Mavangu
15 Wantu akaka batukidi kuna Yuda, bakulumukini kuna Antiokia, bayantikidi longa ampangi vo: “Avo nulembi zengwa mun’owu wa nsiku a Mose, ke nulendi vuluzwa ko.” 2 Kansi, vava kiabwa e ntantani zangolo yo filana e mpaka vana vena wantu awaya ye Paulu yo Banaba, basikidisi vo Paulu yo Banaba ye akaka muna yau benda kw’antumwa ye akuluntu kuna Yerusaleme mu kuma kia diambu* diadi.
3 Vava e nkutakani yayenda kubasindika, bakwamanene nkangalu au, baviokele muna Fenisia ye Samaria, bele samuninge luviluku lwa esi zula.* Mpangi zawonso kiese kiayingi bamonanga mu kuma kiau. 4 Una balueke muna Yerusaleme, batomene tambulwa kwa nkutakani, antumwa ye akuluntu, babasamunwini mambu mayingi kavangidi Nzambi muna yau. 5 Kansi, ankaka muna alandi a malongi ma Afarisi, ana bakituka minkwikizi, batelamene yo vova vo: “Diamfunu bazengwa yo kubakanikina vo balunda e Nsiku a Mose.”
6 Muna kuma kiaki, antumwa ye akuluntu bakutakene mu fimpa e diambu diadi. 7 Vava bafilanene mpaka zangolo, Petelo otelamene, ubavovese vo: “Ampangi, nutomene wo zaya vo tuka muna lumbu yantete, Nzambi wansola vovo nwina kimana esi zula* bawila e diambu dia nsangu zambote omu nu’ame yo kwikila. 8 O Nzambi, ona ozeye o ntima, wasia umbangi muna kubavana mwand’avelela, nze una kavanga kwa yeto. 9 Ke kutuswaswanesanga ko yo yau, kansi ovelelese ntima miau muna lukwikilu. 10 Ozevo, ekuma nutontelanga Nzambi muna yekeka mazitu kw’alongoki mana mase meto yo yeto kibeni ke tulendi nata ko? 11 Oyeto tukwikilanga vo muna nsambu za Mfumu Yesu tuvuluzilwa, oyau mpe i wau bekwikilanga.”
12 Awonso babutamene, bawunikini Banaba yo Paulu ekolo beyikang’e sinsu ye masivi mayingi kavangidi o Nzambi muna yau vana vena esi zula.* 13 Una bamene vova, Yakobo ovutwidi vo: “Ampangi, nungwila. 14 Simoni watoma samuna una Nzambi kasongela dienga diandi kwa esi zula* muna nkumbu antete, kimana kasola vana bena o nkangu muna nkumbu andi. 15 Muna diadi, e mvovo mia Angunza miayenda e betela, wauna wasonama vo: 16 ‘Vava mambu mama mevioka, mvutuka yo tungulula e saba* kia Davidi kina kiabwa; ntungulula tungwa yandi, yavutuka una yakala, 17 kimana awana basala, bavava Yave kumosi ye wantu a zula yawonso ana beyikilwa muna nkumbu ame, u kavovele Yave, ona ovanganga mambu mama, 18 mazayakene tuka kuna nz’ankulu.’ 19 Dianu vo, e nzengo* zame ke bangika esi zula* ko, ana bavutukidi kwa Nzambi, 20 kansi tubasonekena vo bayikenga ye lekwa yafunzulwa kwa teke, zumba,* ye ina yafiontoka* ye menga. 21 Kadi, tuka kuna nz’ankulu, vekalanga y’awana besamunanga mana kasoneka Mose muna mavata mawonso, wau betanganga mo muna nding’angolo muna masambilu, lumbu yawonso ya vundu.”
22 I bosi, antumwa ye akuluntu kumosi ye nkutakani yawonso babakidi e nzengo za sola wantu vana bena, babatuma kuna Antiokia kumosi ye Paulu yo Banaba; basolele Yuda ona wayikilwanga vo Basaba yo Sila, yau bavitang’o ntu vana vena ampangi. 23 Babavene o nkanda una basonekene vo:
“Kuna kw’ampangi muna Antiokia, Suria ye Kilikia, ana batukidi muna zula,* mavimpi matukidi kwa mpangi zeno, antumwa ye akuluntu. 24 Wau tuwidi vo ankaka muna yeto bekunumwesanga e mpasi muna mvovo miau yo vava fwasa ntima* mieno, kana una vo ke twabavana luludiku ko, 25 yeto awonso tubakidi nzengo za kunutumina wantu tusolele ye azolwa eto, Banaba yo Paulu, 26 ana bayekwele mioyo miau muna nkumbu a Mfumu eto Yesu Kristu. 27 Dianu vo, tutumini Yuda yo Sila, kimana basamuna mpe muna nua miau mana masonamene omu nkanda. 28 Kadi o mwand’avelela yo yeto kibeni tumwene vo diambote twalembi kunukudikila e zitu diankaka, nulunda kaka mambu mama mamfunu: 29 nukwamanana kuyikenga muna yimenga ya teke, menga, ye má yafiontoka* ye zumba.* Avo nutomene kuyikenga muna mambu mama, nusikila. Nukala kiambote!”
30 Vava wantu awaya basindikwa, bakulumukini kuna Antiokia, bakutakese awonso, babatambikidi o nkanda. 31 Una batangidi wo, bayangalele lukasakeso baveno. 32 Wau vo Yuda yo Sila ngunza mpe bakala, bakasakese yo kumika ampangi muna malongi mayingi. 33 Vava banangini ko mu kolo kiayingi, babasindikidi kuna luvuvamu kw’ampangi ana babatuma. 34 —— 35 Kansi, Paulu yo Banaba banangini muna Antiokia, balongele yo samuna e nsangu zambote za diambu dia Yave kumosi mpe ye wantu ayingi ankaka.
36 Vava baviokesa lumbu yakete, Paulu ovovese Banaba vo: “Yambula twavutuka owau, twenda kingula ampangi muna mavata mawonso twasamunwini e diambu dia Yave kimana twazaya kana aweyi bena.” 37 Banaba osiandamene vo kenda yo Yoane, ona wayikilwanga vo Maku. 38 Kansi Paulu kayangalala ko vo benda yandi, kadi wateka kubasisa kuna Pamfulia yo lembi kwenda yau muna salu. 39 Muna diadi, vakedi ntantani zangolo, yavana bavambanene; Banaba obongele Maku, bakotele muna nzaza, bele kuna Kupero. 40 Paulu osolele Sila, vava ampangi banyekeka muna nsambu za Yave, wele kwandi. 41 Oviokele muna Suria ye muna Kilikia, wele akumikinge nkutakani.