Bibeli kwa demenena koUhompa waKarunga. Jehova nga ka ruganesa Uhompa owo yipo nga ka sikise mo sitambo sendi kevhu. Yisinke Uhompa waKarunga? Ngapi twa yi diva asi Uhompa kuna kupangera? Yisinke wa sikisa mo? Ntani yisinke ngau ka rugana komeho? Mosirongwa esi ntani yirongwa yivali yokukwama ko ngayi limburura mapuro ogo.

1. Yisinke Uhompa waKarunga ntani yilye ogu au pangere?

Uhompa kuna kara epangero eli ga tulisa po Jehova Karunga. Ano Jesus Kristusa yige au pangere kutundilira meguru. (Mateusa 4:17; Johanesa 18:36) Bibeli kuuyunga asi Jesus “nga pangera . . . narunye.” (Rukasa 1:32, 33) NgoMupangeli goUhompa waKarunga, Jesus nga pangera vantu navenye vepevhu.

2. Wolye ava pangere kumwe naJesus?

Jesus kapi a pangere gelike. Vantu “womazimo nagenye nomaraka nonomuhoko nomarudi nagenye, . . . ngava pangera ngohompa evhu nalinye.” (Ehororo 5:9, 10) Vangapi ngava ka pangera naKristusa? Kutunda apa ga wiza Jesus pevhu, vantu wovanzi kwa ya kara varongwa vendi. Nampili ngoso, vantu 144 000 yiwo tupu ngava za meguru va ka pangere naJesus. (Resa Ehororo 14:1-4.) Vakriste wokuhupa ko ngau ka va pangera Uhompa owo.—Episarome 37:29.

3. Ngapi Uhompa waKarunga wa pitakana mapangero govantu?

Nampili ngomu vapangeli ava hetekere ko kurugana yoyiwa, nye kapi va kara nononkondo dokuyisikisa mo nawa-nawa. Konyima kutura po vapangeli vapeke ava ava ligazara tupu nyamwawo ntani awo kapi ava vatere vantu. Nye kwato ogu nga pinganena po Jesus, Mupangeli goUhompa waKarunga. Karunga kwa “tulisa po uhompa ou ngau karerera narunye.” (Ndaniyera 2:44, NW) Jesus nga pangera uzuni naunye ntani age nga hara vantu navenye. Age ga kara neharo nonkenda ntani uhungami. Age nga ronga vantu navenye va litekure monkedi zeharo nombili ntani mouhungami.—Resa Jesaya 11:9.

4. Epangero lyononkondo eli nga li pangera uzuni naunye

Jesus Kristusa ga kara nononkondo kupitakana vapangeli navenye. Resa Mateusa 28:18, makura zogereni epuro eli:

• Ngapi upangeli waJesus wa pitakana upangeli wovantu?

Mapangero govantu kugapinganesera po, ntani ago kapi aga pangere evhu nalinye. Nye ngapi kuhamena Uhompa waKarunga? Resa Ndaniyera 7:14, makura zogereni mapuro aga:

• Morwasinke zina karere mbudi zongwa pokudiva asi Uhompa waKarunga “kapi ngau haga po”?

• Morwasinke zina karere mbudi zongwa pokudiva asi awo ngau pangera uzuni mudima?

5. Upangeli wovantu va hepa kuuhagekesa po

Morwasinke va hepera kupinganesera po mapangero govantu noUhompa waKarunga? Likida VIDIYO, makura zogereni epuro eli nali kwama ko.

VIDIYO: Yisinke Uhompa waKarunga?—Karuhagona (1:41)

• Yisinke ya horoka kutunda apa va tameka kupangera vantu?

Resa Muudisi 8:9, makura zogereni mapuro aga:

• Nove ono hara Uhompa waKarunga ngau pinganene po mapangero govantu ndi? Morwasinke?

6. Vapangeli woUhompa waKarunga kutukwata egano

Mokumona asi Hompa gwetu Jesus kwa kere muntu, age “kupakera mbili maupirankondo getu.” (Vahebeli 4:15) Jehova kwa horowora vagara novakadi 144 000 va ka pangere naJesus. Awo kwa tundilira ‘momazimo nagenye nomaraka nonomuhoko nomarudi nagenye.’—Ehororo 5:9.

