Eyi wa lironga moBibeli noNombangi daJehova ya ku vatera o dive usili. Eyi wa lironga ya ku vatera o kare nelikwatakano lyewa naKarunga ntani ya kupa ehuguvaro lyokomeho nomatungiko aga ngo ka gwana moparadisa pevhu mepangero lyaKarunga. Epuro lyoge moNonkango daKarunga kwa li nkondopeka, ntani pokulipakerera kumwe nombungakriste, ove wa gwanena mo mauwa gomanzi. Ove wa dimburura omu Jehova a ruganene kumwe novantu vendi naina.—Sak. 8:23.

Ngomu ono kuliwapaikira ekuho, ngo gwanena mo uwa mokukonakona eyi va pura Vakriste kumwe novakuronambunga. (Heb. 6:1-3) Jehova ngano a twikire kutungika elituromo lyoge lyokumudiva ntani nga ka kupa mfeto ezi ga ku tumbwidira.—Joh. 17:3.

1. Morwasinke ono harere kugwana ekuho?

2. Yilye Jehova?

• “[Jehova, NW] yige Karunga geguru nevhu. Kapi hena pa kara Karunga gwapeke.”—Deut. 4:39.

• “Nyove, gedina Jehova, nyovelike Mupangeli goMunene gouzuni mudima.”—Epis. 83:18, NW.

3. Morwasinke ya karera nomulyo o ruganese edina lyaKarunga?

• “Nsene tomu kanderere, omu kanderere ngesi asi: ‘Guhyetu gemeguru. Edina lyoge ava li pongore.’”—Mat. 6:9.

• “Nkenye ogu a kugu edina lyaHompa, kumuparura.”—Rom. 10:13.

4. Yitumbwidiso musinke yimwe va ruganesa moBibeli mokusingonona Jehova?

• “Diworoka musiti goge momazuva goge goudinkantu.”—Muud. 12:1.

• “Guhyetu gemeguru.”—Mat. 6:9.

• “Karunga yige eharo.”—1 Joh. 4:8.

5. Yisinke no vhura kugava kwaJehova Karunga?

• “Ano o hare Hompa Karunga goge nomutjima goge nagunye, nomwenyo goge nagunye nonondunge doge nadinye nononkondo doge nadinye.”—Mar. 12:30.

• “O tongamene Hompa Karunga goge gelike oku to mu kerere makura!”—Ruk. 4:8.

6. Morwasinke ono harere kulimburukwa Jehova?

• “Munwange kara munongo, makura ame tani hafa. Ame ngani limburura nkenye ogu nga pa nge usima.”—Yis. 27:11.

7. Kwalye no kanderera, ntani kupitira medina lyalye?

• “Yosili nina kumutantera asi, nsene ngomu hundilira yuma kwaTate medina lyange [Jesus], nga yi mu pa.”—Joh. 16:23.

8. Yininke musinke yimwe no vhura kutumbura mekanderero?

• “Nsene tomu kanderere, omu kanderere ngesi asi: ‘Guhyetu gemeguru. Edina lyoge ava li pongore. Uhompa woge au wize. Mpango zoge ava zi [si]kise mo pevhu ngwendi meguru. Tu pa naina nondya detu dankenye ezuva. O tu dongwenene po nonzo detu, moomu atu dongwenene po nose wononzo detu. Walye o tu twara momaheteko, nye o tu popere koudona.’”—Mat. 6:9-13.

• “Yipo nye twa kerera nemanguruko kombinga zaKarunga, asi ta tu zuvhu ntene tu mu hundira eyi yokuliza nompango zendi.”—1 Joh. 5:14.

9. Morwasinke Jehova nampo na dilira kupurakena ekanderero lyomuntu?

• “Ngomu kuga kwaHOMPA, nye age kapi nga mu limburura. Kapi nga purakena makanderero geni, morwa mwa rugana yoyidona.”—Mika 3:4.

• “Meho gaHompa kwa tara kovahungami, age kupurakena nkenye apa makanderero gawo. Nye age kuvyuka ava ava rugana yoyidona.”—1 Pet. 3:12.

10. Yilye Jesus Kristusa?

• “Simoni Peturusa ta limburura asi: ‘Nyove sa Mesiyasa, MunwaKarunga goMunamwenyo.’”—Mat. 16:16.

