Wantete wa Tusansu

11 Kuna kwalanda, Aneyisaele awonso bakutakene yo Davidi kuna Keberone,+ bavovele vo: “Tala, yeto tu menga mamosi.*+ 2 Vava Saulu kakala ntinu, ngeye wavitanga o ntu muna vita za Isaele.*+ Yave wa Nzambi aku wavovesa vo: ‘Ngeye ovungula nkangu ame Isaele, okala se ntu a nkangu ame Isaele.’”+ 3 Akuluntu awonso a Isaele bele kwa ntinu kuna Keberone, Davidi okangidi yau e kangu kuna Keberone vana ndose a Yave. Bakusidi Davidi mazi kakala se ntinu a Isaele,+ wauna kavova Yave muna Samuele.+

4 I bosi, Davidi yo Isaele yawonso bele kuna Yerusaleme, i sia vo, Yebuse,+ kuna kwazingilanga Aneyebuse.+ 5 Esi Yebuse bavovese Davidi kuna luvezo vo: “Kukota mwamu ko!”+ Kansi, Davidi obakidi e swekameno diangolo dia Zione,+ dina vo, i Mbanz’a Davidi o unu.+ 6 Davidi ovovele vo: “Ndiona ovita tufakesa Aneyebuse, okala se ntu ye mfumu.” Yoabe+ wa mwan’a Seruya ovitidi tomboka, okedi se ntu. 7 Davidi oyantikidi zingila muna swekameno diangolo. I dianu bayikila fulu kiakina vo Mbanz’a Davidi. 8 Otungidi e mbanza tuka kuna Kundubulu* yamuna nzunguluka, Yoabe otungulwidi ndambu yankaka ya mbanza. 9 O nkum’a Davidi wawokelanga kaka,+ o Yave a vu wakala yandi.

10 E miami i ntu mia makesa mankuma ma Davidi, ana banyikama muna kimfumu kiandi ye Isaele yawonso, bantumbikidi se ntinu muna diambu dia Yave muna Isaele.+ 11 O lwalu i lutangu lwa makesa mankuma ma Davidi: Yosabame+ wa mwan’a Kakemoni, wa ntu a makesa matatu mankuma.+ Wavonda 300 za wantu muna dionga diandi mu nkumbu mosi.+ 12 Ona wanlandila, Elaza+ wa mwan’a Dodo wa Nyakoka.+ Mosi muna makesa matatu mankuma. 13 Elaza wakala yo Davidi kuna Pase-damimi,+ kûna Afelesetia bakutakanena muna vita. Kwakala ye mpatu yazala ye mbongo a bale, o nkangu utinini mu kuma kia Afelesetia. 14 Kansi, watelama nangwí vana kati kwa mpatu, watanina yo, wavonda Afelesetia, muna diadi Yave wabavana e nsund’ampwena.*+

15 Atatu vana vena ntu 30 mia makesa, bakulumukini kwa Davidi kuna nduk’a Adulami,+ vava makesa ma Afelesetia basikidisa e ndo kuna Ndimb’a Refa.+ 16 Davidi wakala muna swekameno diandi, e buka kia makesa ma Afelesetia kiakala kuna Beteleme. 17 I bosi, Davidi osongele luzolo lwandi, oku vo: “Ekwe vuina dia nua maza ma sima kina vana ndambu a vitu dia Beteleme!”+ 18 Muna kuma kiaki, makesa matatu makotele muna ndo ya Afelesetia muna kingolo, batekele maza muna sima kina vana ndambu a vitu dia Beteleme, batwese mo kwa Davidi; kansi Davidi kazolele mo nua ko, otiamwini mo vana vena Yave. 19 Ovovele vo: “Muna kuma kia vumi wame kwa Nzambi ame kilendi vanga diambu diadi ko! Aweyi ndenda nuina menga ma wantu ana basidi mioyo miau mu vonza?”+ Muna kuma kiaki, kazolele mo nua ko. Omama i mambu bavanga makesa mandi matatu mankuma.

20 Abisai+ wa mpangi a Yoabe+ wakala se ntu a makesa matatu mankaka; wavonda 300 za wantu muna dionga diandi, wakala ye tunda nze makesa matatu mantete.+ 21 Muna yau tatu, oyandi waluta zitiswa, ke mu nwole ko, wakala se ntu au; kansi kalwaka mu tezo kia makesa matatu mantete ko.

22 Benaya+ wa mwan’a Yoyada nkwa unkabu* kakala, wavanga mambu mayingi manene kuna Kabisele.+ Wavonda wana wole a Ariele wa musi Moabe, muna lumbu kianoka e mvul’ampembe, wakulumuka muna sima, wavonda nkosi.+ 23 Wavonda mpe musi Engipito mosi wa ntel’andá—e ntel’andi yinkoso tanu.*+ Kanele vo musi Engipito wakala ye dionga vana koko,+ diakala nze nti wa kubila nlele, Benaya wayenda kwa yandi yo nkau, wakutumuna dionga diakala vana koko kwa musi Engipito yo kumvondela muna dionga diandi.+ 24 Omama i mambu kavanga Benaya wa mwan’a Yoyada, e tunda diandi diafwanana ye makesa matatu mankuma. 25 Kana una vo wasunda 30 ma makesa o zitu, kalwaka muna tezo kia makesa matatu ma nkuma ko.+ Kansi Davidi wansola kakala se nyingidi andi.

26 E nkumbu za makesa mankuma i zazi: Asaele+ wa mpangi a Yoabe, Elekanane wa mwan’a Dodo wa musi Beteleme,+ 27 Samote wa Nyarode, Kelese wa Mpelone, 28 Ira+ wa mwan’a Yikese wa musi Tekoa, Abieze+ wa Nyanatote, 29 Sibekai+ wa Nkusa, Ilai wa Nyakoka, 30 Marai+ wa musi Netofa, Kelede+ wa mwan’a Bana wa musi Netofa, 31 Yitai wa mwan’a Ribai wa musi Ngibeya a Anebenyamini,+ Benaya wa musi Piratone, 32 Kurai wa musi ndimb’a Ngasi,+ Abiele wa musi Beta-raba, 33 Azevamete wa musi Bakurimi, Eleyakeba wa Nsalebone, 34 wan’a Kaseme wa musi Ngizone, Yonatane wa mwan’a Sange wa Nkarana, 35 Akiami wa mwan’a Saka wa Nkarana, Elifale wa mwan’a Ure, 36 Kefe wa musi Mekerate, Akiya wa Mpelone, 37 Kesero wa Nkamele, Narai wa mwan’a Ezabai, 38 Yoele wa mpangi a Natani, Mibeka wa mwan’a Kangare, 39 Seleke wa Nyamone, Nakarai wa Mberote wa nati a nuaninua ya Yoabe wa mwan’a Seruya; 40 Ira wa Nyetere, Ngarebe wa Nyetere, 41 Uriya+ wa Nkete, Zabadi wa mwan’a Akelai, 42 Adina wa mwan’a Siza wa Nrubeni, ntu a Anerubeni, ye 30 bakala yandi; 43 Kanane wa mwan’a Maka, Yosafati wa musi Mitene, 44 Uziya wa mwisi Asitarote, Sama yo Yiele, wan’a Kotame wa musi Arowa; 45 Yediyaele wa mwan’a Simere yo mpangi andi Yoka wa Ntisi; 46 Eleyele wa musi Mavi, Yerebai yo Yosaveya, wan’a Elename yo Yitema wa musi Moabe; 47 Eleyele, Obede yo Yasiele wa musi Mesoba.