Edina lyaKarunga Jehova kwa kara nomulyo kwaJesus

1-2. (a) Yisinke ga rugene Jesus masiku gendi gokuhulilira pevhu komeho va ka mu dipage? (b) Mapuro musinke natu ka zogera mosirongwa esi?

MO-14 Nisani moUne kongurova, Jesus kwa lire Murarero gwaHompa kumwe novapositoli vendi wovalimburukwi. Age ga yidivire asi ntaantani Judasa a ka mu horore ntani noku kamuhepeka nonkore dendi noku mu dipaga. Apa va mene kulya, Jesus kwa korangedere vapositoli vendi. Komeho va katauke navenye, age kwa kanderere ekanderero lyomulyo. Ekanderero olyo kuligwana mwaJohanesa egaununo 17.

² Sinka musinke ga kere naso Jesus esi ga tumbwire mekanderero lyendi? Ngapi ekanderero olyo lya likidire yininke eyi ya kere nomulyo kwaJesus apa ga kere pevhu? Tu zeni tu ka gwane malimbururo.

“NA VA DIVISA EDINA LYOGE”

3. Yisinke ga uyungire Jesus kuhamena edina lyaKarunga Jehova ntani yisinke ga tembe? (Johanesa 17:6, 26)

³ Jesus kwa kanderere asi: “Ame na va divisa edina lyoge.” Age kwa rugurukire kuuyunga nonkango odo yikando yivali. (Resa Johanesa 17:6, 26.) Yisinke ga tembe Jesus apa ga uyungire nonkango odo? Ngoso age kwa tanterere varongwa vendi eyi ali tanta edina Jehova ndi? Hawe! Varongwa vendi va divire nare asi edina lyaKarunga yilyo Jehova, morwa alyo kwa monekere yikando yoyinzi moMatjangwa goRuhebeli. Jesus kapi ga tembe eyi ali tanta edina lyaKarunga, nye age kwa tembe asi Jehova age Karunga musinke. Jesus kwa vaterere varongwa vendi va dive nawa Jehova pokuvaronga sitambo sendi kovantu nekevhu neyi ga rugana ntani noyikara yendi. Nayinye eyi ga rongere kulikida asi Jesus gelike ga diva nawa Jehova.

4-5. (a) Gava sihonena eyi ayi tanta kudiva muntu? (b) Yisinke yavaterere varongwa vaJesus va dive nawa Jehova?

⁴ Pasihonena, tu tante asi mombungakriste zeni mwa kara mukuronambunga gedina David ogu mwa lidiva nendi siruwo sosire ntani age ndokotora gokutaura. Makura ezuva limwe tava kudukisire kosipangero esi a rugana ndokotora ogo yipo va ka kutaure, makura ta ku taura yipo a kupopere o paruke. Kutunda ezuva olyo ove ngo hara unene munazinyetu ogo ntani nkenye apa ngo zuvha edina lyendi, ngo diworoka omu ga ku vatera. David kapisi mukuronambunga tupu, nye age hena ndokotora.

⁵ Mokulifana, varongwa vaJesus va divire nare edina lyaJehova, nye apa Jesus gaya va rongere awo va divire nawa Jehova. Morwasinke tuna kuuyungira ngoso? Morwa Jesus kwa honenene oGuhwe mwanayinye eyi nga rugana ntani neyi nga uyunga. Apa varongwa va purakenene monkedi omu nga rongo Jesus nokumona omu nga tekura nawa vantu, ayo kwava vaterere va dive nawa Jehova.​—Joh. 14:9; 17:3.

“EDINA LYOGE ELI WA PA NGE”

6. Yisinke ga tembe Jesus apa ga uyungire asi Jehova kwa mu pere edina lyendi? (Johanesa 17:11, 12)

⁶ Apa Jesus ga kanderere po varongwa vendi age kwa tente asi: “Va takamesa medina lyoge eli wa pa nge.” (Resa Johanesa 17:11, 12.) Eyi kutanta asi Jesus kwa ya mu rukire hena edina lyaJehova ndi? Hawe. Jesus kapi va mu rukire edina olyo. Yinke nye ga tembe apa ga uyungire asi edina lyaKarunga kwa li mu pere? Age kwa karere po Jehova ntani noku mu uyungira po. Age kwa wizire pevhu medina lyoGuhwe nokuyarugana yitetu medina olyo. (Joh. 5:43; 10:25) Edina lyaJesus kutanta asi “Jehova kuzowora.” Yipo nye, etanto lyedina lyaJesus kwa hamena mo edina Jehova.

7. Gava sihonena esi sina kulikida omu Jesus ga uyungilire po Jehova.

⁷ Pasihonena, muntu ogu a uyungire po presidente kuuyunga medina lyendi. Nonkango odo kukara nononkondo ngwendi presidente mwene ana kudi uyunga. Jesus nage kwa ya karere po Jehova apa ga uyungire novantu medina lyaJehova.​—Mat. 21:9; Ruk. 13:35.