11. Morwasinke ga wizililire Jesus pevhu?

• “NaMunwaMuntu nage si kapi ga wizira asi va ya mu kerere, age kwa wizira a ya kerere, a ya gave mwenyo gwendi, gu kare sizoweseso sovanzi.”—Mat. 20:28.

• “Ame [Jesus] nyame tupu kukaudisira hena moyitata peke Mbudi zoNgwa zoUntungi waKarunga, yeeyi yiyo va tumina nge.”—Ruk. 4:43.

12. Ngapi no vhura kulikida rupandu konzambo zaJesus zosizoweseso?

• “Kristusa kwa fira navenye, asi ava va kara nomwenyo, kapisi va kerere po hena mwavene, nye va kerere po googu ga fa, yiyo ga vhumbuka mwarwawo.”—2 Kol. 5:15.

13. Nonkondo dokuhura kupi ga kara nado Jesus?

• “Nonkondo nadinye demeguru nedi depevhu nyame va di pa.”—Mat. 28:18.

• “Karunga yiyo ga mu zerura unene, age yiyo ga mu ruka edina lya pitakana madina nagenye.”—Fil. 2:9.

14. Wa yi pura asi Mbungagendesi zoNombangi daJehova yizo “mukareli gokulimburukwa gonondunge” ogu Jesus ga horowora ndi?

• “Koge ove yilye nani mukareli gokulimburukwa gonondunge, ogu ga tumbire hekurwendi a kare mutunini govantu vendi, a va paape nondya posiruwo sado?”—Mat. 24:45.

15. Mpepo zokupongoka kuna kara muntu ndi?

• ‘Muengeli makura ta limburura Mariya asi: “Mpepo zokupongoka ngazi ku wizira, ano nonkondo dogu gekeguru-guru ngadi ku kudumika. Yiyo nye ngava tumbwira munona ogu ngo hampuruka asi Mupongoki, MunwaKarunga.”’—Ruk. 1:35.

• ‘Kumwe nyone wovadona mwa diva kupa vana veni yininke yoyiwa, ngaGuhyeni gemeguru yihuna nye pokugava mpepo zokupongoka kwava vana kumuhundira!’—Ruk. 11:13.

16. Ngapi omu Jehova ga ruganesere mpepo zokupongoka?

• “HOMPA kwa ungisa eguru kompangera zendi, ano ezuva nokwedi nonombungururu nonkango zokutunda mokana kendi.”—Epis. 33:6.

• ‘One ngava mu zwida nonkondo, apa ngazi wiza mpepo zokupongoka pweni, makura ngomu kare nombangi dange . . . , dogoro nokooku wa ka twa uzuni.’—Yirug. 1:8.

• ‘Kutupu uporofete womomatjangwa wokuvhura kufwatura mwamwene. Yeeyi asi kutupu uporofete ou wa wiza po keharo lyomuntu. Nye vantu ava ngazi gendesa mpepo zokupongoka, yiwo ngava uyunga yokutunda kwaKarunga.’—2 Pet. 1:20, 21.

17. Yisinke Uhompa waKarunga?

• “Posiruwo sohompa owo Karunga gemeguru nga tura po uhompa ou ngau karerera narunye. Awo kapi ngava u funda nampili kanunu, nye ngau hanagura mauhompa ogo nagenye, makura tau kara dogoro narunye.”—Ndan. 2:44, NW.

18. Mauwa musinke ngo gwanena mo moUhompa waKarunga?

• “Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”—Ehor. 21:4.

19. Ngapi ono yi diva asi Uhompa waKarunga ntaantani u rete mauwa pevhu?

• “Varongwa vendi tava mu hedere, awo vana kara velike, tava mu pura asi: ‘Tu tantera asi, ezuvake ngayi horoka yene eyi? Sidiviso sewizo lyoge nesi souhura wouzuni sipi so?’ Jesus ta va limburura asi: ‘. . . Nomuhoko ngadi lilimba-limba, ano yi kare yirongo, nayo ngayi lilimba-limba. Napenye ngapa kara marumbu nomakankamo gevhu. Nye Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.’”—Mat. 24:3, 4, 7, 14.

