Lusengomono

4 I bosi, mbwene kielo kiaziuka kuna zulu, ngwidi ndinga antete ina nze mpungi, yavovana yame, oku vo: “Tomboka oku, ikusonga mambu mana mafwete vangama.” 2 Vana vau o mwand’a Nzambi ukulumukini omu mono, mbwene kunda kuna zulu ye ndiona ovuende vana kunda. 3 Ndiona ovuende vana kunda okezimanga nze tadi dia yasepi ye dia sadio,* e nkongolo ina izietele e kunda, ikezimanga nze tadi dia emeraude.

4 Muna nzunguluk’a kunda mukedi kunda 24, mbwene akuluntu 24 bavuende vana kunda yayi, bavuete mvuatu miampembe ye kolowa zawolo vana ntu miau. 5 Vana kunda vavaikidi nsemo, ndinga ye miandazi;* vana ndose a kunda vakweme mini nsambwadi, e mini yayi mianda nsambwadi mia Nzambi isunzulanga. 6 Vana ndose a kunda vakedi ye lekwa nze mbu a pelo* ye tadi dia kristale.

Vana kati kwa kunda ye muna nzunguluk’a kunda mukedi ye vangwa yá yamoyo yazala yo meso ku ntwala ye ku nima. 7 E vangwa kiantete kiamoyo kiakala nze nkosi, e vangwa kianzole kiamoyo kiakala nze swala dia ngombe, e vangwa kiatatu kiamoyo kiakala ye ndose nze ya muntu, e vangwa kia yá kiamoyo kiakala nze ngo-zulu itimukanga. 8 E vangwa yá yayi yamoyo, konso vangwa kiakala yo mave masambanu; yazala yo meso muna ndambu zawonso ye kuna nsi. Lembi vunda, fuku yo mwini ivovanga vo: “Wavauka, wavauka, wavauka o Yave wa Nzambi a Mpungu-ngolo, ndiona wakala, ndiona una ye ndiona okwiza.”

9 Konso ntangwa e vangwa yamoyo ivananga nkembo yo zitu yo matondo kwa Ndiona ovuende vana kunda, Ndiona ozinganga yamu mvu ya mvu, 10 akuluntu 24 befukamanga vana ndose a Ndiona ovuende vana kunda yo sambila Ndiona ozinganga yamu mvu ya mvu yo tuba e kolowa zau vana ndose a kunda, yo vova vo: 11 “E Yave wa Nzambi eto, ngeye ofwene tambula nkembo yo zitu ye ngolo, e kuma kadi ngeye wasema lekwa yawonso, muna luzolo lwaku inina yo semwa.”