Luvaiku

12 Yave ovovese Mose yo Arone muna nsi ya Engipito vo: 2 “E ngonde yayi ikala se lubantiku lwa zingonde kuna kwa yeno. Ikala se ngonde antete ya mvu kwa yeno.+ 3 Nuzayisa nkangu awonso a Isaele vo: ‘Muna lumbu kia kumi kia ngonde yayi, konso muntu kafwete bonga meme+ mu kuma kia esi nzo andi,* meme dimosi muna konso nzo. 4 Kansi, avo e nzo ke ina ndonga ko mu dia meme diamvimba, oyau bedia* dio muna nzo au kumosi yo mfinangani zau ana* balutidi finama, mun’owu wa lutangu lwa wantu.* Vava nuzaya lutangu lwa wantu, nusikidisa e kunku kedia konso muntu muna meme. 5 E bulu kifwete kala kialunga,+ koko dia mvu mosi. Nulenda sola mwan’a meme a koko yovo mwan’a nkombo. 6 Nufwete kio lunga-lunga yamuna lumbu kia 14 kia ngonde yayi,+ konso nzo muna nkutakani a Isaele ivonda e bulu muna nkokela, vitila tombe kiabukama.*+ 7 Bafwete bonga ndambu a menga bakusa yo muna malunzi mole ma mwelo ye nkambikw’a mwelo a nzo ina bedila e bulu.+

8 “‘Bafwete dia e mbizi muna fuku wauna.+ Bafwete yo yanga vana tiya yo dila yo muna mbolo zakondwa e mfuna+ ye makaya mandudi.+ 9 Ke nudie kana ndambu a bulu kiokio kiankunzu ko ngatu kiafukuswa mu maza. Kansi, nuyanga kio vana tiya, kumosi yo ntu, malu ye lekwa yandi yakati. 10 Ke nulundi kana tini ko mu kuma kia mbazi, kansi avo vasuvidi ndambu yamuna mene, nufwete yo yoka vana tiya.+ 11 I wau wuwu nufwete yo dila: Nufwete kala ye mponda muna luketo,* nsampatu muna malu yo nkau vana koko; nufwete yo dila mu nzaki. I Ndut’a Yave. 12 Kadi muna fuku wauna iviokela muna nsi ya Engipito yo vonda wan’antete awonso muna nsi a Engipito, tuka muna wantu yamuna bulu;+ itumba e nzambi zawonso za Engipito.+ Mono i Yave. 13 O menga mekala kwa yeno se sinsu muna nzo zina nukala; omono imona o menga yo kunuvioka, e vuku ke kikunulwakila ko kianufwasa vava itumba e nsi a Engipito.+

14 “‘E lumbu kiakina kikala se lumbu kia luyindulu kwa yeno. Nufwete kio kembelela se nkinzi kwa Yave. Nufwete kio kembelela muna mbandu zeno zawonso. Owau nkanikinu wa mvu ke mvu. 15 Lumbu nsambwadi nudia e mbolo zakondwa mfuna.+ Elo, muna lumbu kiantete nufwete katula e mfuna muna nzo zeno, kadi tuka muna lumbu kiantete yamuna lumbu kiansambwadi, konso muntu* odia lekwa kiasiwa e mfuna, kafwete vondwa* muna Isaele. 16 Muna lumbu kiantete nuvanga lukutakanu lwavauka, muna lumbu kiansambwadi nuvanga lukutakanu lwankaka lwavauka. Ke musalwa konso salu ko muna lumbu yayi.+ Nanga vo lamba kaka kina konso muntu kavuidi o mfunu mu dia, i salu kaka nusala.

17 “‘Nufwete kwamanana kembela o Nkinzi a Mbolo Zakondwa Mfuna,+ kadi muna lumbu kiakina, ivaikisa e vu yeno* muna nsi ya Engipito. Nufwete kwamanana lunda lumbu kiaki muna mbandu zeno zawonso se nkanikinu wa mvu ke mvu. 18 Tuka muna nkokela ya lumbu kia 14 yamuna nkokela ya lumbu kia 21 kia ngonde antete, nudia mbolo zakondwa mfuna.+ 19 Muna lumbu nsambwadi yayi, ke musoloki mfuna ko muna nzo zeno, kadi konso muntu odia lekwa kiasiwa e mfuna, kiakala nzenza yovo mwan’a Isaele,+ muntu ndioyo kafwete vondwa* vana vena nkangu a Isaele.+ 20 Ke nudie konso lekwa ko kiasiwa e mfuna. Muna nzo zeno zawonso, nufwete dia mbolo zakondwa mfuna.’”