• “Pomazuva gopouhura ngapa kara yiruwo yoyidigu. Yeeyi vantu ngava lihara tupu vene, ngava dowokera yimaliva, ngava lifumadeka, ngava linenepeka, ngava kara woyitjani, kapi ngava zuvha yovakurona vawo, kapi ngava paka mpandu, kapi ngava pongoka. Awo kapi ngava paka nkenda, ngava kara woyimbokauka novarundili, vankenye omu nava woyikotjongana, awo kwa nyenga yoyiwa. Awo ngava kara nombudi novalingi-lingi novalitumbi, ngava hara mahafo goparutu kupitakanesa omu va hara Karunga. Awo ngava moneka ngwendi vakereliKarunga, nye nonkondo damo ngava di nyoka.”—2 Tim. 3:1-5.

20. Ngapi no vhura kuyilikida asi Uhompa waKarunga mulyo koge?

• “Yipo nye nomu hovera tanko kupapara Untungi waKarunga neyi ga hepa ko kweni.”—Mat. 6:33.

• “Makura ntani ana tantere Jesus varongwa vendi asi: ‘Muntu ogu ga hara kukwama nge, a lidine ntani, ta damuna sitji sendi, ta kwama nge.’”—Mat. 16:24.

21. Yilye Satana ntani nonompepo dendi donondona?

• “One mwaguhyeni Muzonaguli mwa tunda. . . . Age mudipagi kutunda kevareko.”—Joh. 8:44.

• “Emukongoro lyenene makura tava li zuguma mo, ezoka lyanare eli ava tumbura asi Muzonaguli ndi Satana, eli ngali pukisa uzuni naunye. Alyo kuna li zugumine pevhu, kuna li zugumine po kumwe novaengeli valyo.”—Ehor. 12:9.

22. Yisinke Satana ga rundilire Jehova ntani nava ava karere Jehova?

• “Mukadi ta limburura asi: ‘Ose kuvhura kulya yiyimwa yokoyitji eyi yomosikunino, ntudi yokositji sopokatji no. Karunga kwa tanta asi, nokulya si siyimwa sokositji oso, ndi nampili kuguma kooku nokusiguma si; nsene tu yi hetekera, ngano ngatu fa.’ Ezoka tali limburura asi: ‘Ndangako asi ngomu fe one. Karunga kwa yi tantera eyi morwa ga diva asi nsene ngomu lya ko, neisi ngomu gwana nondunge, ngomu mu fane mokudiva yoyiwa neyi yoyidona.’”—Gen. 3:2-5.

• “Satana ta tantere HOMPA asi: ‘Muntu kugava nkenye eyi, morwa kuhara a paruke.’”—Joba 2:4.

23. Ngapi no yi likida asi eyi ga rundira Satana vakareli vaKarunga yimpempa?

• ‘O ruganene Karunga nomutjima nagunye.’—1 Hist. 28:9.

• “Ame ngani kara ngorooro mokupira unzoni wange dogoro kezuva lyonomfa dange.”—Joba 27:5.

24. Morwasinke ava fire vantu?

• “Nzo, muntu gumwe tupu ga zi reta mouzuni. Ano nzo zendi kwa reta mo nomfa. Nomfa yiyo da lihanena movantu mudima, morwa vantu navenye kwa zona.”—Rom. 5:12.

25. Yisinke ukaro wovafe?

• “Vanamwenyo va diva asi ngava fa, nye vafe kutupu eyi va diva.”—Muud. 9:5.

26. Ehuguvaro musinke twa kara nalyo kwava va fa?

• “Vantu navenye, va kare vawa ndi vadona, ngava va pindura koufe.”—Yirug. 24:15.

27. Vangapi ngava za meguru ava ngava ka pangera kumwe naJesus?

• “Na tara ko, tani mono Nzwigona zina sikama pondundu zaSiyoni kumwe novantu mayovi efere nonomurongo ne nane, ava va tjangera edina lyendi neli lyoGuhwe poyipara yawo.”—Ehor. 14:1.

Melirongo lyoge lyoBibeli, wa gwana ediwo lyokuhamena eyi ana hepa ko Jehova koge ntani nomu no paruka kuliza nonompango dendi. Pokulimburukwa kweyi wa lironga, nampo wa tura po marunduruko gongandi meparu ntani monkareso zoge. Morwa etokoro lyoge lyokuparuka kuliza nonompango dendi, Jehova nga tambura sirugana soge ngomuzuvhisi gombudi zongwa.

