Yesaya
58 “Boka mu nding’angolo; kuyoyi ko!
Tatula e ndinga nze mpungi.
Zayisa kwa nkangu ame o ukolami wau,+
Kwa nzo a Yakobo o masumu mau.
2 Bekumpavanga lumbu ke lumbu,
Yo vova vo beyangalelanga zaya e nzila zame,
Vika sia vo zula kivanganga mambu mansongi
Ke kibembwele unsongi wa Nzambi au ko.+
Bekundombanga vo yafundisila muna unsongi,
Beyangalelanga finama Nzambi:+
3 ‘Ekuma kukututadilanga ko vava tuminanga o nsoki?+
Ekuma kusilanga sungididi ko vava tukendalalanga?’+
4 Mu mpaka ye nzonzi nufokolwelanga mina o nsoki,
Yo wandaziana e nkome muna nsoki wawonso.
Ke nulendi mina nsoki mu mpila yayi ko yo vingila vo e ndinga zeno zawakana kuna zulu.
5 Nga eyayi i mpila ya minina e nsoki iyangalelanga e?
Kiakituka se lumbu kia lukendalalu kwa muntu,
Kiabokeka o ntu andi nga diadia,
Kialavalala vana ngoto yo ntoto ampolo e?
Nga i wau nuyikilanga vo mina nsoki ye lumbu kialuyangalalu kwa Yave?
6 Ve, o mina nsoki iyangalelanga i wau wuwu:
Zezesa tuvambu twa mpasi,
Kutulula e nsinga mia vangu,+
Vevola awana bemweswanga e mpasi,+
Yo tolola e vangu yawonso vana kati;
7 Kayana e mbolo aku yo mumfwa nzala,+
Tambula muna nzo aku o nsukami ye ndiona okondelo e nzo,
Vuika ona okondelo e mvuatu avo umwene,+
Yo lembi fila o nkwaku e nima.
8 Ozevo, o ntemo aku ukezima nga kia kwa kuma,+
Osasuka mu nzaki zawonso.
O unsongi waku ukuvita kuna ntwala,
O nkembo a Yave ukala se ntanini aku kuna nima.+
9 I bosi oboka, o Yave okuvan’e mvutu;
Okaza mu lomba lusadisu, oyandi ovova vo: ‘Mono oyu!’
Avo okatwidi e vangu vovo lwina
Yo yambula songa nlembo aku yo vova mvovo miambi,+
10 Avo ovene mumfwe nzala kina ngeye kibeni ozolanga+
Yo yukutisa awana bena mu mpasi,
Ozevo, o ntemo aku ukezima kana nkutu muna tombe
E tombe kiaku kiangolo kikala nze ntangw’a midi.+
11 Yave okufila ntangwa zawonso
Okuyukutisa kana nkutu muna ntoto ayuma;+
Okumika e visi yaku,
Ongeye okala nze mpatu itoma yitilwanga o maza,+
Nga nto ilembi kondwanga o maza.
Ongeye oyikilwa vo ntunguludi a yaka yawudika,+
Ye mvutulwisi a nzila zina ye nzo.
13 Avo olunda e Lumbu kia Vundu muna lembi vava wete dia* ngeye kibeni muna lumbu kiame kiavauka+
Wayikila e Lumbu kia Vundu vo lumbu kisundidi e kiese, lumbu kiavauka kia Yave, lumbu kia kembeswa,+
Wakembesa kio vana fulu kia vava wete dia ngeye kibeni yo vova mambu makondwa o mfunu,
14 Ozevo, kiese kiayingi okala kiau muna Yave,
Ikudiatisila mu mvalu muna fulu yazanguka ya nza.+