Ngapi omu nomfa daJesus adi tu parura?

Ose kuzona nokuhepa ntani kufa, morwa valikwali wokuhova oAdamu naEva kapi va limburukwire Karunga.a Nampili ngoso, ose simpe twa kara nehuguvaro. Jehova kwa rugene ko yuma yipo a tu popere kononzo nonomfa kupitira mwaMunendi, Jesus Kristusa. Bibeli kutanta asi Jesus kwa geve eparu lyendi ngosizoweseso. Sizoweseso kuna kara mfeto ezi ava gava mokuzowora muntu. Jesus kwa geve eparu lyendi lyokusikilira mo ngomfeto. (Resa Mateusa 20:28.) Apa Jesus ga geve eparu lyendi lyokusikilira mo, age kwa tu pa mpito zokukagwana nayinye eyi va zumbanesere oAdamu naEva. Ayo kwa likidire hena omu nage naJehova va tu hara. Sirongwa esi na si kuvatera o kare norupandu kweyi ga kuruganena Jesus.

1. Ngapi natu vhura kugwanena mo uwa monomfa daJesus?

Mokumona asi kapi twa sikilira mo, ose kurugana yininke yoyinzi eyi ayi dili kuhafesa Jehova. Nye nsene tu livera nonzo detu nokuhundira Jehova a tu gusire po ntani nokudira kurugana mapuko gokulifana, ose ngatu hafera elikwatakano lyenene kumwe nage. (1 Johanesa 2:1) Bibeli kwa tanta asi: “Yeeyi Kristusa kwa fira nonzo dovantu rumwe tupu makura, age muhungami a fire vadona, asi a tu rete kwaKarunga.”—1 Peturusa 3:18.

2. Uwa musinke ngatu gwana komeho morwa Jesus ga tu fira?

Jehova kwa tumine Jesus a ya gave eparu lyendi lyokusikilira mo, yipo asi “nkenye ogu a mu pura [Jesus] a dire kuzonauka, nye a kare nomwenyo gwanarunye.” (Johanesa 3:16) Jehova nga ka gusa po udona naunye ou ga retesere po Adamu, morwa eyi ga rugene Jesus. Yipo nye, nsene tu pura eyi ga tu ruganena Jesus, ose ngatu ka hafera eparu narunye moparadisa pevhu.—Jesaya 65:21-23.

LIRONGA KO YOYINZI

3. Nomfa daJesus kwa tu zowora kononzo ntani konomfa

VIDIYO: Morwasinke ga fililire Jesus?—Ruha 1 (2:01)

• Yisinke ga zumbanesere Adamu apa ga dilire kulimburukwa Karunga?

Resa Varoma 5:12, makura zogereni epuro eli:

• Ngapi omu nzo zaAdamu za kundama eparu lyoge?

Resa Johanesa 3:16, makura zogereni epuro eli:

• Morwasinke Jehova ga tuminine Munendi pevhu?

1. Adamu kwa kere muntu gokusikilira mo, nye apa ga zonene, vantu navenye kuzona ntani kufa

2. Jesus kwa kere muntu gokusikilira mo ogu ga limburukwire Karunga. Age kwa pa mpito vantu yipo ngava ka sikilire mo nokuparuka narunye

4. Vantu navenye kuvhura va gwanene mo uwa monomfa daJesus

VIDIYO: Morwasinke ga fililire Jesus?—Ruha 2 (2:00)

• Ngapi omu nomfa domuntu gumwe nadi vhura kuretera uwa vantu wovanzi?

Resa 1 Timoteusa 2:5, 6, makura zogereni epuro eli:

• Adamu kwa kere muntu gokusikilira mo, nye apa ga zonene, vantu navenye kuzona ntani kufa. Jesus nage kwa kere muntu gokusikilira mo. Nye yisinke ga tu ruganena Jesus?

5. Sizoweseso kuna kara uhwi ou ga ku pa Jehova

Vakaume vaJehova kutara sizoweseso asi uhwi ou ga va pa. Pasihonena, resa Vagarata 2:20, makura zogereni epuro eli:

• Ngapi omu mupositoli Paurusa ga yi likidire asi age kwa tere sizoweseso ngouhwi ou ga mu pa Karunga?

Apa Adamu ga zonene, nage noruvharo rwendi kwa tamekere kufa. Nye Jehova kwa tumine Munendi aya ku fire, yipo ngo ka gwane mwenyo gwanarunye.

Ngomu ono kuresa novelise edi, gazara omu Jehova ga lizuvhire apa Munendi va mu hepekere. Resa Johanesa 19:1-7, 16-18, makura zogereni epuro eli:

• Ngapi ono kulizuvha kweyi ga kuruganena Jehova naJesus?

YINKE ONO LIRONGO?

Jehova kutugusira po nonzo detu morwa nzambo zaJesus, ntani ose ngatu ka gwana mwenyo gwanarunye.

Erugururomo

• Morwasinke ga fililire Jesus?

• Ngapi omu nzambo zaJesus zosizoweseso za kere zokuwapera?

• Ngapi no gwanena mo uwa monomfa daJesus?

MAUZERA GAMWE

Lironga eyi ava tumbwire eparu lyaJesus lyokusikilira mo asi sizoweseso.

“Ngapi omu nzambo zaJesus za kara ‘sizoweseso sovanzi’?” (Sirongwa sokoIntaneta)

Tara eyi wa hepa kurugana yipo ngo ka paruke.

“Ngapi omu Jesus ga zowora vantu?” (Sirongwa sokoIntaneta)

Jehova kuvhura kugusira po nampili nonzo dononene ndi?

“Malimbururo komapuro goBibeli” (Ruhungu, 1 Kudumonkuru 2013)

Lironga omu nzambo zaKristusa za vaterere mugara ogu nga lizuvhu udona.

“Kudiworoka eharo lyange lyomuhowo kwa vatera nge ni lididimikire” (Ruhungu, 15 Pembankuru 2015)