Roma

1 Paulu, wa ntaudi a Kristu Yesu, wasolwa se ntumwa yo vaulwa mu kuma kia nsangu zambote za Nzambi, 2 zina kateka sil’o nsilu muna ngunza zandi muna Sono yavauka, 3 mu kuma kia Mwan’andi, ona wawutukila muna mbongo a Davidi, mun’owu wa nitu. 4 Kansi muna nkum’a mwand’avelela watumbikwa Kimwan’a Nzambi vava kafulwa muna mafwa. Mwana ndioyo i Yesu Kristu wa Mfumu eto. 5 Muna yandi twatambula e nsambu ye kintumwa kimana wantu a zula yawonso balemvokela lukwikilu muna diambu dia nkumbu andi. 6 Muna zula yayi mpe i nwabokelelwa mu kala alandi a Yesu Kristu— 7 kuna kwa awonso nwina omo Roma, nwazolakana kwa Nzambi, nwabokelwa mu kala aveledi:

Yambula e nsambu ye luvuvamu lutuka kwa Nzambi wa Se dieto yo Mfumu eto Yesu Kristu lwakala yeno.

8 Edi diantete, ntondele Nzambi ame muna Yesu Kristu mu diambu dia yeno awonso, e kuma kadi, o lukwikilu lweno lusamunwanga mu nza yawonso. 9 Kadi Nzambi ona nsadilanga e salu kiavauka yo ntima wawonso muna nsangu zambote mu kuma kia Mwan’andi, yandi i mbangi ame vava ikunuyikanga muna sambu yame ntangwa zawonso, 10 idodokelanga avo dilendakana yavua e lau dia kwiza kunukingula owau muna luzolo lwa Nzambi. 11 Kadi tima dia kunumona ngina diau, yanuvana lukau lwa kimwanda kimana nwasikidiswa; 12 yovo, twakasakeswa, konso muntu muna lukwikilu lwa nkw’andi, o lweno yo lwame.

13 Ampangi, kizolele ko vo nwalembi wo zaya vo nkumbu miayingi yakana kwiza kwa yeno—kansi yamu wau yakinu kakidilwa—kimana e salu kiame kiatwasa e nluta vovo nwina nze muna zula yankaka. 14 Mfuka ngina yau kwa Mingerekia ye anzenza, kwa akwa ngangu ye awana balembi longwa; 15 dianu vo ngina ye tima dia kunusamunwina e nsangu zambote oyeno mpe koko Roma. 16 Kimwenene nsangu zambote nsoni ko; kadi i nkum’a Nzambi uvuluza awonso bena yo lukwikilu, entete kwa Nyuda ye Mungerekia mpe. 17 Kadi muna nsangu zambote, i musengomweno unsongi wa Nzambi kw’awana bena yo lukwikilu yo kumika lukwikilu lwau, wauna wasonama vo: “Vo i nsongi muna lukwikilu i kekadil’o moyo.”

18 Kadi makasi ma Nzambi mekulumukanga* tuka kuna zulu kwa mindembi-vumina Nzambi awonso ye avilwa ana besadilanga e ludi nze fukwa kia umpumbulu, 19 kadi mana balenda zaya mu kuma kia Nzambi matomene moneka vana bena, kadi Nzambi ubamwesese mo. 20 Kadi e fu yandi ilembi monekanga itomene moneka tuka kiasemenwa e nza yamu wau, kadi imonekanga muna lekwa kavanga, musungula nkum’andi a mvu ya mvu yo Unzambi wandi, ke bena nkutu ye mpila bakatikisila yo ko. 21 Kana una vo bazeye Nzambi, ke bekunkembelelanga nze Nzambi ko ngatu kuntonda, e ngindu zau zampavala, e ntima miau mia uzowa mibukamene tombe. 22  Kana una vo bekuyikilanga akwa ngangu, bakitukidi se mazowa, 23 bayambwidi kembelela Nzambi wa mundembi wolakana, bakembelele teke kia muntu anwodi, nuni, bulu ya malu mayá ye má yiyatatanga.

24 Muna kuma kiaki, Nzambi ubayekwele muna usafu, mun’owu wa zolela ya ntima miau, kimana e nitu zau zasafulwa muna yau kibeni. 25 Basobanese ludi kia Nzambi yo luvunu, basambidi yo sadila salu kiavauka kwa vangwa ke mu Mvangi ko, ona okembelwanga yakwele mvu. Amen. 26 I kuma Nzambi kabayambulwidi muna zinu diau diasaka dia vukana, kadi akento au basobanese e mvukana zansongi muna zina za usafu; 27 akala mpe diau adimosi, bayambwidi owu wansongi wavukana y’akento, bazinazianini e mioyo muna maketo mau ma usafu, akala ye akala, bevanganga mambu mansoni yo tambula e tumbu mun’owu wa bi wau.

28 Wau vo ke bazolele zaya Nzambi ko, o Nzambi ubayekwele muna ngindu zambi, bavanga mambu malembi songa. 29 Bazele yo vilwa wawonso, umpumbulu, loko, bi, bazele ye kimpala, mpond’a wantu, unzonzi, luvunu, nsoki, yidima, 30 akumbi, asaudi a Nzambi, akwa lutiangu, akwa lulendo, akwa lusanu, asoki a mambu mambi, akolami a mase, 31 minkondwa umbakuzi, mindembi lungisa nsilu, minkondwa nzolani a ungudi ye minkondwa nkenda. 32 Kana una vo batomene zaya e nzengo zansongi za Nzambi—vo awana bevanganga mambu mama fwa bafwanukini—ke bevanganga mo kaka ko, kansi beyangalelanga mpe awana bevanganga mo.