Wantete wa Ntinu

20 Benadadi wa Ntinu+ a Suria+ okutakese makesa mandi mawonso ye atinu 32 ye mvalu ye makalu mau ma vita; otombokele, ozungidi+ Samaria+ yo nuanisa yo. 2 Otumini anati a nsangu kwa Akabi+ wa Ntinu a Isaele muna mbanza, oku vo: “I wau wuwu kavovele Benadadi, 3 ‘E palata ye wolo waku, i wame, kumosi mpe ye akazi aku yo wan’aku ana basundidi o wete, i bame.’” 4 Ntinu a Isaele ovutwidi vo: “Mun’owu wa mvovo aku, e mfumu ame wa ntinu, omono ye yawonso ngina yau, i yaku.”+

5 Anati a nsangu bavutikidi kwa Akabi, oku vo: “I wau wuwu kavovele Benadadi, ‘Nsamu owu itumini: “Umpana palata ye wolo waku, akazi aku yo wan’aku.” 6 O mbazi muna ntangwa yayi, ikutumina ntaudi zame, kimana batoma fimpa e nzo aku, nzo za ntaudi zaku, babonga yo nata yawonso ina bemona vo yambote.’”

7 Muna diadi, ntinu a Isaele obokelese mbuta zawonso za nsi, ovovele vo: “Do, nutala mpasi kazolele twasa muntu ndioyo, kadi otumini vo yamvana akazi ame, wan’ame, palata ye wolo wame, omono kimvakulwidi nkalu ko.” 8 E mbuta zawonso ye nkangu awonso bamvovese vo: “Kunlemvokela ko ngatu tonda diambu diadi.” 9 Muna kuma kiaki, ovovese anati a nsangu a Benadadi vo: “Nuvovesa mfumu ame wa ntinu vo: ‘Mawonso otekele lomba kwa ntaudi aku, vanga ivanga mo, kansi e diadi kilendi dio vanga ko.’” Anati a nsangu bele kwau, basamwini e nsangu kwa Benadadi.

10 I bosi, Benadadi untwikidi nsangu, oku vo: “Yambula nzambi za ntumba yo sakisa wo vanga, avo ntoto usala muna Samaria ufwana muna zadisa koko kwa konso muntu muna nkangu una yame.” 11 O ntinu a Isaele ovovele vo: “Numvovesa vo, ‘Avo e vita ke yayantikidi ko kuyisani ko nze ngeye osundidi yo kala.’”+ 12 Benadadi vava kawa mvutu zazi, ekolo kanuanga malavu ye ntinu miankaka muna saba* yau, ovovese ntaudi zandi vo: “Nukubama, lwabanuanisa!” Bakubamene banuanisa e mbanza.

13 Kansi ngunza mosi ofinamene Akabi+ wa Ntinu a Isaele, ovovele vo: “I wau wuwu kavovele o Yave, ‘Nga omwene ndonga yayi yawonso e? Ikubayekola vana koko kwaku o unu, wazaya wo vo mono i Yave.’”+ 14 Akabi oyuvuidi vo: “Muna nani?” yandi, oku vo: “I wau wuwu kavovele o Yave, ‘Muna matoko ma akuluntu a mvivu.’” Akabi oyuvuidi vo: “Nani oyantika nuana?” O ngunza umvutwidi vo: “Ngeye!”

15 Akabi otangidi asadisi a akuluntu a mvivu, 232; i bosi otangidi Aneyisaele awonso, 7.000. 16 Bavaikidi muna midi, ekolo Benadadi kanuanga yo kolwa malavu muna saba* ye ntinu 32 mina miansadisanga. 17 Asadisi a akuluntu a mvivu yau bavita vaika. Vana vau, Benadadi otumini anati a nsangu. Banzayisi vo: “Wantu bavaikidi muna Samaria.” 18 Benadadi ovovele vo: “Avo kuna luvuvamu bavaikidi, nubabaka kimoyo; avo mu vita bavaikidi nubabaka mpe kimoyo.” 19 Kansi, vava asadisi a akuluntu a mvivu ye makesa mabalandanga mavaika muna mbanza— 20 konso muntu muna yau, ovondele nkwandi. I bosi, esi Suria batinini,+ Aneyisaele babalakamene, kansi Benadadi wa ntinu a Suria otinini muna mvalu kumosi y’akwa mvalu. 21 O ntinu a Isaele ovaikidi, ofwasidi mvalu ye makalu ma vita, ovondele ulolo wa esi Suria.

22 Kuna kwalanda, o ngunza+ ofinamene ntinu a Isaele umvovese vo: “Nda kumika makesa maku yo toma yindula dina ovanga,+ kadi muna lubantiku lwa mvu ulanda, o ntinu a Suria otomboka kanuanisa.”+

23 E ntaudi za ntinu a Suria bamvovese vo: “O Nzambi au, Nzambi a miongo. I dianu batusundidi. Kansi, avo tunuene yau kuna ndimba, sunda tukubasunda. 24 Vanga owu: Katula atinu awonso+ muna fulu yau, wavingisa anguvulu muna fulu yau. 25 I bosi, kutakesa* makesa nze mana mafwidi ye mvalu muna mvalu, kalu muna kalu. Twabanuanisa vana ndimba, sunda tukubasunda.” O ntinu owidi luludiku lwau yo vanga wauna bamvovese.

