Wantete wa Tusansu
15 Davidi wakwamanana tunga nzo zandi muna Mbanz’a Davidi, okubikidi e fulu kia Nkel’a Nzambi aludi, osumikini yo e saba.+ 2 I bosi, Davidi ovovele vo: “E Nkel’a Nzambi aludi ke inatwa kwa wantu ankaka ko, Anelevi kaka, kadi o Yave yau kasola mu nata Nkel’a Yave yo kunsadila yakwele mvu.”+ 3 Davidi okutakese Isaele yawonso muna Yerusaleme kimana batwasa Nkel’a Yave vana fulu kina kakubikidi yo.+
4 Davidi okutakese wan’a Arone+ yo Anelevi:+ 5 o Anekoate: Uriele wa ntu ye mpangi zandi, 120; 6 o Anemerare: Asaya+ wa ntu ye mpangi zandi, 220; 7 o Anengeresome: Yoele+ wa ntu ye mpangi zandi, 130; 8 o Anelisafane:+ Semaya wa ntu ye mpangi zandi 200; 9 o wan’a Keberone: Eleyele wa ntu ye 80 lwa mpangi zandi; 10 o wan’a Uziele:+ Aminadabi wa ntu ye mpangi zandi, 112. 11 Davidi obokele anganga Sadoke+ yo Abiata+ yo Anelevi: Uriele, Asaya, Yoele, Semaya, Eleyele yo Aminadabi, 12 ubavovese vo: “Yeno i ntu mia nzo za mase ma Anelevi. Nuyivaula oyeno ye mpangi zeno, nuatwasa Nkel’a Yave wa Nzambi a Isaele vana fulu kina nkubikidi yo. 13 Kadi oyeno wau nualembi yo tombola muna nkumbu antete,+ o Yave wa Nzambi eto watufungila makasi,+ wau twalembi vava zaya mpila yambote ya natina yo.”+ 14 Anganga yo Anelevi bakivawidi muna nata Nkel’a Yave wa Nzambi a Isaele.
15 Anelevi banatini Nkel’a Nzambi aludi muna nti vana mavembo,+ wauna kakanikina Mose muna diambu dia Yave. 16 Davidi ovovese ntu mia Anelevi vo batumbika mpangi zau se ayimbidi, bayimbila ye kiese kiawonso ye masikilu: nsambi, kokolo+ ye yimbalu.+
17 Anelevi batumbikidi Emane+ wa mwan’a Yoele; muna mpangi zandi, batumbikidi Asafi+ wa mwan’a Berekeya; muna mpangi zau Anemerare, batumbikidi Etane+ wa mwan’a Kusaya. 18 Bakala ye mpangi zau za buka kianzole:+ Zakariya, Bene, Yaziele, Semiramote, Yekiele, Uni, Eliabe, Benaya, Maseya, Matiteya, Elifeleu, Mikeneya ye ayingidi a mavitu, Obede-edome yo Yiele. 19 Ayimbidi Emane,+ Asafi,+ yo Etane bakala ye kiyekwa kia sika yimbalu+ ya nsongo; 20 yo Zakariya, Aziele, Semiramote, Yekiele, Uni, Eliabe, Maseya yo Benaya, yau basikanga e nsambi zalekama muna Alamote;*+ 21 yo Matiteya,+ Elefeleu, Mikeneya, Obede-edome, Yiele yo Azazia yau basikanga kokolo yalekama muna Seminite*+ yo twadisa ayimbidi. 22 Kenaniya+ wa ntu a Anelevi, wakala se ntwadisi wa ayimbidi ana banatanga Nkela, kadi watoma zaya e salu kiaki, 23 ayingidi a mielo Berekeya yo Elekana, yau bakala vana ntadisi a Nkela. 24 Anganga Sebaneya, Yosafati, Netanele, Amasai, Zakariya, Benaya yo Elieze yau basikanga mpungi vana vena Nkel’a Nzambi aludi,+ ayingidi a mavitu, Obede-edome yo Yekiya yau bakala vana vena Nkela.
25 Davidi ye akuluntu a Isaele ye ntu mia mafunda bele bonga e Nkel’a kangu dia Yave kuna nzo a Obede-edome+ ye kiese kiawonso.+ 26 Wau vo Nzambi aludi wasadisa Anelevi ana banata Nkel’a kangu dia Yave, batambikidi ngombe nsambwadi za makoko ye mameme nsambwadi ma makoko.+ 27 Davidi ovuete mvuel’a lino yakondwa moko, nze una bavuatila Anelevi awonso ana banatanga e Nkela ye ayimbidi; Davidi ovuete mpe kidukula kia lino.+ 28 Aneyisaele yawonso banete nkel’a kangu dia Yave muna kazu kia kiese+ ye zú dia mpungi, tulumbeta+ ye yimbalu, basikidi nsambi ye kokolo muna zú diangolo.+
29 Vava nkel’a kangu dia Yave yalwaka muna Mbanz’a Davidi,+ Mikale+ wa mwan’a Saulu otadidi vana zianela, omwene Davidi wa Ntinu otakuziokanga yo kemba; oyantikidi kumveza muna ntim’andi.+