Tuku

13 Abarama ovaikidi muna Engipito, otombokele kuna Nengebe+ yo nkaz’andi ye yawonso kena yau, wele kumosi yo Loti. 2 Abarama mvuama kakala muna twelezi, palata yo wolo.+ 3 Vava kakatukidi muna Nengebe yo kwenda kuna Betele, wele lekelela muna nzila yavana kalweke vana fulu kiakala e saba kiandi, vana kati kwa Betele ye Ai,+ 4 vana fulu katungila e ziku. Ovavana, Abarama ovovele nkumbu a Yave.

5 Loti, ona okangalanga yo Abarama, okedi mpe ye mameme mandi, ngombe ye saba. 6 E nsi ke ibafwene diaka ko mu kala vamosi; mavua mau mawokele kwayingi, se diampasi kwa yau mu zingila vamosi. 7 Muna kuma kiaki, vabwidi ntantani vana vena avungudi a twelezi ya Abarama ye avungudi a twelezi ya Loti. (Muna kolo kiakina, Anekenani ye Aneperese bazingilanga muna nsi.)+ 8 Dianu vo, Abarama ovovese Loti+ vo: “Dodokolo, ke vakadi ntantani ko vana vena mono yo ngeye ye vana vena avungudi ame ye avungudi aku, kadi tu ampangi. 9 Olenda sola konso sambu dia nsi yayi. Dodokolo, vambana yame. Avo wele kulumonso, omono ngiele kulunene; kansi avo wele kulunene, omono ngiele kulumonso.” 10 Loti osengwele o meso, omwene vo mvivu wawonso wa Yodani+ yakuna Soare+ watoma yitilwa maza nze mpatu a Yave,+ nze nsi ya Engipito (vitila Yave kafwasa Sodoma ye Ngomora). 11 I bosi, Loti osolele zunga kiawonso kia Yodani; Loti oyalukidi, wele kuna este. Muna mpila yayi, bavambanene. 12 Abarama okedi muna nsi ya Kenani, kansi Loti wele zingila lukufi ye mbanza za mvivu+ wa Yodani. Kuna kwalanda, otungidi saba kiandi lukufi ye Sodoma. 13 Esi Sodoma yimpumbulu bakala, basumukanga kwayingi vana ndose a Yave.+

14 Vava Loti kavambane yo Abarama, Yave ovovese Abarama vo: “Dodokolo, sengola o meso maku, tuka vovo wina, tala kuna node ye kuna sude, kuna este ye kuna weste, 15 kadi e nsi yawonso ina omwene, kwa ngeye ye mbongo aku ivana yo se vua diakwele mvu.+ 16 Ikitula e mbongo aku nze senge, kele vo vakala muntu olenda tanga e senge, ozevo, e mbongo aku mpe yadi tangakana.+ 17 Telama, kangala omu nsi yayi yawonso, * kadi kwa ngeye ivana yo.” 18 Abarama okwamanene zingila mu saba. Kuna kwalanda, Abarama wele zingila vana nti mianene mia Mamere+ mina kuna Keberone,+ i kûna katungidi Yave e ziku.+