Kukonakona mapuro aga gana kukwama ko ngayi ku vatera o kwate nawa egano nompango daJehova ntani ngayi ku diworokesa eyi no rugana yipo o kare gumwe govakareli vendi ava a hafere. Mapuro aga ngaga ku vatera o dimburure mulyo gokurugana nayinye nezwi lyewa lyomomutjima ntani nokufumadeka Jehova.—2 Kol. 1:12; 1 Tim. 1:19; 1 Pet. 3:16, 21.

Mokumona asi ono siki pontambo ezi melirongo lyoge, ono hara kuhama kombunga zaJehova nokulimburukwa kepangero lyendi. Mapuro aga gana kukwama ko ntani noMatjangwa nayi ku vatera o dive eyi ayi tanta kulimburukwa kongendeseso zaJehova zomombungakriste nezi zemepata ntani nezi zokovapangeli woupolitika. Yosili, ove ngo likida rupandu kongendeseso zaJehova zokuronga vantu vendi ntani nokunkondopeka epuro lyawo. Eyi kwa kwatera mo kukara momapongo gomombungakriste nokugava malimbururo.

Ntani hena, ruha oru taru ka demenena komulyo gokulihameka nkenye apa moyirugana yokuzuvhisa Uhompa nokuvatera wopeke va dive Jehova ntani neyi ana kuruganena vantu. (Mat. 24:14; 28:19, 20) Aro taru ka ku vatera o divilise nawa asi wa ligava Jehova Karunga komeho zokugwana ekuho. Kara nehuguvaro asi Jehova kuhafera eharo lyoge lyokuligava kwendi morwa nkenda zendi ezi ga ku likida.

1. Mpangera musinke ga gava Jehova koVakriste kuhamena nonkwara? Konda musinke zoPatjangwa za pulisira Vakriste va lizumbe?

• “Kapi mwa resa asi, ‘Ogu ga ungire muntu petameko, kwa va rugene va kare mugara nomukadi,’ yiyo ga tente asi, ‘Yipo nye na sigira mugara oguhwe nozina, a hamene mukadendi, ano mouvali wawo makura va kare nye rutu rumwe tupu.’ Awo kapisi vavali hena, hawe, awo rutu rumwe tupu. Eyi ga gwanekedesa Karunga, muntu walye ayi gaununa. . . . Ogu a zumbu mukadendi, nye pwa hana konda zehondero, a ka kware nagepeke, nonkwara a teza.”—Mat. 19:4-6, 9.

2. Morwasinke vantu ava va tunga kumwe mugara nomukadi nava likwarera paveta? Nsene wa kwara, nonkwara doge da kara paveta ndi?

• “O diworokese wombunga zoge asi va zuvhe yovapangeli noVeta zosirongo.”—Tit. 3:1.

• “Nonkwara ava di fumadeke navenye, uro u kare wa hana nkoha-nkohi, yeeyi Karunga nga pangura vahondedi novatezi wononkwara.”—Heb. 13:4.

3. Situmbukira musinke wa kara naso mepata?

• “Munwange, o purakene eyi vana kukutantera oguhwo nonyoko.”—Yis. 1.8.

• “Mugara yige mupangeli gomukadi, moomu ga kara Kristusa mutwe, kuninka asi mupangeli gongereka. . . . Vagara, omu hare vakadi veni, moomu ga hara Kristusa ngereka.”—Efe. 5:23, 25.

• “Anone oguhya ko, walye omu pakere vana veni nyanya, hawe, omu va tekure oku tomu va pukurura nokuliza neyi ga hara Hompa.”—Efe. 6:4.

• “Anone vanona, omu limburukwe kovakurona veni mwankenye eyi, yeeyi yimo ga hara Karunga.”—Koros. 3:20.

• “None si vakadi, omu limburukwe kovagara veni.”—1 Pet. 3:1.

4. Morwasinke natu likidira efumadeko keparu?

• “[Karunga] yige a pe nayinye mwenyo nomunku noyininke nayinye. Yeeyi ‘Mwendi yimo twa kerera nomwenyo, tu ligumagure.’”—Yirug. 17:25, 28.

5. Morwasinke natu dilira kudipaga muntu? Morwasinke natu dilira kuligusa ezimo?

• “Nsene vagara vavali vana kulitoona, nye gumwe a rorore mukadi gomarutu gavali, ezimo lyendi li tunde po, . . . Ano nsene [munona] a fa, momwenyo tamu piti mwenyo mukwawo.”—Ex. 21:22, 23.