• Ngapi ono kulizuvha pokudiva asi Jesus nava ngava ka pangera kumwe nage kukwata egano malizuvho getu nomaudigu getu? Morwasinke?

7. Noveta doUhompa waKarunga nongwa

Mapangero kutulisa po noveta yipo di popere vantu. Uhompa waKarunga nawo kwa kara nonoveta edi va hepa kukwama vantu. Resa 1 Vakolinte 6:9-11, makura zogereni mapuro aga:

• Ngapi ono kugazara omu ngau fana uzuni apa vantu navenye ngava kwama noveta daKarunga?a

• Morwasinke Jehova ana kundindilira vantu va limburukwe konoveta doUhompa?

• Yisinke yina kulikida asi vantu ava ava dili kulimburukwa konoveta edi kuvhura va litjindje?—Tara velise 11.

YINKE ONO LIRONGO?

Uhompa waKarunga kuna kara epangero eli nga li pangera uzuni mudima.

Erugururomo

• Wolye ava pangere kumwe naJesus?

• Ngapi upangeli waJesus wa pitakana upangeli wovantu?

• Yininke musinke yimwe eyi a ndindire ko Jehova kovantu ava au pangere Uhompa?

MAUZERA GAMWE

Tara eyi ga rongere Jesus kuhamena oku wa kara Uhompa.

“Uhompa waKarunga kwa kara momutjima goge ndi?” (Sirongwa sokoIntaneta)

Morwasinke Nombangi daJehova adi limburukwire Uhompa waKarunga kupitakana upangeli wovantu?

Awo kulimburukwa po Uhompa waKarunga (1:43)

Lironga eyi azi uyunga Bibeli kuhamena vantu 144 000 ava a horowora Jehova ngava ka pangere kumwe naJesus.

“Wolye ava zi meguru?” (Sirongwa sokoIntaneta)

Yisinke ya ninkisire mukadi ogu ga kere modorongo ayi pure asi Karunga yige gelike nga kohonona po maudigu govantu?

“Omu na gwene elimbururo eyi pevhu pwa karera udona” (Awake!, Mangundu 2011)

Uhompa waKarunga kwa tamekere kupangera meguru momvhura 1914. Momvhura ozo yimo ga tamekere mazuva gopouhura. Ngapi twa yi diva? Konakona uporofete womoBibeli neyi yina kuhoroka mouzuni, ntani nonkareso zovantu kutundilira mo-1914.

1. Yisinke za pumba Bibeli?

Ndaniyera kwa pumbire asi Uhompa waKarunga ngau tameka kupangera kehagero ‘lyonomvhura ntano-nambali.’ (Ndaniyera 4:16, 17) Konyima zonomvhura dononzi, Jesus kwa tumbwire nomvhura odo asi “siruwo” sonomuhoko ntani age kwa rongere asi simpe kapi sa pwa. (Rukasa 21:24) Ngomu natu ka yi lironga, nomvhura ntano-nambali kwa hege momvhura 1914.

2. Yisinke ya horoka mouzuni kutundilira mo-1914?

Jesus kwa mu pulire varongwa vendi asi: “Sidiviso sewizo lyoge nesi souhura wouzuni sipi so?” (Mateusa 24:3) Jesus kwa va tanterere eyi ngayi horoka konyima zapa nga tameka kupangera meguru ngaHompa goUhompa waKarunga. Yininke yimwe eyi nga yi horoka kuna kara yita, erumbu ntani makankamo gevhu. (Resa Mateusa 24:7.) Bibeli kwa pumba hena asi nkareso zovantu ‘wopomazuva gopouhura’ ngazi ninkisa eparu li digope unene. (2 Timoteusa 3:1-5) Yininke eyi kwa tameka kuligwederera unene kutundilira mo-1914.

