Kara nehuguvaro asi Jehova nga ku hengagwida

1. Ngapi omu lya fene eparu lyoVajuda ava va kere mounkwate waBabironi?

GAZADARA ko kuhamena omu va lizuvhire Vajuda ava va kere mounkwate waBabironi. Awo va mwene omu sirongo sawo va si zonagwire po. Nonzo dawo ntani nedi dovazinyakurwawo, kwa va ninkisire yipo vava guse mo momambo gawo noku va twara kosirongo sapeke. (2 Hist. 36:15, 16, 20, 21) Yimo, apa va kere moBabironi, awo kwa kere noumanguruki wokurugana yininke yankenye ezuva. (Jer. 29:4-7) Nye nampili ngoso, eparu kapi lya kere ureru ntani olyo kapisi yilyo eparu va here. Ngapi omu va lizuvhire kuhamena ukaro wawo? Tu tareni eyi ga uyungire Mujuda gumwe ogu ga kere mounkwate owo. Age kwa uyungire asi: “Ponomukuro daBabironiya yiyo twa hingilire oku tatu lili nsene tu diworoka Siyoni.” (Epis. 137:1) Vajuda ava va kere mounkwate va hepere ehengagwido. Nye yilye ngano ga hepere kuvahengagwida?

2-3. (a) Yisinke Jehova ga ruganenene Vajuda ava va kere mounkwate? (b) Yisinke natu ka zogera mosirongwa esi?

² Jehova kuna kara “Karunga ogu a hengagwida vantu momaudigu nagenye.” (2 Kol. 1:3) Mokumona asi age Karunga geharo, age ana hara kuhengagwida vakareli vendi navenye. Jehova ga yi divire asi vamwe ava va kere mounkwate ngava litezurura ntani noku tameka kumukarera. (Jes. 59:20) Nomvhura dokupitakana po-100 komeho Vajuda vaya va tware mounkwate waBabironi, Jehova kwa tanterere Jesaya yipo a tjange mbudi kuhamena Vajuda ava va ya kere mounkwate. Buke ezi ga tjenge kuzitumbura asi buke zaJesaya. Sitambo musinke sobuke ozo? Jesaya kwa uyungire asi: “‘Hengagwida vantu vange,’ yimo ana kutanta Karunga. Va hengagwida!” (Jes. 40:1) Kupitira mobuke zaJesaya, Jehova kwa hengagwidire Vajuda ava va kere mounkwate.

³ Ngwendi Vajuda ava va kere mounkwate, nose twa hepa ehengagwido poyiruwo yimwe. Mosirongwa esi, tatu ka zogera nonkedi ntatu omu Jehova ga hengagwidire Vajuda ava va kere mounkwate: (1) Age kwa tumbwidilire asi nga gusira po Vajuda ava va litezwilire, (2) age kwa geve ehuguvaro kovantu vendi ntani (3) age kwa va vaterere yipo va dire kukara nowoma. Natu ka zogera hena omu Jehova a tu hengagwida neina monkedi zokulifana.

JEHOVA KUGUSIRA PO

4. Ngapi omu Jehova ga yi likidire asi age Karunga ogu ga kara nonkenda zonene? (Jesaya 55:7)

⁴ Jehova “Guhya ogu ga kara nonkenda zonene.” (2 Kol. 1:3) Age kwa likidire sikara oso apa ga tumbwidilire Vajuda ava va kere mounkwate asi nga va gusira po. (Resa Jesaya 55:7.) Age kwa uyungire asi: “Eharo lyange ngani li ku likida narunye.” (Jes. 54:8) Ngapi omu Jehova ga likidire nkenda? Nampili ngomu Vajuda va hepere morwa yitundwamo yoyirugana yawo, Jehova kwa va tumbwidilire asi kapi ngava kara moBabironi dogoro narunye. Awo ngava kara mounkwate siruwo sosisupi. (Jes. 40:2) Nonkango edi kwa hengagwidire Vajuda ava va litezwilire.

5. Morwasinke twa karere nonokonda dononzi asi Jehova kutugusira po nonzo detu?

⁵ Yisinke tuna kulirongera ko? Jehova ana hara kugusira po vakareli vendi. Neina ose tuna kara nonokonda dononzi deyi natu yi pulira asi Jehova kuvhura a tu gusire po. Morwasinke? Morwa twa diva eyi ga rugana Jehova yipo a tu gusire po nonzo detu. Konyima zonomvhura 100 kutunda apa Jesaya ga tjenge mauporofete gendi, Jehova yipo ga tumine Munendi pevhu a ya tu fire. Nzambo zaJesus kwa ninkisa nonzo detu va di tu “dongwenene po.” (Yirug. 3:19; Jes. 1:18; Efe. 1:7) Yosili ose kukarera Karunga gonkenda.