26 Kuna lubantiku lwa mvu, Benadadi okutakese makesa ma Suria, wele kuna Afeke+ muna nuanisa Isaele. 27 Nkangu a Isaele ukutakeso mpe, baveno nkuta, bele wanana yau. Vava wan’a Isaele bakiatama, bakala nze yikambi-kambi yole ya nkombo, kansi esi Suria bazele muna nsi yawonso.+ 28 O muntu a Nzambi aludi ofinamene ntinu a Isaele, ovovele vo: “I wau wuwu kavovele o Yave, ‘Wau vo esi Suria bavovele vo: “Yave i Nzambi a miongo, ke Nzambi a ndimba ko,” yekola iyekola ndonga yayi yawonso vana moko maku,+ nuazaya wo vo mono i Yave!’”+

29 Buka yau yole ya makesa ikiatamene mantalani lumingu lwamvimba, e lumbu kina kia nsambwadi bayantikidi nuana. Aneyisaele bavondele 100.000 ma makesa ma Suria ana badiatilanga kia malu mu lumbu kimosi. 30 Makesa mankaka matinini kuna Afeke,+ makotele muna mbanza. Kansi, e yaka kibwididi 27.000 m’awana basala moyo. Benadadi mpe otinini, okotele muna mbanza, osweme muna suku.

31 E ntaudi zandi bamvovese vo: “Tala, tuwidi vo ntinu mia nzo a Isaele akwa nkenda.* Do, yambula twavuata ngoto muna tuketo yo kanga nsinga muna ntu, twakisunzula kwa ntinu a Isaele. Nanga olenda kuvukisa.”+ 32 Ozevo, bavuete ngoto muna tuketo yo zinga nsinga muna ntu miau, bele kwa ntinu a Isaele yo vova vo: “O ntaudi aku Benadadi ovovele vo: ‘Idodokele, ungiambula yazinga.’” O ntinu ovutwidi vo: “Nga wakinu moyo e? Yandi i mpangi ame.” 33 Ntaudi za Benadadi bamwene vo mvutu zambote, basadidi mvovo mia ntinu mu kumvutula vo: “Benadadi mpangi aku.” Muna diadi, ntinu ovovele vo: “Nuenda kumbaka.” I bosi, Benadadi ukiyekwele kwa ntinu, Akabi umantisi muna kalu diandi dia vita.

34 Benadadi ovovese Akabi vo: “E mbanza zina se diame kakutumuna kwa se diaku ivutula zo, olenda mpe tunga mazandu muna Damaseke nze una kavanga se diame muna Samaria.”

Akabi ovutwidi vo: “Muna kuma kia kangu diadi ikuyambula wenda kwaku.”

Okangidi yandi e kangu, unyambwidi kenda kwandi.

35 Muna lutumu lwa Yave, mosi muna wan’a ngunza*+ ovovese nkwandi vo: “Dodokolo, ungwanda!” kansi, nkwandi kazolele kunwanda ko. 36 Umvovese vo: “Wau olembele wila nding’a Yave, vava okatuka ova ngina, nkosi ikuvonda.” Vava kakatukidi kaka, nkosi iwanane yandi, imvondele.

37 Ngunza owanane yo muntu akaka, umvovese vo: “Dodokolo, ungwanda.” Unwende yo kunlweka.

38 I bosi, o ngunza wele vingila ntinu muna nzila, ofukidi tenda vana lose lwandi kalembi zayakana. 39 Vava ntinu kaviokanga, ngunza okazidi kwa ntinu, oku vo: “Ntaudi aku wele muna vita, muntu mosi untwasidi mbakami yo vova vo: ‘Langidila muntu ndioyo. Avo otinini, moyo aku ufutwa muna moyo andi+ yovo talanta mosi* ya palata ofuta.’ 40 Ekolo ntaudi aku kasadidinge salu yankaka, o mbakami otinini.” O ntinu a Isaele umvovese vo: “Ezozo i nzengo zaku; ngeye kibeni ukizengele zo.” 41 Vana vau, o ngunza okatwidi tenda muna meso mandi, o ntinu a Isaele unzayididi vo i mosi muna angunza.+ 42 Ovovese ntinu vo: “I wau wuwu kavovele o Yave, ‘Wau vo wavukisa vana koko kwaku+ o muntu ona yavova vo kafwete vondwa, moyo aku ufutwa muna moyo andi,+ o nkangu aku muna nkangu andi.’”+ 43 O ntinu a Isaele wele kuna nzo andi kuna Samaria,+ oyoyele yo kendalala.