Wantete wa Ntinu

13 Muna lutumu lwa Yave, muntu a Nzambi+ olweke kuna Betele tuka kuna Yuda ekolo Yerobame kakala watelama vana ziku+ muna yoka ndumbu. 2 Ovovele mu kuma kia ziku muna lutumu lwa Yave, oku vo: “E ziku, e ziku! I wau wuwu kavovele o Yave: ‘Mwan’ayakala owutuka muna nzo a Davidi ovewa e nkumbu Yosiya!+ Ngeye kesadila muna kelela nganga za mabata se yimenga, awana beyokanga ndumbu va ngeye, ngeye kesadila muna yoka e visi ya wantu.’”+ 3 Muna lumbu kiakina, muntu a Nzambi ovangidi e sivi, oku vo: “Ediadi i sivi kavovele o Yave: Tala, e ziku diwudika, ntoto ampolo* una mo uwulumuka.”

4 Vava Yerobame wa ntinu kawidi mana muntu a Nzambi aludi kavovele mu kuma kia ziku dina kuna Betele, olambwidi koko kwandi tuka kuna ziku, ovovele vo: “Numbaka!”+ Vana vau, o koko kuna kalambwidi kuyumini, kalendele ko diaka koneneka ko.+ 5 E ziku diwudikidi, ntoto ampolo vana ziku uwulumukini mun’owu wa sivi kayika o muntu a Nzambi aludi muna lutumu lwa Yave.

6 O ntinu ovovese muntu a Nzambi aludi vo: “Dodokela* Yave wa Nzambi aku, samba muna wete diame kimana koko kwame kwasasuka.”+ Dianu vo muntu a Nzambi aludi ododokele Yave, o koko kwa ntinu kusasukidi. 7 I bosi, o ntinu ovovese muntu a Nzambi aludi vo: “Twenda ku nzo ame wadia, ikuvana lukau.” 8 Kansi, muntu a Nzambi aludi ovutwidi kwa ntinu vo: “Kana nkutu umpene ndambu a nzo aku, kikwenda yaku ko yovo dia mbolo ngatu nua maza va fulu kiaki. 9 Kadi i wau yakanikinua kwa Yave, oku vo: ‘Kudie mbolo ko yovo nua maza, ngatu vutukila muna nzila ina wizidi.’” 10 I kuma vo, wendele mu nzila yankaka, kavutukidi mu nzila ina kayizila ku Betele ko.

11 Muna Betele mwakala ngunza mosi wa nunu, wan’andi bezidi kuna nzo, banzayisi mawonso kavangidi muntu a Nzambi aludi muna lumbu kiakina muna Betele ye mana kavovesa kwa ntinu. Vava bazayisi mambu mama kwa se diau, 12 o se diau ubayuvuidi vo: “Nkia nzila kendele?” Wan’andi bansongel’e nzila ina kayendela muntu a Nzambi aludi wa musi Yuda. 13 Ovovese wan’andi vo: “Nunkubikila e buluku.” Bankubikidi e buluku, omente dio.

14 Wele landi muntu a Nzambi aludi, unsolwele wavuanda kuna nsi a nti anene. Umvovese vo: “Ongeye i muntu a Nzambi aludi otukidi kuna Yuda?”+ Ovutwidi vo: “Ingeta.” 15 Umvovese vo: “Twenda ku nzo ame wadia mbolo.” 16 Kansi, umvutwidi vo: “Kilendi vutuka yaku ko yovo tambulwila mbok’aku ngatu dia mbolo yovo nua maza va fulu kiaki. 17 Kadi Yave wankanikina vo: ‘Kudie mbolo ko ngatu nua maza va fulu kiaki. Kuvutukila muna nzila ina wizidi ko.’” 18 Muna diadi, umvovese vo: “Mono mpe i ngunza nze ngeye, mbasi mosi umpovese muna lutumu lwa Yave vo, ‘Vutuka yandi ku nzo aku kimana kadia mbolo yo nua maza.’” (Umvunini.) 19 Ovutukidi yandi kimana kadia mbolo yo nua maza muna nzo andi.

20 Ekolo bavuanda vana meza, e diambu dia Yave diayiza kwa ngunza ona umvutulwisi, 21 obokele muntu a Nzambi aludi wa musi Yuda, oku vo, “I wau wuwu kavovele o Yave: ‘Wau vo okolamene lutumu lwa Yave yo lembi lunda nkanikinu una kavene Yave wa Nzambi aku, 22 kansi ovutukidi mu dia e mbolo yo nua maza va fulu kina okanikinu vo: “Kudie mbolo ko ngatu nua maza,” e vimbu diaku ke dizikwa muna ziami kia mase maku ko.’”+

23 Vava muntu a Nzambi aludi kamene dia yo nua, o ngunza wa nunu okubikidi buluku mu kuma kia ngunza ona kavutulwisi. 24 I bosi, muntu a Nzambi aludi wele, kansi owanane ye nkosi muna nzila, imvondele.+ E vimbu diandi dikedi muna nzila, e buluku diningamene vana ndambu; e nkosi mpe iningamene vana ndambu a vimbu. 25 Wantu baviokanga bamwene vimbu muna nzila ye nkosi vana ndambu a vimbu. Bakotele muna mbanza ina yakala ngunza wa nunu, basamwini mana bamwene.

26 Ngunza ona wamvutulwisa muna nzila, vava kawa wo, vana vau ovovele vo: “I muntu a Nzambi aludi ona okolamene lutumu lwa Yave,+ i kuma Yave kanyekwele kwa nkosi kantiazuna yo kumvonda mun’owu wa diambu dina kamvovesa o Yave.”+ 27 I bosi, ovovese kwa wan’andi vo: “Nunkubikila e buluku.” Bankubikidi dio. 28 Wele muna nzila, osolwele e vimbu muna nzila ye buluku ye nkosi vana ndambu a vimbu. E nkosi ke yadia vimbu ko ngatu tiazuna e buluku. 29 O ngunza obongele e vimbu dia muntu a Nzambi aludi osidi dio vana buluku, otwese dio muna mbanz’andi kimana kandila yo kunzika. 30 Osidi e vimbu muna ziami kiandi, bandididi, oku vo: “Ekwe mpangi ame!” 31 Vava kanzikidi, ovovese wan’andi vo: “Vava ifwa, nufwete kunzikila vana fulu kizikilu muntu a Nzambi aludi. Nusia visi yame vana ndambu a visi yandi.+ 32 E diambu kavova muna lutumu lwa Yave mu kuma kia ziku dina muna Betele ye masambilu mawonso muna mabata+ muna mbanza za Samaria, lungana dilungana.”+

33 Kana nkutu vava diabwa e diambu diadi, Yerobame kayambula landa nzila zandi zambi ko, kansi wakwamanana tumbika anganga muna nkangu kimana basadila muna mabata.+ Watumbikanga kinganga kwa konso ona kazolele yo vova vo: “Yambula kakala mosi muna anganga za mabata.”+ 34 E sumu diadi dia nzo a Yerobame,+ diafila e nzo andi muna lufwasu yo fukiswa emvimba ova ntoto.+