8. Ngapi omu Jesus ga uyungilire po Jehova komeho a wize pevhu? (Exodus 23:20, 21)

⁸ Apa Jesus ga kere meguru, age kwa kere muuyungili po gwaJehova yipo a tantere vantu novaengeli eyi gava harere Jehova va rugane. (Joh. 1:1-3) Jesus nampo kwa kere muengeli ogu Jehova ga tumine a ka vatere Vaisraeli momburundu. Apa Jehova ga tanterere Vaisraeli va limburukwe muengeli ogo, age kwava tanterere konda zeyi nava mu limburukwira asi: ‘Yeeyi age kwa karera po edina lyange.’a (Resa Exodus 23:20, 21.) Jesus kwa karere po Jehova morwa age kwa mu uyungilire po ntani yige ya tumbukilire mokupongora edina lyoGuhwe nokuyilikida asi nayinye eyi a rugana Jehova uhunga.

“TATE, YEREREPEKA EDINA LYOGE”

9. Ngapi omu edina lyaJehova lya kere nomulyo kwaJesus? Faturura.

⁹ Ngamoomu tuna yi zogere, komeho Jesus a wize pevhu age kwa tere edina lyaJehova asi mulyo unene. Nayinye eyi ga rugene Jesus apa gaya kere pevhu kwa likidire asi edina lyaJehova mulyo kwendi. Kehagero lyosirugana sendi sokuzuvhisa, Jesus kwa kanderere asi: “Tate, yererepeka edina lyoge.” Poopo ngoso, oGuhwe kwa limbwilire kutundilira meguru nezwi lyononkondo asi: “Na li yererepeka ntani ngani li yererepeka hena.”​—Joh. 12:28.

10-11. (a) Ngapi Jesus ga yererepekere edina lyaKarunga Jehova? (Tara hena efano.) (b) Morwasinke edina lyaJehova va hepera kulipongora?

¹⁰ Nkedi zimwe omu Jesus ga yererepekere edina lyoGuhwe kuna kara pokutantera ko vantu yikara yoGuhwe noyirugana eyi va rugene. Nye yinzi ga rugene Jesus yipo a yererepeke edina lyaJehova. Age ga hepere hena kulipongora. Jesus kwa yi likidire asi edina lyaJehova mulyo unene apa ga rongere varongwa vendi va kanderere asi: “Guhyetu gemeguru, edina lyoge ava li pongore.”​—Mat. 6:9.

¹¹ Edina lyaJehova va hepere kulipongora morwa Satana Muzonaguli kwa uyungire yipempa kuhamena edina lyaJehova Karunga mosikunino saEdeni. Satana kwa uyungire asi Jehova yipempa ntani kapi ga harerere Adamu naEva yininke yoyiwa. (Gen. 3:1-5) Satana kwa uyungire hena asi Jehova kapi a rugana yininke monkedi zouhunga. Yipempa oyo kwa swaukisire Jehova. Mosiruwo saJoba, Satana kwa uyungire asi ava ava karere Jehova kuyiruganena yipo va gwanene mo mauwa ntani asi muntu kapi ta vhuru kukarera Jehova nsene kuna kupita momaudigu. (Joba 1:9-11; 2:4) Pwa hepere siruwo yipo vantu va ya dimburure asi pokatji kaJehova naSatana yilye ga uyungire yipempa.

“AME NGANI GAVA MWENYO GWANGE”

12. Ngapi ga yi likidire Jesus asi ga here Jehova?

¹² Jesus kwa pongwere edina lyoGuhwe morwa ga here unene Jehova, age kwa uyungire asi: “Ame ngani gava mwenyo gwange.” (Joh. 10:17, 18) Age ga liwapaikilire kufira edina lyaJehova.b Adamu naEva kapi va limburukwire Jehova, nye awo kwa kweme eyi gava tanterere Satana. Nye Jesus kwa yi likidire asi ga hara Jehova apa ga wizire pevhu nokuyalimburukwa mwanayinye. (Heb. 4:15; 5:7-10) Age kwa limburukwire dogoro konomfa. (Heb. 12:2) Apa gayi rugene oyo, age kwayi likidire asi ga hara Jehova.