6. Ngapi omu natu gwanena mo mauwa kweyi Jehova a tu gusire po? (Tara hena efano.)

⁶ Nonkango daJehova edi da kara mwaJesaya 55:7, kuvhura kutuhengagwida nsene asi ose kulizuvha unzoni. Vamwe vetu kuvhura ngatu twikire kulizuvha unzoni komapuko aga twa tulire nare, nampili ngomu twa litezurura. Unene po ose kuvhura kutwikira kulizuvha unzoni nsene kuna kuligwanekera nomaudigu gokutundilira komapuko aga twa rugana. Nye nampili ngoso, nsene tuna tanta nonzo detu ntani noku hageka kurugana yininke yoyidona, ose kuvhura kukara nehuguvaro asi Jehova ga tu gusira po. Ntani apa Jehova a tu gusire po, age kapi a diworoka nonzo detu. (Hetakanesa Jeremiya 31:34.) Nsene asi Jehova kapi a diworoka nonzo detu danare, nose ngano kapisi tu di diworoke. Yomulyo po kwaJehova kuna kara eyi tuna kurugana ngesi, nye kapisi mapuko aga twa tulire nare. (Hes. 33:14-16) Ntani ntaantani Guhyetu gonkenda zonene a ka gusilire po maudigu aga atu ligwanekere nago morwa nonzo detu.

7. Yisinke nayi tu tumangeda tu tantere vakuronambunga nsene tuna tura nzo zonene?

⁷ Yisinke natu rugana nsene ose kuna kulizuvha unzoni morwa nzo ezi twa horeka? Bibeli kututantera tu pure evatero kovakuronambunga. (Jak. 5:14, 15) Nye nampili ngoso, ayo kapisi ureru tu va tantere eyi twa rugana. Nsene twa litezurura ntani nsene tu diworoka asi Jehova kwa tura po vagara owo yipo va tu vatere, ayo ngayi tu tumangeda tu va hedere. Tu tareni omu Jehova ga hengagwidire munazinyetu gomugara Arthur,a ogu lya pangwire ezwi lyendi lyokomutjima. Arthur kwa tente asi: “Ame kwa tarerere mafano goruhonda ure womvhura. Nye konyima zapa na purakenene siuyungwa sokuhamena ezwi lyokomutjima, ame kwa tanterere mukadange nzo zange ntani novakuronambunga. Konyima zoyo ame kwa lizuvhire hansako, nye simpe na guvire. Vakuronambunga kwa diworokesere nge asi Jehova kapi ga zumbire nge. Age kutupukurura morwa ga tu hara. Nonkango dawo donongwa kwa hengagwidire nge ni dimburure asi Jehova ga gusilire nge po.” Arthur ngesi kuna kara muzuvhisi gokukarerera ntani mukwafimbunga. Ayo kuhengagwida pokudiva asi Jehova kutugusira po apa atu litezurura!

JEHOVA KUTUPA EHUGUVARO

8. (a) Ehuguvaro musinke ga pere Jehova Vajuda ava va kere mounkwate? (b) Kuliza naJesaya 40:29-31, ngapi omu ehuguvaro lya kundamene Vajuda ava va litezwilire?

⁸ Vajuda kwa gazarere asi kapi ngava tengura kosirongo sawo. Morwa epangero lyaBabironi lyononkondo uzuni mudima kwa divikwire asi kapi ngali mangurura nonkwate. (Jes. 14:17) Nye nampili ngoso, Jehova kwa geve ehuguvaro kovantu vendi. Age kwa tumbwidilire asi nga mangurura vantu vendi ntani kwato eyi ya vhulire kumukondera. (Jes. 44:26; 55:12) Jehova kwa tere Babironi ngwendi mbundu. (Jes. 40:15) Nsene o fuda mbundu, azo kudongonoka po. Eyi kwa lifana nomu Jehova ga mangwilire vantu vendi moBabironi. Ngapi omu ehuguvaro eli lya vaterere Vajuda? Ehuguvaro eli ngano lya va hengagwidire unene. Jesaya kwa tente asi: “Ava ava huguvara ekwafo lyaHOMPA ngava gwana nonkondo.” (Resa Jesaya 40:29-31.) Ehuguvaro olyo ngali va pa nonkondo; “Ngava tukisa mavava ngwendi makuvi.”

