Tito
1 Paulu, wa ntaudi a Nzambi ye ntumw’a Yesu Kristu, mun’owu wa lukwikilu lwa awana basolwa kwa Nzambi yo zayi wasikila wa ludi, wina mun’owu wa vumi wa Nzambi, 2 muna vuvu kia moyo a mvu ya mvu, una kasia o nsilu tuka kuna nz’ankulu, o Nzambi ona kalendi vuna ko; 3 kansi muna ntangw’andi, wazayisa e diambu diandi muna nsangu zina yayekekwa mun’owu wa lutumu lwa Nzambi wa Mvuluzi eto; 4 kuna kwa Tito, wa mwan’ame kikilu mun’owu wa lukwikilu tuna lwau e ntwadi:
Yambula wakala ye nsambu ye luvuvamu lutuka kwa Nzambi wa Se yo Kristu Yesu wa Mvuluzi eto.
5 Yasisa koko Kerete kimana wasingika mambu matekama yo tumbika akuluntu muna konso mbanza, wauna yakanikina: 6 avo vena ye muntu wakondwa lusembo, yakala dia nkento mosi, wina yo wana minkwikizi ana bakondelo mfundu a mavangu ma usafu* yovo ukolami. 7 Wau vo ntaudi a Nzambi, o nkengi kafwete kala ye lusembo ko, ke nkwa kuyitundidika ko, ke funganga makasi mu nzaki ko, ke nduvu a malavu ko, yandi kanwani, ke nkwa tima dia ndandu zalembi songa ko, 8 kansi ntambudi a nzenza, nzodi a mawete, nlungaladi,* nsongi, nkwa ziku, nkwa volo, 9 otatidilanga e diambu diakwikizi* muna malongi mandi, kimana kakala wafwana mu kasakesa* muna longi diavimpi* yo tumba akwa mpaka.
10 Kadi akolami ayingi bena, akwa moko yakondwa o mfunu, avunginiki, musungula awana betatidilanga e fu kia zengwa. 11 Diambote wantu awaya bakakwa e nua, e kuma kadi bebendomonanga nzo zamvimba muna longa mambu ke bafwete longa ko mu kuma kia ndandu zalembi songa. 12 Mosi muna yau kibeni, wa ngunz’au, wavova vo: “Esi Kerete akwa luvunu, bulu yansisi, miolo miazola o dia.”
13 O umbangi wau waludi. Muna kuma kiaki, kwamanana kubatumba, kimana bakala yo vimpi muna lukwikilu, 14 balembi tambanga o matu muna savu ya Ayuda ye nkanikinu mia wantu ana babembola e ludi. 15 Kuna kwa aveledi, yawonso yavelela; kansi kuna kw’awana bafunzuka yo kondwa lukwikilu, ke vena má kiavelela ko, kadi e ngindu zau ye ntona zau zasafuka. 16 Bekuyisananga vo bazeye Nzambi, kansi muna mavangu mau nkalu bekumvaninanga, e kuma kadi bangemi,* akolami yo lembi fwana muna konso salu kiambote.