• “Apa wa mwene nge ame simpe nokuhampuruka nge si. Mazuva gokuunga nge ove nare wa ga tura mobuke zoge, ago ga hana kukara po simpe.”—Epis. 139:16.

• “Eyi ga nyenga HOMPA, . . . mawoko gokudipaga vantu [va] hana nzo.”—Yis. 6:16-19.

6. Mpangera musinke ga gava Karunga kuhamena honde?

• ‘Walye omu li honde nonyama zokufa sinkumatere.’—Yirug. 15:29.

7. Morwasinke natu harera vanavazinyetu?

• “Sipango sosipe nina kumupa asi, omu lihara-hare moomu na mu hara ame, yimo nomu lihara-hara none. Nsene mu lihara-hara, yipo ngava divira vantu asi one sili varongwa vange.”—Joh. 13:34, 35.

8. Mokukandana ehaneso lyehamba ndi uvera wokutwara konomfa kwava wopeke: (a) Morwasinke muntu ogu ana kara nawo na dira kulikida malizuvho gendi mombunga ngwendi mokulidingira nomokulincumita? (b) Morwasinke na dilira kulizuvha yoyidona nsene vamwe va dira kumuhwilida momambo gawo? (c) Morwasinke muntu ogu pamwe ana kara nehamba na tokwera mwene a gwane ekonakono lyohonde komeho a livandekere nomuntu? (d) Morwasinke muntu ogu ana kara nouvera womukagu na tanterera ko muwapaiki gombunga zovakuronambunga komeho zokugwana ekuho?

• “Walye omu kara nomakongo govantu, ntudi gaaga gokulihara-hara no. . . . ‘Hara mukweni moomu wa lihara nyamoge.’ Ogu ga hara mukwawo kapi a mu ruganene yoyidona.”—Rom. 13:8-10.

• “Walye omu lipakere mbili nyamweni nyonelike, nye omu pakere hena novakweneni mbili.”—Fil. 2:4.

9. Morwasinke Jehova ana harere tu gusire po vakwetu?

• “Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa.”—Koros. 3:13.

10. Yisinke no rugana nsene mukweni a kurundira ndi a vaka yininke yoge?

• “Nsenesi mukweneni ana ku zono, zende o ka mu vhukisire pompengi nyovelike nendi. Nsenesi ana ku zuvhu, ono mu kongwa nye. Nye nsene kapi ana kukuzuvha, zigida ko mukweni gumwe ndi vavali mokuninkira asi undipo wotuna tuvali ndi tutatu kuvhura kutokora nawa usima. Nsenesi napoopo kapi ana kuzuvha, yi sikisa nye kongereka. Ano nsenesi nokongereka kooku kapi ana kuzuvha, mu siga nye, a kare koge ngwendi mupagani ndi mufutisi gomutero.”—Mat. 18:15-17.

11. Ngapi omu Jehova a tara nonzo edi dina kukwama ko?

▪ Ruhonda

▪ Kukarera mafano

▪ Kulirara mugara nomugara ndi mukadi nomukadi

▪ Kuvaka

▪ Kuta ukarata ndi Jakpoti

▪ Unkorwe

• “Ndi kapi mwa diva asi ava va hana kuhungama, kapi ngava pinga Untungi waKarunga? Mwa ha puka! Vanaruhonda ndi vakereli wovakarunga peke ndi vatezi wononkwara nava wokulirara-rara vagara novagara, ndi vawidi ndi vanaruho nononkorwe novaswauli wovakwaawo novamahaka, kapi ngava pinga Untungi waKarunga.”—1 Kol. 6:9, 10.

12. Yisinke ono tokomene kurugana kuhamena ruhonda, kukwatera mo kulirara mugara nomugara ndi mukadi nomukadi ntani nonomukaro deliraro da pira kuwapera?

• “Nyokeni ruhonda!”—1 Kol. 6:18.

13. Morwasinke nava ligusira ko Vakriste kokuruganesa nomutji da hana asi douhaku kukwaterera mo yikwepangwe yokupiyaganeka nondunge?

• “Vakwetu, Karunga kwa tu fira nkenda. Yipo nye nina kumukorangedera asi mu gave marutu geni ga kare nzambo zonzuni zokupongoka, ezi azi zi Karunga komutjima. Eli yilyo eruganenokarunga lyeni lyokuzira mo. Mwa ha lifana nouzuni ou. Nye sigeni Karunga a rundurure magazaro geni, mu situnuke nawa-nawa. Ntani mu diva kukoneka mpango zaKarunga neyi yoyiwa ya mu wapera ayo ya sikilira mo.”—Rom. 12:1, 2.