21 Vana vau, Mose obokele akuluntu awonso a Isaele,+ ubavovese vo: “Nuenda, konso muntu mu yeno kasola mwan’a bulu* mu kuma kia nzo andi, nuvonda e bulu kia kimenga kia Nduta. 22 I bosi, nuvunga e saki kia nti a isopo muna menga mena muna longa yo kusa mo vana baya dia ntandu a mwelo ye muna malunzi mole ma mwelo; ke muntu ko vovo nuina ovaika muna nzo andi yamuna mene. 23 Vava Yave kevioka muna tumba esi Engipito yo mona o menga vana baya dia ntandu a mwelo ye muna malunzi mole ma mwelo, kieleka, Yave oluta o mwelo wowo, ke yambula ko vo e vuku kiampondi* kiakota muna nzo zeno.+

24 “Nufwete kembelanga nkinzi wau, ukala se nkanikinu wa mvu ke mvu kwa yeno ye kwa wan’eno.+ 25 Vava nukota muna nsi ina Yave kekunuvana nze una kavova, nufwete kwamanana kembela nkinzi wau.+ 26 Vava wan’eno bekunuyuvula vo: ‘Ayeyi i nsas’a nkinzi wau?’+ 27 nufwete kubavutula vo: ‘I kimenga kia Ndut’a Yave, ona waluta e nzo za Aneyisaele muna Engipito vava katumba esi Engipito, kansi wavukisa e nzo zeto.’”

Muna diadi, o nkangu ufukamene yo bokeka e ntu. 28 Aneyisaele bele, bavangidi wauna o Yave kakanikina Mose yo Arone.+ I una kikilu bavangidi.

29 Muna midi mia mpimpa, Yave ovondele wan’antete awonso muna nsi ya Engipito,+ tuka muna mwan’antete a Faro ona wakala vana kunda kiandi kia kimfumu* yamuna mwan’antete wa mbakami wakala muna pelezo, yo wan’awonso antete a bulu.+ 30 Muna fuku wauna, Faro osikamene kumosi ye selo yandi yawonso ye esi Engipito ankaka; vakele kazu kiangolo vana vena esi Engipito, kadi ke vakala nzo ko yakondwa mafwa.+ 31 Vana vau obokele Mose yo Arone+ muna fuku, ovovele vo: “Nukatuka ova kati kwa nkangu ame, oyeno ye Aneyisaele ankaka. Nuenda, nuasadila Yave, wauna nuavova.+ 32 Nubonga mpe mameme meno ye ngombe zeno, nuenda kweno, wauna nuavova.+ Kansi, nufwete mpe kunsambula.”

33 Esi Engipito bayantikidi komekena o nkangu+ kimana wavaika muna nsi, kadi bavovele vo: “Avo ke nuvaika ko, wantu awonso fwa befwa!”+ 34 O nkangu unete mbûmba miau mialembi siwa e mfuna, banete niemenua ya mbumba mia mbolo* vana mavembo, bazingidi yo vana nlele miau. 35 Aneyisaele bavangidi dina Mose kabavovese, balombele kwa esi Engipito lekwa ya palata, ya wolo ye mvuatu.+ 36 Yave omwesese nkangu e dienga vana meso ma esi Engipito, babavene ina babalombele, i nsanza basanzidi esi Engipito.+

37 I bosi, Aneyisaele bakatukidi tuka kuna Ramesese+ bele kiamalu yakuna Sukote,+ tezo kia 600.000 ma wan’amakala, lembi tanga o wana.+ 38 Ndonga mun’awana ke bakala Aneyisaele ko*+ bele yau, kumosi ye mameme ye ngombe, ulolo wa twelezi. 39 Bayantikidi yoka e mbolo zavindumuka zakondwa e mfuna, zina bavangila muna mbûmba batuka miau kuna Engipito. Ke miasiwa mfuna ko, kadi kuna kinsalukisa bayingilwa muna Engipito, ke bakala ye ntangwa ya kuyikubikila madia ko.+

40 E kolo kina Aneyisaele bazingila, ana bazingila muna Engipito,+ mvu 430.+ 41 Muna lumbu kina balungisa mvu 430, e vu kiawonso kia Yave kiavaika muna nsi ya Engipito. 42 Owau i fuku bekembela Yave wau kabavaikisa muna nsi ya Engipito. O nkangu awonso a Isaele ufwete kembelanga fuku wau mu kuma kia Yave muna mbandu zau zawonso.+

43 Yave ovovese Mose yo Arone vo: “Owau i nkanikinu mu kuma kia Nduta: Ke vena nzenza ko ofwete dia e bulu kia kimenga kia nduta.+ 44 Kansi, avo muntu una ye ntaudi ayakala kasumbila muna nzimbu, kafwete kunzenga.+ I bosi olenda kwandi dia e bulu kia kimenga kia Nduta. 45 O muntu watuka ku nsi yankaka yo nsadi ona ofutwanga, ke bafwete dia bulu kia kimenga kia Nduta ko. 46 O mwan’a meme mu nzo mosi kafwete dilwa. Kufwete nata nsuni ku mbazi a nzo ko, ke nufwete mpe tolola kana kimosi ko muna visi yandi.+ 47 O nkangu awonso a Isaele ufwete kembela e Nduta. 48 Avo nzenza vovo nuina ozolele kembela e Ndut’a Yave, o wan’amakala awonso a nzo andi bafwete zengwa. I bosi kefinama mu kembela e Nduta, okala nga Nyisaele a kingutukila. Kansi, ke vena mundembi zengwa ko ofwete dia e bulu kia Nduta.+ 49 Nsiku umosi usadilwa kwa mungutukila ye kwa nzenza una vovo nuina.”+

50 Aneyisaele awonso bavangidi una Yave kakanikina kwa Mose yo Arone. I una kikilu bavangidi. 51 Muna lumbu kiakina, Yave ovaikisi Aneyisaele kumosi ye vu yau muna nsi ya Engipito.