Yezekele

36 “Vo i ngeye, e mwan’a muntu, sakula mu kuma kia miongo mia Isaele, vova vo: ‘E yeno miongo mia Isaele, nuwá e diambu dia Yave. 2 I wau wuwu kavovele o Mfumu Yave: “E mbeni zinuvovese muna luvezo vo: ‘Dinufwanukini!’ Kana nkutu i fulu yazanguka yankulu ikitukidi se vua dieto!’”’+

3 “Muna kuma kiaki, sakula yo vova vo: ‘I wau wuwu kavovele o Mfumu Yave: “Wau vo basisidi e nkatu yo kunuanisa muna ndambu zawonso, kimana wakituka se vua dia awana basidi o moyo* vana vena e zula, ye wau vo wantu bekwamanananga kumokenena yo kuvovela e mbi,+ 4 ozevo, e yeno miongo mia Isaele, nuwá e diambu dia Mfumu Yave! I wau wuwu kavovele o Mfumu Yave kwa miongo ye kundubulu, kwa nkoko ye ndimba, kwa mazumbu masiswa e nkatu+ ye kwa mbanza zabembolwa zina zasanzwa yo vezwa kwa awana basidi o moyo muna zula ibazungidi;+ 5 i wau wuwu kavovele o Mfumu Yave kuna kwa yau: ‘Mu tiya twa makasi mame+ ivovanena ye awana basidi o moyo muna zula ye Edome yawonso, ana bavovele kuna lusanu lwawonso yo luvezo+ vo, e nsi ame yau bavuidi yo, kimana bavua madilu mandi yo sanza mo.’”’+

6 “Muna kuma kiaki, sakula mu kuma kia nsi a Isaele yo vova kwa miongo, kwa kundubulu, kwa nkoko ye kwa ndimba vo: ‘I wau wuwu kavovele o Mfumu Yave: “Tala! Muna makasi mame ye muna nsita zame ivovela, mu kuma kia nsoni nufusulwisu kwa zula.”’+

7 “Ozevo i wau wuwu kavovele o Mfumu Yave: ‘Nzangwidi o koko kwame mu dia e ndofi vo e nsoni zivutukila e zula inuzungidi.+ 8 Vo i yeno, e miongo mia Isaele, numena e tayi yo wuta mbongo mu kuma kia nkangu ame Isaele,+ kadi uvutuka ke kolo ko. 9 Kadi omono ngina yeno, ikunusia diaka e sungididi, nuvatwa yo kunua e mbongo. 10 Iwokesa o nkangu eno—e nzo yawonso ya Isaele, yau awonso—, e mbanza zizingilwa diaka kwa wantu,+ e mazumbu metungululwa.+ 11 Elo, iwokesa o nkangu eno yo makambi meno;+ oyau bewokela yo wutana. Iyambula vo nuazingilwa diaka kwa wantu nze una nuateka kala+ yo kunuvatumuna lutila e lumbu yavioka;+ nuzaya wo vo mono i Yave.+ 12 Iyambula vo nkangu—o nkangu ame Isaele—wakangalela vana ntandu eno, bekunuvua.+ Nukituka se vua diau, ke nukubasisa diaka nkatu ko, kondwa wana.’”+

13 “I wau wuwu kavovele o Mfumu Yave: ‘Wau vo bekunuvovesanga vo: “Ongeye u nsi ivempolanga o wantu yo sisa e zula yaku e nkatu, kondwa wana,”’ 14 ‘ozevo, kuvempola diaka wantu ko ngatu sisa e zula yaku e nkatu, kondwa wana,’ u kavovele o Mfumu Yave. 15 ‘Kiyambula ko vo wafingwa diaka kwa zula yovo yambula vo wazizidila luvezo lwa wantu,+ kutesesa diaka zula yaku sakuba ko,’ u kavovele o Mfumu Yave.”