14. Yirugana musinke yonompepo donondona ga silika Karunga?

• “Nokuswakererera si vana veni momundiro gokoyizambero yeni ndi asi mu sigilire vantu veni va hame koyininke eyi yoyirogesa neyi yomaunganga neyi yomasanekedo ndi yomaupure. Walye omu va tarerere va pure kovadimu.”—Deut. 18:10, 11.

15. Yisinke na vhura kurugana muntu poopo ana tura nzo zonene nsene ana hara evatero yipo a tengwire kwaJehova?

• “Makura yipo na tunda nye ni tongonone nonzo dange koge; kapi na horeka mausima gange. Ame kwa tokwere asi ni di ku tongwenene, makura ove yipo nye wa dongonona po mausima gange nagenye.”—Epis. 32:5.

• “Nsene pweli ogu ana kuvera, kumuzigidira vakurona wombungakriste va mu kandererere, makura tava mu gwaveke magadi medina lyaHompa. Ekanderero lyemepuro kuparura muntu gokuvera: Hompa ta mu verura, age hena nampili nonzo ga tura, nado tava di mu dongwenene po.”—Jak. 5:14, 15.

16. Yisinke wa hepa kurugana nsene wa diva asi Mukriste mukweni ga tura nzo zonene?

• “Muntu, nsene vana mu zigida kombangwiliro, a ka gave undipo, nye age ta horeke, eyi ga mwene ndi yeyi va mu sansekerere, ogo ana kara nonzo.”—Lev. 5:1.

17. Ngapi no tekura muntu ogu vana divisa asi kapi ana kara hena gumwe goNombangi daJehova?

• “Walye omu kara sinanga nankenye ogu, yooyo asi mukweni, age nye munaruhonda ndi munaruho ndi mukereli govakarunga peke ndi muswauli ndi nkorwe ndi munamahaka; gwangoso nampili kulya nokulya si nendi.”—1 Kol. 5:11.

• “Nsene a wiza muntu kweni, nye a dire kureta erongo eli, mwa ha mu tambura membo ndi asi mu mu kunde.”—2 Joh. 10.

18. Morwasinke natu tulisira po ukaume novantu ava va hara Jehova?

• “Kara ukwawo novanongo ngo kare munongo. Nsene o kara ukwawo novagova, ngo hanauka po.”—Yis. 13:20.

• “Walye omu puka. ‘Nonzogera donondona, kuyipika nonkedi donongwa.’”—1 Kol. 15:33.

19. Morwasinke Nombangi daJehova adi dilire kulihameka moupolitika?

• “Awo kapisi wouzuni, moomu na dira kukara ame gouzuni.”—Joh. 17:16.

20. Morwasinke no limburukwira kepangero?

• “Nkenye muntu a limburukwe kepangero eli ali mu pangere. Yeeyi epangero nalinye kwa [t]unda kwaKarunga. Ano vapangeli ava va kara po, Karunga ga va tura po.”—Rom. 13:1.

21. Yisinke no vhura kurugana nsene veta zosirongo kuna kulirwanesa noveta zaKarunga?

• “Ose twa hepa po kulimburukwa unene Karunga, kupitakana vantu.”—Yirug. 5:29.

22. Matjangwa musinke naga ku vatera o liguse ko kouzuni nsene kuna kuhorowora yirugana?

• “Nomuhoko narumwe si hena kuza koyita, narumwe si hena kuliwapaikira yita.”—Mika 4:3.

• “Pwageni mo mositata oso, one womuhoko gwange, neisi mu honena nonzo dendi, ngaga mu gwane mahepeko gendi.”—Ehor. 18:4.

23. Yilihafeso musinke wa hepa kuhorowora ntani neyi no nyokera po?

• “HOMPA . . . kwa nyenga ava va hana Veta.”—Epis. 11:5.

• “Nyengeni udona mu hame kouwa.”—Rom. 12:9.

• “Vakwetu, yi kare yosili, yekuto, yokuhungama, youkuhuki neyi ava hara vantu neyi ava fumadeke, zi kare nkareso zongwa ndi yeyi ya wapera epando, yiyo nomu gazara po.”—Fil. 4:8.