3. Morwasinke ga donapera maukaro kutunda apa wa tameka kupangera Uhompa waKarunga?

Konyima zapa Jesus ga tamekere kupangera ngaHompa goUhompa waKarunga, age kwa rwisire Satana nonompepo donondona. Satana kwa mu fundire. Bibeli kwa tanta asi: “Alyo [Satana] kuna li zugumine pevhu, kuna li zugumine po kumwe novaengeli valyo.” (Ehororo 12:9, 12) Satana ana handuka, morwa ga yi diva asi ngava ka mu zonagura po. Eyi yiyo a retesere po ruhepo nomaudigu gomanzi. Eyi kutuvatera tu kwate egano eyi gana donapere maukaro gomouzuni. Nye Uhompa waKarunga ngau ya gusa po maudigu nagenye aga.

LIRONGA KO YOYINZI

4. Yihorokwa yomoBibeli kulikida asi Uhompa waKarunga kwa tamekere kupangera mo-1914

VIDIYO: Uhompa waKarunga kwa tamekere kupangera mo-1914 (5:02)

Karunga kwa ninkisire hompa Nebukadenesara a rote nzodi kuhamena eyi ngayi horoka komeho. Nzodi ozo ntani neyi ga fatwilire Ndaniyera, kulikida asi uporofete owo kwa tamba koupangeli waNebukadenesara ntani koUhompa waKarunga.—Resa Ndaniyera 4:17.a

Resa Ndaniyera 4:20-26, makura ruganesa efano o limburure mapuro aga gana kukwama ko:

• (A) Yisinke ga mwene Nebukadenesara monzodi zendi?—Tara velise 20 ntani 21.

• (B) Yisinke ngayi horokera sitji?—Tara velise 23.

• (C) Yisinke ngayi horoka kehagero lyonomvhura “ntano-nambali”?—Tara velise 26.

Omu nzodi zokuhamena sitji za likwatakana noUhompa waKarunga

UPOROFETE (Ndaniyera 4:20-36)

Upangeli

(A) Emutji lyemunene

Upangeli tau haga

(B) “Sitji si teteni po,” ntani pa pite “nomvhura ntano-nambali”

Upangeli tava u tengwidire po

(C) “Ngo kara hena hompa”

Apa wa hovere kusika mo uporofete ou . . .

• (D) Yilye sa fanekesere sitji?—Tara velise 22.

• (E) Ngapi va u hagekesere po upangeli wendi?—Resa Ndaniyera 4:29-33.

• (F) Yisinke ya horokerere Nebukadenesara kehagero ‘lyonomvhura ntano-nambali’?—Resa Ndaniyera 4:34-36.

OMU WA HOVERE KUSIKA MO

Upangeli

(D) Nebukadenesara, hompa gwaBabironi

Upangeli tau haga

(E) Konyima zomvhura 606 B.C.E., Nebukadenesara kwa zarukire ntani kapi ga vhulire kupangera nomvhura ntambali

Upangeli tava u tengwidire po

(F) Nebukadenesara ta kara gomuwaawa, ta tameke kupangera hena

Apa wa ya sikire mo uporofete ou sikando sauvali . . .

• (G) Yilye sa fanekesere sitji?—Resa 1 Histoli 29:23.

• (H) Ngapi va u hagesere po upangeli wawo? Ngapi twa yi diva asi apa Jesus ga kere pevhu, upangeli wawo simpe kwa u hagekesere po?—Resa Rukasa 21:24.

• (I) Siruwoke ntani kupi va u tengwidilire po upangeli?

OMU WA YA SIKILIRE MO SIKANDO SAUVALI

Upangeli

(G) Vahompa woVaisraeli ava va fanekesere upangeli waKarunga

Upangeli tau haga

(H) Jerusarema tava zi zonagura po, upangeli woVaisraeli tava u hagekesa po ure wonomvhura 2 520

Upangeli tava u tengwidire po

(I) Jesus ta tameke kupangera ngaHompa goUhompa waKarunga

5. Uzuni kwa runduruka kutundilira mo-1914

Likida VIDIYO.

VIDIYO: Uzuni kwa runduruka kutundilira mo-1914 (1:10)

Jesus kwa pumbire eyi ngayi horoka mouzuni apa nga tameka kupangera. Resa Rukasa 21:9-11, makura zogereni epuro eli:

• Yihorokwa musinke wa mona ndi wa zuvha?

