona

3 LIZENI MOMAGAZARO

EYI ZA UYUNGA BIBELI: “Munwange, o purakene eyi vana kukutantera oguhwo nonyoko.” (Yisewe 1:8) Jehova kwa pa mugara nomukadi situmbukira sokurera vanona. Mwa hepa nye kuronga vana veni va mu fumadeke nokumulimburukwa. (Vaefeso 6:1-3) Vanona kuvhura kuyidimburura nsene asi vakondi vawo kapi va ‘liza momagazaro.’ (1 Vakolinte 1:10) Mwa ha lipatanena komeho zovana veni morwa ngayi va ninkisa va dire kumufumadeka.

EYI NO RUGANA:

• Lizuvheni omu nomu vhura kuronga vana veni

• Nampili ono kara negano lyapeke kuhamena omu nomu ronga vana veni, hetekera ko kukwatesa ko egano lyomulikwali goge

4 DIVA OMU NO RONGA

EYI ZA UYUNGA BIBELI: “O ronge munona asi ngapi omu na kara.” (Yisewe 22:6) Kuronga munoge a kare muntu gomuwa kugusa siruwo. Merongo olyo kwa kwatera mo kumupisura. (Episarome 127:4; Yisewe 29:17) Episuro kapi lya hamena mo tupu kutengeka munona, nye wa hepa kumuvatera a kwate egano konda zonoveta edi mwa tura po. (Yisewe 28:7) Ronga hena munoge a hare Nonkango daJehova nokukwata egano nompango dendi. (Episarome 1:2) Ayo ngayi mu vatera a ture po matokoro gomawa.—Vahebeli 5:14.

EYI NO RUGANA:

• Vatera vana woge va dive Karunga ngomuntu ogu nava vhura kuhuguvara

• Va vatera va dimburure nokunyokera po nkareso zondona, ngwendi ezi za kara koIntaneta. Va ronga omu nava vhura kunyoka nsene gumwe ta va zedagwire va kare kumwe panyama