24. Morwasinke Nombangi daJehova adi dilire kulihameka momaukarelikarunga nagopeke?

• “Nokuwapa si . . . mu kare pompanda zaHompa, makura mu kare hena pompanda zonompepo donondona.”—1 Kol. 10:21.

• “Yiyo nye ana kutantera hena Hompa asi: ‘Ano tundeni mo mokatji kawo, mu likerere. Mwa ha guma kweyi yokunyata, makura ame ngani mu tambure.’”—2 Kol. 6:17.

25. Matjangwa musinke naga ku vatera o tokore nsene asi kuvhura o lihameke mosipito ndi hawe?

• “Tava likwara-kwara nawo, makura tava lirongo yikara yawo. Vantu vaKarunga ngava tongamene vakarunga woyimpempa, eyi yiyo ya va retera ezonauko.”—Epis. 106:35, 36.

• “Vafe kutupu eyi va diva.”—Muud. 9:5.

• “Awo kapisi wouzuni, moomu na dira kukara ame gouzuni.”—Joh. 17:16.

• “Eyi ngomu rugana nare yosipagani ngano ya gwana nye. One kwa kere moruhonda nomomadowo nomounkorwe nomomakurulya nomonombunga dokunwa oku tomu kerere vakarunga woyimpempa momudona.”—1 Pet. 4:3.

26. Ngapi yihonena yomoBibeli nayi ku vatera o tokore nsene kuvhura kudana yipito yehampuruko ndi hawe?

• “Mezuva lyautatu kutunda poyo, mezuva lyediworoko lyehampuruko lyaFarawo, ta ruganene vantu vendi navenye sipito. Ano erenga lyenene lyovapindi neli lyovaduvi tava sikameke pokatji kovantu vendi. Erenga lyenene lyovapindi ta mu tengwidire mosirugana sendi soupindi. . . . Nye erenga lyenene lyovaduvi ta mu kwike, a mu zenzerese kositji, moomu ga yi tente Josefa.”—Gen. 40:20-22.

• “Mezuva lyosipito sehampuruko lyaHerodesa, munwaHerodiyasa gomukadi kwa danene udano pokatji kovanasipito, ou wa zire Herodesa komutjima. Yiyo nye ga mu tumbwidilire nomugano asi na mu pa nkenye tupu eyi na mu hundira. Morwezedagwiro lyozina ta tanta asi: ‘Pakereni nge apa porupasa mutwe gwaJohanesa Mukuhwi!’”—Mat. 14:6-8, 10.

27. Morwasinke no kwamena mavyukiso govakuronambunga?

• “Omu limburukwe oku tomu zuvhu vapitisili veni, yeeyi awo kutakamesa nomwenyo deni, ngwendi vava ava di zeresere Karunga. Nsene mu va limburukwa, tava yi rugana nehafo, kapisi nomutjimakoka, yeeyi kapi yi mu kwafe.”—Heb. 13:17.

28. Morwasinke nove nepata lyoge mwa hepera kutulisa po siruwo sokuresa Bibeli nokuzilironga?

• “Age kwa tokomena kuresa Veta zaHOMPA, oku ta zi konakona mutenya nomasiku. Age kwa fana sitji esi va tapeka konontere domukuro gomema, esi asi yimi yiyimwa posiruwo sayo, yihako yaso hena kapi ayi rembuka, ano nayinye eyi a rugana kuragopa.”—Epis. 1:2, 3.

29. Morwasinke o zire komapongo nokukalihameka mo?

• “Ame ngani tantera ko vakwetu eyi wa rugana; ngani ku hamberera moyigongi yawo.”—Epis. 22:22.

• “Atu likoraike-koraikeni mokulihara-hara nomokurugana yirugana yoyiwa. Twa ha zumbeni yigongi yomombungakriste zetu, moomu va yi yika vamwe, nye atu likorangedeni, unene pokumona asi ezuva lyaHompa tali hedere pepi.”—Heb. 10:24, 25.

30. Sirugana musinke somulyo esi ga tu pa Jesus tu rugane?

• ‘Yipo nye nomu zira konomuhoko nadinye, mu ka di ninke di kare varongwa vange, mu ka di kuhwe. . . . Ka di rongeni, di ka limburukwire nayinye eyi na mu rekera.’—Mat. 28:19, 20.

