Wanzole wa Tusansu
15 O mwand’a Nzambi wizidi muna Azareya wa mwan’a Odede. 2 Dianu vo wele kika Asa, umvovese vo: “E Asa ye Yuda yawonso ye Benyamini, nungwa! Yave okala yeno, ekolo nukala yandi;+ avo nuntombele, oyambula vo nuansolola,+ kansi avo numbembwele, yandi okunubembola.+ 3 Kadi kolo kiayingi* Isaele kakondwa Nzambi aludi, nganga muna longa ye nsiku.+ 4 Kansi, vava bakalanga muna mpasi yo vutuka kwa Yave wa Nzambi a Isaele yo kuntomba, oyandi wayambulanga vo bansolola.+ 5 Muna ntangwa yayina, ke mwakala muntu ko wavanganga nkangalu a luvuvamu,* kadi mavuanga mayingi makala vana vena nkangu miawonso mia nsi. 6 E zula eki kiafwasanga e zula kiankaka, e mbanza eyi yafwasanga mbanza yankaka, kadi Nzambi wabasia muna mavuanga mabatwasila e mpasi za mpila zawonso.+ 7 Kansi, oyeno nukumama, ke nuyoyi ko,*+ kadi e salu kieno kisendwa.”
8 Vava Asa kawá mvovo miami ye ungunza wa Odede wa ngunza, okabukidi, okatwidi teke yangemi yakala muna nsi a Yuda yawonso+ ye Benyamini yamuna mbanza zina kabaka muna zunga kia miongo mia Eferaime, otungulwidi e ziku dia Yave diakala vana veta kia mwelo a Yave.+ 9 Okutakese Yuda yawonso ye Benyamini ye nzenza ana bakala yau tuka kuna Eferaime, Manase ye Simeone,+ kadi ndonga batina muna Isaele yo yikama Asa vava bamona vo Yave wa Nzambi andi wakala yandi. 10 Muna kuma kiaki, bakutakene muna Yerusaleme muna ngonde yatatu, muna mvu wa 15 wa luyalu lwa Asa. 11 E lumbu kiakina, bakelele yimenga kwa Yave, 700 za ngombe ye 7.000 ma mameme muna twelezi basanza. 12 Vana ntandu, bakangidi kangu dia tomba Yave wa Nzambi a mase mau ye ntim’au wawonso ye kiwuntu kiau kiawonso.+ 13 Konso ona olembi tomba Yave wa Nzambi a Isaele, vondwa kevondwa, diakala nleke yovo mbuta, yakala yovo nkento.+ 14 Dianu vo, badidi ndofi kwa Yave muna nding’angolo, bakololokele ye kiese kiayingi ye tulumbeta ye mpungi. 15 E Yuda yawonso bayangalele mu kuma kia ndofi, kadi badidi e ndofi ye ntim’au wawonso, bantombele kuna luzolo, oyambwidi vo bansolola,+ Yave okwamanene kubavana vundu muna ndambu zawonso.+
16 O Asa wa ntinu okatwidi Maka+ wa nkak’andi vana fulu kia ntinu ankento wa ngudi a ntinu,* kadi wavanga teke kiangemi mu kuma kia nsambil’a vindi diavauka.*+ Asa obangwidi teke kiandi kiangemi, okosomwene kio, oyokele kio kuna Ndimb’a Kiderone.+ 17 Kansi, mabata ke makatulwa ko+ muna Isaele.+ Kana una vo i wau, o ntim’a Asa wasikila emvimba muna zingu kiandi kiawonso.*+ 18 Otwese muna nzo a Nzambi aludi e lekwa ina se diandi kavaula ye ina yandi kibeni kavaula—palata, wolo ye salanganu ya mpila mu mpila.+ 19 Ke vakala diaka vita ko yamuna mvu una wa 35 wa luyalu lwa Asa.+