9. Yisinke ya ninkisire Vajuda ava va kere mounkwate va huguvare momatumbwidiro gaJehova?

⁹ Jehova kwa pere Vajuda ava va kere mounkwate konda zeyi nava huguvarera momatumbwidiro gendi. Konda musinke ga va pere? Gazadara ko kuhamena mauporofete aga ga sikire mo aga va divire nare. Pasihonena, awo va yi divire asi Vaasiliya va fundire uhompa wokoMuzogo waIsraeli ntani nokutwara vantu mounkwate. (Jes. 8:4) Awo vamwene apa Vababironi va zonagwire Jerusarema nokutwara vantu vawo mounkwate. (Jes. 39:5-7) Awo va mwene omu hompa Sedekiya va mu twizire meho noku mu twara moBabironi. (Jer. 39:7; Hes. 12:12, 13) Nayinye eyi ga pumbire Jehova kwa sikire mo. (Jes. 42:9; 46:10) Yininke nayinye eyi kwa va vaterere va yi pure nawa-nawa asi Jehova nga sikisa mo etumbwidiro lyendi lyokuvamangurura mounkwate!

10. Yisinke nayi tu vatera tu nkondopeke epuro lyetu poyiruwo eyi yoyidigu?

¹⁰ Yisinke tuna kulirongera ko? Apa atu guwu, ehuguvaro lyokomeho kuvhura kutuhengagwida ntani noku tu pa nonkondo. Ose kuna kuparuka moyiruwo yoyidigu ntani nonkore daKarunga kuna kuturwanesa. Nye nampili ngoso, kapisi yi tu dompese. Jehova kwa tu tumbwidira asi ngatu ka paruka narunye moparadisa omu nga mu kara mbili ntani mwa hana siponga. Twa hepa kudemenena kehuguvaro olyo. Nsene tu dira kuyirugana, ehuguvaro lyetu kuvhura li ya fane ngwendi evango lyewa eli tuna kudira kumona nawa morwa kuna kulitarera pekende lyokunyata. Ngapi omu natu nkondopeka ehuguvaro lyetu? Kuvhura tu litulire po siruwo nkenye apa sokuteda ko kuhamena omu eparu ngali ka wapa mouzuni woupe. Kuvhura tu rese yirongwa nokutarera novidiyo ntani nokupurakena kononsumo edi da zogera kuhamena ehuguvaro. Ntani kuvhura tu kanderere kwaJehova pokumutantera kuhamena matumbwidiro aga tuna kundindira kukamona moparadisa.

11. Yisinke ya vaterere munazinyetu gumwe ogu ga kere nouvera wounene yipo a gwane nonkondo?

¹¹ Tu zeni tu tare omu ehuguvaro lya hengagwidire munazinyetu gomukadi Joy ogu ga kere nouvera wounene. Age kwa uyunga asi: “Apa ani kara nomaudigu gomanzi, ame kutantera Jehova omu nina kulizuvha ntani nayi diva asi na kwata nge egano. Jehova kwa pa nge ‘nonkondo edi va dira kukara nado vantu.’” (2 Kol. 4:7) Joy kulimona mwene mouzuni woupe omu nga mu dira kukara ogu “nga sivana asi ta vere.” (Jes. 33:24) Nsene nose tu tantera Jehova omu tuna kulizuvha ntani noku demenena kehuguvaro lyetu lyokomeho, ose ngatu gwana nonkondo yipo ngatu vhure kulididimikira maudigu.

12. Nokonda musinke twa kara nado deyi natu huguvarera momatumbwidiro gaJehova? (Tara hena efano.)

¹² Ngwendi moomu Jehova ga yi rugene koVajuda ava va kere mounkwate, nose ga tu pa nokonda dononzi deyi natu huguvarera momatumbwidiro gendi. Gazadara ko kuhamena mauporofete aga tuna kumona omu gana kusika mo. Pasihonena, ose kumona epangero lyaAmerika naBritaniya, oru rwa kara ‘ruha rumwe nonkondo, ano oru rumwe kapi rwa paka nonkondo.’ (Ndan. 2:42, 43) Ose hena kuzuvha “makankamo gevhu komavango gokulisiga-siga,” ntani kuzuvhisa mbudi zongwa “konomuhoko nadinye.” (Mat. 24:7, 14) Mauporofete aga ntani nagamwe kutuvatera tu huguvare nawa-nawa asi matumbwidiro gaJehova ngaga ka sika mo.

JEHOVA KUTUVATERA TU DIRE KUKARA NOSINKA

13. (a) Maudigu musinke ngano va vhulire kuligwanekera nago Vajuda apa va kere pepi nokuvagusa mounkwate? (b) Ngwendi moomu va yi tumbura mwaJesaya 41:10-13, ngapi omu Jehova ga hengagwidire Vajuda ava va kere mounkwate?