31. Nkareso musinke azi hafesa Jehova apa atu gava yigava kosirugana soUhompa ndi apa atu vatere vanavazinyetu?

• “O fumadeke HOMPA pokumupa nzambo zeyi yoyiwa po.”—Yis. 3:9.

• “Nkenye muntu a gave moomu ana yi gazarere momwenyo gwendi, kapisi nomutjimakoka ndi asi yi tunde momusininko; yeeyi Karunga kwa hara ava ava gava neharo lyewa.”—2 Kol. 9:7.

32. Maudigu musinke gamwe ava ligwanekere nago Vakriste?

• “Vanerago vava ava hepere morwauhungami wawo, yeeyi Untungi weguru wawo. None vanerago, nsene vantu tava mu swaura oku tava mu hepeke, tava mu uyungire yoyidona nayinye moyimpempa-mpempa tupu morwarwange. Omu hafe oku tomu hamberere, yeeyi asi mfeto zeni nene unene meguru. Yimo ngorooro va hepekere sa novaporofete, ava va mu hoverere.”—Mat. 5:10-12.

33. Morwasinke za karera mfumwa kugwana ekuho ngagumwe goNombangi daJehova?

• “Ame koge na hama, ove HOMPA Karunga Munankondo. Ano nonkango doge kuna zwida mutjima gwange epemburo nehafo.”—Jer. 15:16.

Ekuho nkenye apa kulirugana poyigongi yoNombangi daJehova. Kehagero lyosiuyungwa sekuho, muuyungi kupura ava vana kugwana ekuho va sikame nokulimburura mapuro gavali gana kukwama ko nezwi lyokudameka lyokuzera:

1. One mwa litezurura kononzo deni nokuligava nyamweni kwaJehova ntani nokutambura ewapaiko eli ga tura po kupitira mwaJesus yipo ngomu ka gwane eparu ndi?

2. Mwa yi kwata egano asi ekuho lyeni kumudimbwilisa asi one ngesi Nombangi daJehova ava muna ya hamene kombunga zendi ndi?

Pokulimburura “nhi” komapuro aga, ava vana kugwana ekuho tava gava ‘undipo nokana kawo’ asi va pura mosizoweseso ntani asi awo va ligava kwaJehova nomutjima nagunye. (Rom. 10:9, 10) Yipo nye, ava vana kugwana ekuho va hepa kugazadara ko nokukanderera kuhamena mapuro aga komeho zosiruwo yipo va vhure kulimburura kuliza nepuro lyawo.

Wa ligava nyamoge kwaJehova mekanderero, pokumutumbwidira mokumukarera gelike ntani nokutura mpango zendi muhowo meparu lyoge ndi?

Ove ngesi ono liwapaikire mokukagwana ekuho posigongi sokukwama ko ndi?

Mudwaro musinke gwa wapera ekuho? (1 Tim. 2:9, 10; Joh. 15:19; Fil. 1:10)

Twa hepa kudwara yidwara “yoyiwa yokuliza nonkareso zongwa” yipo tu likide asi twa “tjira Karunga.” Yipo nye, ava vana kugwana ekuho kapisi va dware yokumonekesa rutu ndi yokutjangagura ndi yokufanaika yininke. Va hepa kudwara nawa ntani monkedi zokulikida efumadeko kosilika.

Nkareso musinke na likida muntu pokugwana ekuho? (Ruk. 3:21, 22)

Ekuho lyaJesus kwa kara sihonena sosiwa komakuho goVakriste naina. Age ga nongwenene asi ekuho ntambo zomulyo unene, ano eyi kwa yi likidire monkareso nomoyirugana yendi. Yipo nye, kevango lyokukuhwira kapi tali kara evega lyonomuteu ndi lyokuzogana ndi lyonomukaro dapeke edi ngano nadi yipikisa mulyo gosilika. Ogu ana kukagwana ekuho konyima zekuho kapisi a likide nkareso zokudira kuzira mo ngwendi googu asi kuna gwana efundo lyenene. Nampili ngomu ekuho aso silika soruhafo, ruhafo oro rwa hepa kurulikida monkedi zefumadeko.

Ngapi kulipakerera nombungakriste ngayi ku vatera o sikise mo eligawo lyoge kwaJehova?

Nampili konyima zekuho lyoge, morwasinke ngayi karera mulyo koge mokukara nelikwamo lyewa lyelirongo lyanyamoge ntani nokulihameka mosirugana sokuzuvhisa nkenye apa?