Roma
14 Nutambula ona oyoyele muna lukwikilu, kansi ke numfundisi ko muna ngindu zeno zaswaswana. 2 O nkwa lukwikilu odianga lekwa yawonso, kansi ona oyoyele muna lukwikilu, mvûdi ya mpat’a nsengo kaka kedianga. 3 Ndiona odianga kavezi ona olembi dianga ko, ndiona olembi dianga, kafundisi ona odianga ko, kadi Nzambi untambwidi. 4 Ongeye u nani ofundisanga selo kiangani? Mfumu andi kaka olenda kuntelamesa yovo kumbwisa. Kieleka, telameswa ketelameswa, kadi Yave olenda kuntelamesa.
5 Kuna kwa mosi e lumbu kimosi kisundidi e lumbu kiankaka; kuna kwa wankaka e lumbu yawonso yafwanana kwandi; yambula konso muntu kakala ye ziku vo dina kekwikilanga dialudi. 6 Ndiona olundanga e lumbu, yambula kalundila kio mu kuma kia Yave. Ndiona odianga mpe, kadia mu kuma kia Yave, kadi kwa Nzambi kevutulanga matondo; ndiona ke dianga ko, yambula kalembi dia mu kuma kia Yave, kadi kwa Nzambi mpe kevutulanga matondo. 7 Ke mosi ko mu yeto un’o moyo mu kuma kia yandi kibeni, ke mosi ko ofwa mu kuma kia yandi kibeni. 8 Kadi avo tukala moyo, mu kuma kia Yave tukadila o moyo, avo tufwa, mu kuma kia Yave tufwila. Dianu vo, avo tukala moyo yovo tufwa, kwa Yave tuvuilu. 9 Kadi, i kuma Kristu kafwila yo kala diaka o moyo, kimana kakala Mfumu mun’awana bafwa y’awana bena o moyo.
10 Kansi, ekuma ofundisila mpangi aku? Yovo ekuma ovezela mpangi aku? Kadi yeto awonso tusinga telama vana kunda kia lufundisu kia Nzambi. 11 Kadi diasonama vo: “‘E nkal’ame kaka,’ u kavovele o Yave, ‘o makungunu mawonso mekumfukamena, o tubini twawonso tutambulwila Nzambi.’” 12 Ozevo, konso muntu muna yeto, okuyitela mbalu kuna kwa Nzambi.
13 Dianu vo, ke tufundaziana diaka ko, kansi tukala kaka ye kani dialembi sia sakuba ngatu nkaku vana vena mpangi. 14 Nzeye wo yo kwikila muna Mfumu Yesu vo ke vena lekwa kiafunzuka ko muna kiau kibeni; vava kaka muntu kebadikilanga lekwa vo kiafunzuka, kuna kwa yandi kiafunzuka. 15 Kadi avo okendeleka mpangi aku mu kuma kia madia, kukangalelanga diaka mu zola ko. Ndiona kafwila o Kristu kumfwasila mu madia maku ko. 16 Dianu vo, ke nuyambula ko vo oma mambote nuvanganga matiangunwa. 17 Kadi e Kintinu kia Nzambi ke dia yo nua ko, kansi unsongi ye luvuvamu ye kiese muna mwand’avelela. 18 Konso ntaudi a Kristu ona osonganga e fu yayi, otondwa kwa Nzambi yo yangalelwa kwa wantu.
19 Dianu vo, yambula twatatidila mambu metwasanga luvuvamu yo kasakesa muntu yo nkw’andi. 20 Nuyambula fwasa salu kia Nzambi muna diambu dia madia. Kieleka, lekwa yawonso yavelela, kansi diambi kwa muntu mu dia lekwa avo kitesesa ankaka e sakuba. 21 Ke diambote ko mu dia mbizi yovo nua vinyu ngatu vanga konso diambu ditesesa mpangi aku e sakuba. 22 O lukwikilu una lwau, kala lwau kaka ngeye kibeni vana ndose a Nzambi. Nkwa nsambu ndiona olembi kuyitumba muna mambu keyangalelanga. 23 Kansi avo okatikisa, yeleswa keyeleswa avo odidi, e kuma kadi kadididi mu lukwikilu ko. Kadi mawonso mevangilwanga kondwa lukwikilu, sumu.