¹³ Nampili ngomu Jehova ga hengagwidire Vajuda ava va kere mounkwate pokuvapa ehuguvaro lyewa lyokomeho, age ga yi divire asi awo ngava ligwanekera nomaudigu apa ngava mangurura mo mounkwate. Age kwa pumbire asi hompa gumwe gononkondo nga homokera nokukwata yirongo eyi ya kundurukidire Babironi ntani nositata saBabironi sene. (Jes. 41:2-5) Nomvhura dononzi komeho yi ya horoke oyo, Jehova kwa hengagwidire vantu vendi pokuvatantera asi: “Wa ha tjira – ame noge na kara! Ame nyame Karunga goge – patupu yokukutjilisa.” (Resa Jesaya 41:10-13.) Yisinke ga tembe Jehova apa ga uyungire asi “Ame nyame Karunga goge”? Age kapi ga tanterere Vajuda asi ngano va mu karere, morwa oyo yiyo ngava rugana. Nye age kwa va diworokesere asi nawo ga kere ntani nga va vatera.​—Epis. 118:6.

14. Ngapi omu Jehova ga vaterere hena Vajuda va dire kukara nowoma?

¹⁴ Jehova kwa vaterere hena Vajuda pokuvadiworokesa asi age kwa kara nononkondo dononene ntani nounongo wounzi. Age kwa tanterere Vajuda ava va kere mounkwate va tare nombungururu keguru. Age kwa va tanterere hena asi age kwa sita nombungururu, nye hena ga di diva nadinye komadina gado. (Jes. 40:25-28) Nsene asi Jehova ga diva madina gonombungururu nadinye, eyi kutanta asi age ga diva edina lyankenye mukareli gwendi. Ntani nsene Jehova ga kara nononkondo dokusita nombungururu, eyi kutanta asi ga kara hena nononkondo dokuvatera vakareli vendi. Yosili Vajuda ava va kere mounkwate kapi va kere ngano nokonda zokukara nosinka ndi nowoma.

15. Ngapi omu Jehova ga wapaikire Vajuda kweyi ya va ndindilire komeho?

¹⁵ Jehova kwa tanterere hena vantu vendi va liwapaikire kweyi ya ya horokere komeho. Ketamekero lyobuke zaJesaya, Jehova kwa tanterere vantu vendi asi: “Hwilireni mononzugo deni, vantu vange, zedireni ko mavero geni. Vandeni tanko noku nali pwa ehandu lyaKarunga.” (Jes. 26:20) Nampo Vajuda kwa tulire mapukururo ogo pasirugana apa Hompa Koresi ga homwene Babironi. Mulirongi gumwe goMugereka gomosiruwo sanare kwa uyungire asi apa Koresi ga hwililire moBabironi “age kwa tanterere [vakwayita vendi] va dipage nkenye muntu ogu ana kara ponze.” Gazara tupu woma ou va kere nawo vantu ava va tungire moBabironi. Ayo kumoneka asi Vajuda nampo kwa parukire morwa kukwama mavyukiso gaJehova.

16. Morwasinke natu dilira kukara nowoma kweyi ngayi horoka komeho? (Tara hena efano.)

¹⁶ Yisinke tuna lirongere ko? Ntaantani ngatu ligwanekere noudigu wounene ou wa dira kuhoroka rumwe pevhu. Apa ngau tameka, vantu ngava piyagana nokutukuka. Nye vantu vaJehova kapi ngava tukuka morwa twa yi diva asi Jehova Karunga gwetu. Ose ngatu kara nouradi morwa ‘ezoworo lyetu ngali hedera pepi.’ (Ruk. 21:28) Nampili apa Gogo zaMagogo nga tu homokera, ose ngatu twikira kuhuguvara mwaJehova. (Hes. 38:18) Jehova nga tu pa vaengeli va tu popere ntani nomavyukiso aga ngatu vhura kukwama yipo tu paruke. Ngapi omu ngatu vhura kugwana mavyukiso ogo? Kapi tuna diva simpe. Nye nampili ngoso, ayo kumoneka asi ngatu gwana mavyukiso ogo kupitira monombungakriste detu. Nombungakriste nga di fana ngwendi ‘nonzugo detu’ edi nga di tu popera. Ngapi omu natu liwapaikira yihorokwa yokomeho? Twa hepa kuhara unene vanavazinyetu nokulimburukwa mavyukiso gokutunda kombunga zaJehova ntani twa hepa kuyipura asi Jehova yige ana kupitisira mbunga zetu.​—Heb. 10:24, 25; 13:17.

17. Yisinke no rugana yipo Jehova a ku hengagwide?

¹⁷ Nampili ngomu Vajuda ava va kere mounkwate va kere moudigu wounene, Jehova kwa va hengagwidire. Eyi kulikida asi Jehova nga tu hengagwida nose. Yi kare asi yisinke ngo ligwanekera nayo, kara nehuguvaro asi Jehova nga ku hengagwida. Kara nehuguvaro asi nga ku gusira po. Nkondopeka ehuguvaro lyoge. Ntani diworoka asi Jehova Karunga goge, kwato eyi no vhura kutjira.