Kimpovi

10 Wauna e mbwanzi zafwa zifwasilanga o mazi mansunga yo tesesa mo e nsudi, i wauna o uzowa wandwelo uzitilanga lutila ngangu yo nkembo.+

2 O ntim’a nkwa ngangu ukumfilanga muna nzila yambote,* kansi o ntim’a zowa ukumfilanga muna nzila yambi.*+ 3 Muna konso nzila kekangalela o zowa, kekalanga ye ngindu zasikila ko,*+ osonganga kwa wantu awonso vo oyandi zowa.+

4 Avo makasi ma nyadi mafusukidi omu ngeye, kukatuka vana fulu kiaku ko,+ kadi o lulembamu masumu manene lulembekanga.+

5 Vena ye diambu diampasi mbwene oku nsi a ntangwa, e mpil’a vilwa uvangwanga kwa awana beyalanga:+ 6 Amazowa besiwanga mu fulu yayingi yatunda, kansi ana bafwene* bakinu muna fulu yasakalala.

7 Mbwene e ntaudi zikangalelanga muna mvalu, kansi e mfumu bekangalanga kiamalu nga ntaudi.+

8 Ndiona otimunanga e wulu olenda mo bwa;+ ndiona owulanga yaka kia matadi olenda tatikwa kwa nioka.

9 Ndiona otimunanga matadi olenda lwala muna matadi momo, ndiona o pasulanga mavindi ma nti mu vonza kekuyisianga.*

10 Avo e sadilwa kia sengwa ke kina meno ko ye ke kilengelo ko, divava vo muntu kavanga ngolo zayingi. Kansi e ngangu zisadisa mu vua nluta.

11 Avo nioka itatikidi vitila yalemvolwa, ndiona ozeye toma nlemvola e nioka* kena diaka mfunu ko.

12 E mvovo mivaikanga muna nua wa nkwa ngangu dienga mitwasanga,+ kansi e befo ya zowa i lufwasu lwandi.+ 13 E mvovo miantete mia nu’andi i uzowa,+ e mvovo miandi miansuka i ulau wasaka. 14 Kansi, o zowa okwamanene vova.+

O muntu kazeye ko dina divangama, nani olenda kunzayisa dina divangama vava kefwa?+

15 E salu kiangolo kia zowa yoyesa kikunyoyesanga, kadi kana nkutu e nzil’a kwendela kuna mbanza kazeye una ke sololwela yo ko.

16 Diavonza kwa nsi avo ntinu andi nleke,+ e mfumu zandi beyantikanga e nkinzi miau muna mene-mene! 17 Diakiese kwa nsi avo ntinu andi mwan’a nkwa zitu, e mfumu zandi bedianga muna ntangwa ifwene muna vutulwisa o nkuma, ke mu kolwa malavu ko!+

18 Mu kuma kia kimolo kiasaka, e miangu mia* nludi misotokele. Mu kuma kia moko mazebalala, e nzo inokene.+

19 E mbolo* ivangwanga mu vana e kiese, e vinyu ikitulanga e zingu se kiakiese;+ kansi e nzimbu zilungisanga e nsatu zawonso.+

20 Kusibi ntinu ko kana nkutu muna ngindu zaku,*+ kusibi mvuama ko muna suku diaku; kadi e nuni* ilenda nata e mvovo miaku,* e ma kina ye nsala kilenda samuna dina ovovele.