Mupositoli Paurusa kwa tanta omu vantu ngava kara pomazuva gopouhura. Resa 2 Timoteusa 3:1-5, makura zogereni epuro eli:

• Nkareso musinke ono kumona movantu naina?

6. Uhompa waKarunga ou una kupangera kutukorangeda

Resa Mateusa 24:3, 14, makura zogereni mapuro aga:

• Sirugana musinke somulyo esi sina kulikida asi Uhompa waKarunga kuna kupangera?

• Ngapi no lihameka mosirugana esi?

Uhompa waKarunga kuna kupangera ngesi ntani ntaantani ngau tameke kupangera pevhu. Resa Vahebeli 10:24, 25, makura zogereni epuro eli:

• Yisinke natu rugana natuvenye “pokumona asi ezuva lyaHompa tali hedere pepi”?

YINKE ONO LIRONGO?

Uporofete noyihorokwa yomoBibeli ntani nomaukaro gomouzuni kulikida asi Uhompa waKarunga kuna kupangera. Ose kulikida asi twa yi pura oyo apa atu zuvhisa kuhamena Uhompa nokuza komapongo.

Erugururomo

• Yisinke ya horoka kehagero lyonomvhura ntano-nambali edi va pumbire mobuke zaNdaniyera?

• Yisinke yina kukuninkisa o yi pure asi Uhompa waKarunga kwa tamekere kupangera mo-1914?

• Ngapi no yi likida asi Uhompa kuna kupangera ngesi?

MAUZERA GAMWE

Tara eyi va uyunga vatjangi wohistoli ntani navamwe kuhamena omu ya runduruka yininke kutundilira 1914.

“Omu nkareso zovantu za donapere” (Awake!, Kudumogona 2007)

Resa uporofete ou wa kara mwaMateusa 24:14 omu wa kundamene mugara gumwe.

“Ame kwa here unene udano wobaseball kupitakana nkenye eyi!” (Ruhungu No. 3 2017)

Ngapi twa yi diva asi uporofete ou wa kara mwaNdaniyera megaununo 4 kwa tamba koUhompa waKarunga?

“Siruwoke wa tamekere kupangera Uhompa waKarunga? (Ruha 1)” (Ruhungu, 1 Mangundu 2014)

Yisinke ayi likida asi “nomvhura ntano-nambali” edi va tumbura mwaNdaniyera kwa hege mo-1914?

“Siruwoke wa tamekere kupangera Uhompa waKarunga? (Ruha 2)” (Ruhungu, 1 Murongagona 2015)

Uhompa waKarunga wa tameka kupangera meguru. Awo ntaantani tupu ngau ka rete marunduruko pevhu. Tu zeni tu ka zogere yininke yimwe yoyiwa eyi ngau ka rugana Uhompa waKarunga.

1. Ngapi Uhompa waKarunga ngau ka reta mbili nouhungami pevhu?

Jesus, Hompa goUhompa waKarunga nga ka zonagura po vadinikarunga nomapangero poyita yaHarumagedoni. (Ehororo 16:​14, 16) Posiruwo oso, etumbwidiro lyomoBibeli eli asi: “Karuwogona tupu ko, mudinikarunga ta dongonoka po,” nga li ka sika mo. (Episarome 37:​10) Kupitira moUhompa, Jesus nga ka reta mbili nouhungami pevhu.​—Resa Jesaya 11:4.

2. Ngapi nga li fana eparu apa mpango zaKarunga ngazi sika mo pevhu?

Apa Uhompa waKarunga ngau tameka kupangera pevhu, “muhungami nga gusa sirongo nga tunge mo narunye-narunye.” (Episarome 37:​29) Gazara tupu omu ngau fana uzuni apa nga mu kara vantu wovahungami ava va lihara ntani va hara Jehova. Kwato ogu nga vera, ntani vantu navenye ngava paruka narunye.

