Wantete wa Tusansu

26 Eyayi i buka y’ayingidi a mavitu:+ muna Anekora, Meselemeya+ wa mwan’a Kore, muna wan’a Asafi. 2 O wan’a Meselemeya: Zakariya wa mwan’antete, Yediyaele wanzole, Zebadeya wantatu, Yateniele wa nyá, 3 Elame wantanu, Yekanane wasambanu, Eleyoenai wansambwadi. 4 Obede-edome wakala yo wan’amakala: Semaya wa mwan’antete, Yeozabade wanzole, Yoake wantatu, Saka wa nyá, Netanele wantanu, 5 Amiele wa sambanu, Yisakare wansambwadi, Puletai wanana; kadi Nzambi wansambula.

6 Semaya wa mwan’andi, wawuta wan’amakala ana bayala nzo a se diau, kadi makesa bakala ye bafwana. 7 O wan’a Semaya: Oteni, Refaele, Obede yo Elezabade; e mpangi zandi, Eleyu yo Semakeya, bafwana mpe bakala. 8 Awaya awonso i wan’a Obede-edome; oyau yo wan’au ye mpangi zau makesa bakala, bafwana muna salu, o wan’a Obede-edome 62 bakala. 9 Meselemeya+ wakala yo wan’amakala ye mpangi, 18 dia wantu afwana. 10 O wan’a Kosa, muna wan’a Merare. Simere i ntu, kana una vo ke mwan’antete ko, o se diandi wantumbika se ntu, 11 Kilekiya wanzole, Tebaleya wantatu, Zakariya wa nyá. O wan’amakala awonso ye mpangi za Kosa, 13.

12 Muna awaya mwakala buka ya ayingidi a mavitu, awana bakala se ntu, bakalanga ye kiyekwa kia sadila muna nzo a Yave nze mpangi zau. 13 Batele nkas’a mienze+ mun’owu wa nzo za mase mau, tuka zina zandwelo ye zanene mu zaya kana nani oyingila muna konso vitu. 14 E nkas’a mienze ya vitu dia este ibwididi muna Selemeya. E nkas’a mienze ya Zakariya wa mwan’andi, wa nludiki angangu, ibwididi kuna vitu dia node. 15 Eyi ya Obede-edome ibwididi kuna sude, wan’andi+ baveno kiyekwa kia malundilu. 16 Eyi ya Sufimi yo Kosa+ ibwididi kuna weste, lukufi ye Vitu dia Salekete vana nzil’a ntomboka, konso buka kia ayingidi kiakalanga mantalani ye buka kiankaka; 17 kuna este kwakalanga Anelevi sambanu; kuna node nyá konso lumbu, kuna sude nyá konso lumbu; muna malundilu,+ nwole nwole; 18 vana veta kia weste ayingidi nyá,+ nzole vana nzila, nzole vana ndambu a veta. 19 Eyayi i buka ya ayingidi a mavitu ya wan’a Kora yo wan’a Merare.

20 Muna Anelevi, Akiya yandi wakala ye kiyekwa kia tusalu twa nzo a Nzambi aludi ye malundilu ma lekwa yavaulwa.+ 21 O wan’a Ladani: muna wan’a Ngeresone bavuilu kwa Ladani, ntu mia nzo za mase ma Ladani wa musi Ngeresone, Yekieli,+ 22 wan’a Yekieli, Zetame ye mpangi andi Yoele. Yau i akengi a tusalu twa nzo a Yave.+ 23 Muna Aneyamerame, Aneyisa, Anekeberone yo Aneuziele,+ 24 Sebuele wa mwan’a Ngeresome wa mwan’a Mose wakala ntu a malundilu. 25 Vo i mpangi zandi, muna Elieze:+ Rekabeya+ wa mwan’andi, Yesaya wa mwan’andi, Yorami wa mwan’andi, Zikere wa mwan’andi yo Selomote wa mwan’andi. 26 Selomote ye mpangi zandi bakala ye kinkengi kia malundilu mawonso ma lekwa yavauka,+ ina yavaulwa kwa Davidi wa Ntinu,+ kwa ntu mia nzo za mase,+ mfumu za mafunda ye mfumu za nkama ye kwa mfumu za makesa. 27 Bavaula lekwa yankaka ya sanzu dia vita+ muna vangulula nzo a Yave; 28 Mwakala mpe lekwa yawonso ina yavaulwa kwa Samuele wa moni,+ Saulu wa mwan’a Kisi, Abene+ wa mwan’a Ne yo Yoabe+ wa mwan’a Seruya.+ Konso lekwa kiavaulwa kwa konso muntu, kiakalanga muna wisa kia Selomite ye mpangi zandi.

29 Muna Aneyisa,+ Kenaniya ye wan’andi bavewa salu ya kumbazi a nzo a Nzambi, bakala se mbanda-mbanda ye afundisi+ muna Isaele.

30 Muna wan’a Keberone,+ Kasabiya ye mpangi zandi, 1.700 za wan’amakala afwana, bakala se akengi a Isaele muna mvivu a Yodani kuna weste, muna salu kiawonso kia Yave ye salu kia ntinu. 31 Muna Anekeberone, Yeriya+ i ntu a Anekeberone mun’owu wa luvila lwa nzo za mase mau. Muna mvu una wa 40 wa luyalu lwa Davidi,+ bavavua, muna yau mwasoloka makesa, ayakala akumama kuna Yaze+ muna Ngiladi. 32 O lutangu lwa mpangi zandi, 2.700 z’akala akumama, ntu mia nzo za mase mau. Dianu vo Davidi wa Ntinu ubavene e wisa muna Anerubeni, Anengadi ye bula-kati kwa kanda dia Manase, muna lunga-lunga mambu mawonso ma Nzambi aludi ye mambu mawonso ma ntinu.