Mavangu

²⁰ Vava nkindu yafokoka, Paulu otumisi alongoki, una kabakasakese yo kubakanina, osimbidi e nzila, wele kuna Makedonia. 2 Una kaviokele muna zunga ya mbanza yayi yo vovesa mambu mayingi ma lukasakeso kwa awana bena mo, olueke kuna Ngerekia. 3 Okedi ko ngonde tatu, kansi mu kuma kia mfulu bamvuandidi Ayuda mu kumvonda vava kazola baka e nzaza kenda kuna Suria, okanini muna ntim’andi vo kavutukila muna nzil’a Makedonia. 4 Wakala entwadi yo Sopate wa mwan’a Puro wa mwisi Beroya, Aresetako yo Sekundo, akwa Tesalonika, Ngayo wa mwisi Delebe, Timoteo, Tukiko yo Terofimo akwa mvivu a Asia. 5 Wantu awaya bavita kuna ntwala yo kutuvingila kuna Teroa; 6 kansi vava vavioka e lumbu ya Mbolo Zakondwa Mfuna, kuna Filipi twakota muna nzaza, muna lumbu tanu twaluaka muna Teroa kuna bakala, tukedi ko lumbu nsambwadi.

7 Muna lumbu kiantete kia lumingu, vava twakutakana kimana twadia, Paulu oyantikidi mokena yau, kadi muna lumbu kilanda i kekwenda; olambwidi e longi diandi yamuna dingi-dingi. 8 Mini yayingi yakala muna suku dia ntandu dina twakutakenena. 9 E toko diavuanda vana zianela, nkumbu andi Yutoko, olele tulu twangolo ekolo Paulu kavovelenge. Kuna nsi a tulu, osotokele tuka vana banga kiatatu yo wanuka wafwa. 10 Kansi, Paulu okulumukini, unyinzamene, umbimbakene, ovovele vo: “Nuyambula yayana, kadi una kwandi o moyo.” 11 I bosi, Paulu otombokele, obukwini mbolo yo dia. Okwamanene mokena mu kolo kiayingi yavana kuma kwakiá, i bosi wele kwandi. 12 Banete e toko wamoyo, bafiaulwisu kikilu.

13 Vo i yeto tutekele baka e nzaza, twele kuna Aso, i kuna twakana wawanena yo Paulu, wauna kateka kutukanikina, kadi kiamalu kazola kwendela. 14 Dianu vo, vava kawanana yeto kuna Aso, okotele muna nzaza eto, twele kuna Mitulene. 15 Muna lumbu kialanda, vava twakatuka ko tulueke vana sanga kia Kio, kansi muna lumbu kialanda, tuvundidi vana sanga kia Samo ye muna lumbu kialanda tulueke kuna Miletu. 16 Paulu vana ndambu a Efeso kazola viokela kimana kalembi lutisa ntangwa ayingi muna mvivu a Asia, kadi wazola vo kaluaka mu nzaki kuna Yerusaleme muna lumbu kia Nkinzi a Pentikosti.

17 Kansi, tuka kuna Miletu otumini nsangu kuna Efeso, obokelese akuluntu a nkutakani. 18 Vava bayiza kwa yandi, ubavovese vo: “Yeno kibeni nutomene zaya una yakadila yeno tuka muna lumbu kiantete yaluaka muna mvivu a Asia, 19 yasadilanga Mfumu kuna lulembamu lwawonso,* kuna kinsanga ye mpasi zina zandwakila mu kuma kia makani mambi ma Ayuda, 20 wau yalembi katikisa kunusamunwina mambu mamfunu* yo kunulongela vana meso ma wantu ye mu nzo ye nzo. 21 Kansi, yatoma sila umbangi kwa Ayuda ye Mingerekia mu kuma kia luviluku lwau kwa Nzambi yo lukwikilu muna Mfumu eto Yesu. 22 Owau, o mwanda umfididi ngienda kuna Yerusaleme, kana una vo kizeye ko mana mekumbwila kwakuna, 23 kansi, edi nzeye kaka vo muna konso mbanza, mwand’avelela ukunsilanga umbangi vo pelezo ye mpasi zikumvingilanga. 24 Dianu vo, kibadikilanga moyo ame ko vo usundidi o mfunu kwa mono, kansi yamanisa kaka e nkul’ame ye salu kina yatambula kwa Mfumu Yesu, yasila e nsangu zambote za nsambu za Nzambi umbangi una ufwene.

25 “Owau nzeye wo vo yeno awonso yasamunwina e nsangu za Kintinu ke numona diaka ndose ame ko. 26 Muna kuma kiaki, oyeno nu mbangi zame o unu, mpelele muna menga ma wantu awonso, 27 kadi kisidi kala yo lukatikisa ko lwa kunusamunwina lukanu lwawonso lwa Nzambi. 28 Nutoma kuyilunga-lunga ye kambi diawonso dina nwasilwa ukengi kwa mwand’avelela, kimana nwavungula e nkutakani a Nzambi, ina kasumbila muna menga ma Mwan’andi. 29 Nzeye wo vo vava nkwenda mevua mansita mekota vovo nwina, mebangika e kambi, 30 vovo nwina yeno kibeni mpe vevaika wantu bevova mambu mabendomoka muna tunta alongoki benda balandi.

31 “Dianu vo, nuyingila, nusungamena vo muna mvu ntatu, fuku yo mwini, kisidi yambula kunuwondelela ko kuna kinsanga. 32 Owau inuyekekele kwa Nzambi ye kwa diambu dia nkenda zandi, dina dilenda kunukumika yo kunuvana evua vana vena aveledi awonso. 33 Kisianga ntim’ame mu palata ko, wolo ngatu muna mvuatu angani. 34 Yeno kibeni nutomene wo zaya vo isalanga muna lungisa e nsatu zame y’awana bekalanga yame. 35 Muna mambu mawonso yakunusonga vo muna salanga ye fululu kia mpila yayi i nufwete sadisila awana batovokele yo sungamena mvovo mia Mfumu Yesu vava kavova yandi kibeni vo: ‘Edi disundidi e kiese dia vana, ke mu tambula ko.’”

36 Vava kamana vova mambu mama, ofukamene kumosi yo yau, osambidi. 37 Yau awonso babokomokene ye dilu, babimbakene Paulu* ye kumfiba, 38 kadi ntantu zayingi bamwene muna mvovo mina kabavovese vo wau kekwenda ke bemona diaka ndose andi ko. I bosi, bele kumfila kuna nzaza.