3. Yisinke ngau rugana Uhompa waKarunga konyima zapa ngava zonagura po vadinikarunga?

Konyima zapa ngava zonagura po vadinikarunga, Jesus nga pangera nomvhura 1 000. Posiruwo oso, Jesus novapangeli 144 000 ngava vatera vantu vepevhu va sikilire mo. Konyima zonomvhura odo, evhu nga li ka kara paradisa ntani nga mu kara vantu woruhafo, morwa awo kulimburukwa noveta daJehova. Jesus nga ka tengwida upangeli koGuhwe, Jehova. Posiruwo oso, edina lyaKarunga Jehova ngava ka ‘li pongora.’ (Mateusa 6:9, 10) Ayo nga yi ka likida asi Jehova Mupangeli gomuwa ogu a pakere mbili vantu vendi. Jehova nga ka zonagura po Satana nonompepo donondona ntani nava ngava dira kulimburukwa koupangeli wendi. (Ehororo 20:7-10) Mauwa aga ngau reta Uhompa waKarunga nga ga karerera narunye.

LIRONGA KO YOYINZI

4. Uhompa waKarunga ngau hagekesa po mapangero govantu

“Mouzuni omu mwa kara vanankondo ava ava hepekere mo vakwaawo.” (Muudisi 8:9) Kupitira moUhompa wendi, Jehova nga ka gusa po udona owo.

Resa Ndaniyera 2:​44; 2 Vatesaronika 1:​6-8, makura zogereni mapuro aga:

• Yisinke nga ka rugana Jehova naJesus komapangero govantu ntani novantu ava ava ga kwatesa ko?

• Ngapi eyi ono lirongo kuhamena Jehova naJesus nayi kuvatera o dive asi awo ngava ka rugana youhunga?

5. Jesus kuna kara Hompa gomuwa

NgaHompa goUhompa waKarunga, Jesus nga ruganena vantu yininke yoyiwa yokulisiga-siga. Likida VIDIYO o tare omu Jesus ga likidire asi age ga kara neharo ntani nononkondo dokuvatera vantu.

VIDIYO: Jesus kwa likidire eyi ngau ka rugana Uhompa (1:13)

Apa ga kere pevhu, Jesus kwa likidire eyi ngau ka rugana Uhompa. Mauwa musinke vana tumbura apa aga ono kundindira? Resa matjangwa aga naga tu vatere tu dive yoyinzi kuhamena mauwa aga.

6. Uhompa waKarunga ngau ka reta eparu lyewa

VIDIYO: Yininke yimwe eyi ngatu ka hafera (4:38)

Resa Episarome 145:​16, makura zogereni epuro eli:

• Ngapi ono kulizuvha pokudiva asi Jehova nga ka ‘kutika’ yisitwa nayinye?

YINKE ONO LIRONGO?

Uhompa waKarunga ngau ka sikisa mo eyi ga hara Karunga. Awo ngau ka rundurura evhu li kare paradisa omu nga mu kara vantu wovawa ava ngava karera Jehova narunye.

Erugururomo

• Ngapi Uhompa waKarunga ngau pongora edina lyaKarunga Jehova?

• Morwasinke natu yi pulira asi Uhompa waKarunga ngau ka sikisa mo matumbwidiro gomoBibeli?

• Uwa musinke ono hara kukamona ou ngau ka sikisa mo Uhompa waKarunga?

MAUZERA GAMWE

Lironga eyi azi tanta Harumagedoni.

“Yisinke yita yaHarumagedoni?” (Sirongwa sokoIntaneta)

Konakona eyi ngayi horoka posiruwo sonomvhura 1 000 ntani konyima zepangero lyaJesus.

“Yisinke ngayi horoka mEzuva lyoMpanguro?” (Ruhungu, 1 Sikukutu-Sindimba 2012)

Tara omu mapata naga vhura kugazadara ko komauwa aga ngau ka reta Uhompa waKarunga.

Gazara asi moParadisa ono kara (1:​50)

Resa esimwititi “Ame ngani lipura mapuro gomanzi,” o lironge omu ga gwene munapolitika gumwe malimbururo aga nga papara.

“Bibeli kurundurura eparu lyovantu” (Ruhungu, 1 Murongagona 2012)