13. Morwasinke Jesus ga karerere muntu gouhunga mokuyilikida asi Satana munayipempa? (Tara hena efano.)

¹³ Nayinye eyi ga rugene Jesus apa gaya kere pevhu kwa likidire asi Satana munayipempa nye kapisi Jehova. (Joh. 8:44) Jesus ga divire Jehova unene kupitakana nkenye ogu. Nsene asi koyili yininke yimwe yousili eyi ga uyungire Satana kuhamena Jehova, Jesus ngano ga yi divire. Nye Jesus kwa twikilire kupopera edina lyaJehova. Nampili ngomu yamonekere ngwendi Jehova ga sigililire Jesus nye age kwa twikilire kulimburukwa dogoro konomfa dendi.​—Mat. 27:46.c

“NA SIKISA MO SIRUGANA ESI WA PA NGE”

14. Ngapi Jehova ga futire Jesus morwa ga limburukwire?

¹⁴ Mesiku lyendi lyokuhulilira komeho va ka mudipage Jesus kwa kanderere asi: “Na sikisa mo sirugana esi wa pa nge.” Age ga huguvarere mwaJehova asi nga mu futa. (Joh. 17:4, 5) Ano Jehova kapi ga mu sigilire montoko. (Yirug. 2:23, 24) Jehova kwa vhumbwire Jesus noku mu pa situmbukira sosinene meguru. (Fil. 2:8, 9) Ano konyima Jesus yipo ga tamekere kupangera ngaHompa goUhompa waKarunga. Yisinke ngau ka sikisa mo Uhompa owo? Jesus kwa geve elimbururo apa ga rongere varongwa vendi va kanderere asi: “Uhompa woge u wize. Mpango zoge zi sike mo pevhu ngwendi meguru.”​—Mat. 6:10.

15. Yisinke hena nga ka rugana Jesus?

¹⁵ Ntaantani tupu Jesus nga rwanese nonkore daKarunga ntani nokukadizonagura po poyita yaHarumagedoni. (Ehor. 16:14, 16; 19:11-16) Konyima tupu zaHarumagedoni, Satana ngava ka mu zugumina mekero lyere unene nga dire kukapukisa hena vantu. (Ehor. 20:1-3) Apa Jesus nga ka pangera nomvhura eyovi, age nga ka retesa po mbili nokuka vatera vantu va ka sikilire mo. Age ngaka vhumbura vafe nokuka ninka evhu likare paradisa ntani sitambo saJehova ngasi ka sika mo.​—Ehor. 21:1-4.

16. Yisinke ngayi ka horoka konyima zonomvhura eyovi depangero lyaJesus?

¹⁶ Yisinke ngayi ka horoka kehagero lyonomvhura eyovi edi nga ka pangera Jesus? Nonzo kapi ngadi ka kara ko ntani ediro kusikilira mo ngali ka haga. Vantu kapi ngava hepa kuvagusira po nonzo dawo kupitira mwaJesus ntani kapi ngava ka hepa vagwavekwa ndi Mupristeli goMunene Jesus Kristusa yipo asi va kare nelikwatakano kumwe naJehova. Ntani “nkore zokuhulilira ngava zonagura po, nomfa.” Kapi ngaku kara mayendo morwa vafe nga va kava vhumbura ntani nkenye gumwe ngaka sikilira mo.​—1 Kol. 15:25, 26.

17-18. (a) Yisinke ngayi ka horoka kehagero lyonomvhura eyovi depangero lyaJesus? (b) Yisinke nga ka rugana Jesus apa nga mana kupangera? (1 Vakolinte 15:24, 28) (Tara hena efano.)

¹⁷ Yisinke hena ngayi ka horoka konyima zonomvhura eyovi depangero lyaJesus? Kwato hena ogu ngaka singanyeka asi Jehova age Karunga gokupongoka ntani gouhungami. Satana kwa uyungire mosikunino saEdeni asi Jehova munayipempa ntani kapi ga hara vantu. Nye kutunda posiruwo sina, edina lyendi kwa lipongora ntani vantu ava ava mu karere kwa yilikida asi age kupangera monkedi zongwa. Kehagero lyonomvhura eyovi depangero lyaJesus, edina lyaJehova ngava ka li pongora. Jehova ngaka yi likida asi age Guhyetu geharo.

¹⁸ Kehagero lyonomvhura eyovi nkenye gumwe nga ka dimburura asi eyi ga uyungire Satana yipempa. Yisinke nga rugana Jesus apa nga mana kupangera? Ngoso age nga rugana ngwendi yeeyi ga rugene Satana nokurwanesa Jehova ndi? Hawe! (Resa 1 Vakolinte 15:24, 28.) Jesus nga tengwidira oGuhwe Uhompa ntani nokukara mepangero lyawo. Mokulisiga naSatana, Jesus nga tengwidira oGuhwe nonkondo nadinye edi va mu pa morwa ga va hara.

19. Ngapi gayi likidire Jesus asi edina lyoGuhwe Jehova kwa kere nomulyo kwendi?

¹⁹ Jehova kwa pere Jesus edina lyendi. Jesus ga yilikire asi oGuhwe muntu musinke. Ngapi Jesus ga tere edina lyoGuhwe? Age kwa litere asi mulyo unene kupitakana nkenye eyi. Age ga kere neharo lyokumudipaga morwa edina lyoGuhwe ntani ngaka tengwida nayinye koGuhwe Jehova kehagero lyonomvhura eyovi depangero lyendi. Ngapi natu honena Jesus? Ngatu ka gwana elimbururo mosirongwa sokukwama ko.