16 E diambu dia Yave dizidi diaka kwa mono, oku vo: 17 “E mwan’a muntu, vava e nzo a Isaele yazingidinge muna nsi au, bafunzwidi e nsi muna nzila zau yo mavangu mau.+ E nzila zau zikedi nze mfunzuk’a nkento una ku ngonde.+ 18 Idianu yabapongolwele nsita zame mu kuma kia menga mana babungwidi muna nsi+ ye wau bafunzwidi e nsi muna teke yau yangemi.*+ 19 Muna kuma kiaki, ibatiakanese muna zula yo kubamwanganesa muna nsi zayingi.+ Ibafundisidi mun’owu wa nzila zau yo mavangu mau. 20 Kansi, vava balweke muna zula yoyo, wantu basafwidi e nkumbu ame avauka+ muna vova mu kuma kiau vo: ‘Awaya i nkangu a Yave, kansi basisidi e nsi andi.’ 21 Muna kuma kiaki, diambu mvanga mu kuma kia nkumbu ame avauka, eyi isafwilu kwa nzo a Isaele muna zula ina bayenda.”+

22 “Ozevo, vovesa e nzo a Isaele vo: ‘I wau wuwu kavovele o Mfumu Yave: “Ke mu kuma kieno ko ivangilanga mambu mama, e nzo a Isaele, kansi mu kuma kia nkumbu ame avauka, eyi nusafwidi muna zula ina nuayenda.”’+ 23 ‘Vaula ivaula e nkumbu ame anene,+ ina isafwilu vana vena e zula, e nkumbu ina oyeno nusafwidi vana bena; e zula izaya wo vo mono i Yave,’ u kavovele o Mfumu Yave,+ ‘vava ivaulwa vana kati kweno, vana ndose zau. 24 Ikunubonga tuka muna zula, ikunukutakesa tuka muna nsi zawonso yo kunuvutulwisa muna nsi eno.+ 25 Ikunuzaza o maza mavelela, oyeno nuvelela;+ ikunuvelelesa muna mfunzuka eno yawonso+ ye muna teke yeno yawonso yangemi.+ 26 Ikunuvana ntim’ampa+ yo sia mwand’ampa omu yeno.+ Ikatula o ntim’a tadi+ muna nitu zeno yo kunuvana o ntim’a nsuni.* 27 Isia mwand’ame omu yeno, iyambula vo nuakangadila muna nsiku miame,+ oyeno nulunda yo lemvokela e nzengo zame za mfundisa. 28 I bosi, nuzingila muna nsi ina yavana kwa akulu eno, oyeno nukala nkangu ame, omono ikala Nzambi eno.’+

29 “‘Omono ikunukatula muna mfunzuka eno yawonso, ikanikina e mbwaza zawuta mbongo ayingi, kikunutwasila mvengele ko.+ 30 Iwokesa kikilu e bundu ya nti ye mbongo a mpatu, kimana nualembi fusuka diaka e nsoni vana vena e zula mu kuma kia mvengele.+ 31 I bosi, nusungamena e nzila zeno zambi yo mavangu meno mambi, nkele nukuyimwena mu kuma kia makuzuka meno ye mavangu meno mangemi.+ 32 Kansi, nuzaya edi: Ke mu kuma kieno ko ivangilanga o mambu mama,’+ u kavovele o Mfumu Yave. ‘Kansi, nuyimwena e nsoni yo kuyimwena vo ke nuna mfunu ko mu kuma kia nzila zeno, e nzo Isaele.’

33 “I wau wuwu kavovele o Mfumu Yave: ‘Muna lumbu kina ikunuvelelesa muna makuzuka meno mawonso, iyambula vo e mbanza zazingilwa kwa wantu,+ e mazumbu matungululwa.+ 34 E nsi yasala e nkatu ivatwa, kana una vo yamonekanga vana meso ma minduti a nzila awonso vo yasala e nkatu. 35 Wantu bevova vo: “E nsi yasala e nkatu ikitukidi nze mpatu a Edene;+ e mbanza zakala se mazumbu, zasala e nkatu ye zafwaswa, owau zizieteso e yaka yo zingilwa kwa wantu.”+ 36 E zula ina yasala muna kinzieta kieno izaya wo vo mono Yave ntungulwidi mazumbu yo kuna e mbongo muna nsi yasala e nkatu. Mono kibeni Yave mpovele wo, ivanga wo kikilu.’+

37 “I wau wuwu kavovele o Mfumu Yave: ‘Iyambula mpe vo e nzo a Isaele yandomba vo yabavangila e diambu edi: Iwokesa o nkangu au nze kambi. 38 Nze kambi di’avauki, nze kambi dia Yerusaleme* muna ntangw’a nkinzi miandi,+ e mbanza zakala se mazumbu zizala ye makambi ma wantu;+ bezaya wo vo mono i Yave.’”