Levitiku

13 Yave okwamanene vovesa Mose yo Arone vo: 2 “Avo muntu ovimbidi konso fulu yovo ovaikidi mputa yovo tona muna nkand’andi a nitu, edi dilenda kala se sinsu kia kimbevo kia wazi*+ muna nkand’andi, kafwete natwa kwa Arone wa nganga yovo kwa mosi muna wan’andi, anganga.+ 3 O nganga ofimpa e kimbevo kina muna nkand’a nitu a muntu ndioyo. Avo e mika mia fulu kiokio mikitukidi miampembe, e kimbevo kikotele yakuna nsi a nkand’a nitu, ozevo i kimbevo kia wazi. O nganga ofimpa e kimbevo yo yikila muntu vo wafunzuka. 4 Kansi, avo e tona muna nkand’andi a nitu diampembe ye ke dikotele yakuna nsi a nkanda ko, e mika ke mikitukidi miampembe ko, ozevo, o nganga osia mbevo ndioyo va fulu kia yandi kaka mu lumbu nsambwadi.+ 5 I bosi, muna lumbu kiansambwadi o nganga okumfimpa diaka, avo e tona ke disobele ko, ke diyalangene ko muna nkand’a nitu, o nganga osia mbevo ndioyo va fulu kia yandi kaka mu lumbu nsambwadi diaka.

6 “Muna lumbu kiansambwadi o nganga okumfimpa diaka, avo e tona diyumini, ke diyalangene ko muna nkand’a nitu, o nganga okunyikila vo wavelela;+ mputa kwandi. I bosi, o muntu osukula e mvuatu miandi yo kala wavelela. 7 Kansi, avo muntu wayisunzula kala vana ndose a nganga yo yikilwa vo wavelela, i bosi e mputa iyalangene muna nkand’andi a nitu, ozevo muntu ndioyo ovutuka diaka* kwa nganga. 8 O nganga ofimpa e mputa, avo iyalangene muna nkand’a nitu, o nganga oyikila muntu ndioyo vo wafunzuka. I kimbevo kia wazi.+

9 “Avo e kimbevo kia wazi kiwokele muna muntu, kafwete natwa kwa nganga, 10 o nganga okumfimpa.+ Avo vimbu diampembe dina muna nkand’a nitu, dikitwidi e mika se miampembe ye mputa+ ina vana vimbu, 11 ozevo wazi ulembi sasuka una muna nkand’andi a nitu, o nganga okunyikila vo wafunzuka. Ke kunsia va fulu kia yandi kaka ko,+ kadi wafunzuka. 12 Avo wazi uvaikidi muna nkanda wawonso wa nitu, e kimbevo kia wazi kiafukila o muntu tuka kuna ntu yamuna malu, yamuna tezo kina o nganga kalenda mona, 13 o nganga kamfimpa yo mona vo wazi ufukidi o nkand’andi wawonso wa nitu, oyikila o mbevo vo wavelela.* O nkanda wawonso ukitukidi se wampembe, o muntu wavelela. 14 Kansi e lumbu kevaikwa e mputa muna nkand’a nitu, okala wafunzuka. 15 Vava o nganga kemona e mputa yaziuka, okunyikila vo wafunzuka.+ E mputa yaziuka yafunzuka. I wazi.+ 16 Kansi, avo e mputa yaziuka ikitukidi diaka se yampembe, okuyisunzula kwa nganga. 17 O nganga okumfimpa,+ avo e mputa ikitukidi yampembe, o nganga oyikila mbevo vo wavelela. Ovelele kwandi.

18 “Avo muntu ovaikidi vumbu muna nkand’andi a nitu, e vumbu diasasuka, 19 kansi vana fulu kia vumbu vavaika vimbu diampembe yovo tona diampembe a kimbwaki, o muntu ndioyo kafwete kuyisunzula kwa nganga. 20 O nganga ofimpa dio;+ avo dikotele yakuna nsi a nkand’a nitu, diavioka o nkand’a nitu, e mika mia fulu kiokio mikitukidi se miampembe, o nganga okunyikila vo wafunzuka. E kiokio kimbevo kia wazi kivaikidi vana vumbu. 21 Kansi, o nganga avo ofimpidi dio yo mona vo ke vena mika miampembe ko, ke dikotele yakuna nsi a nkand’a nitu ko ye diyantikidi yuma, o nganga okunsia va fulu kia yandi kaka mu lumbu nsambwadi.+ 22 Avo diyalangene muna nkand’a nitu, o nganga okunyikila vo wafunzuka. Wazi kena wau. 23 Kansi, avo e tona ke diwokele ko ye ke diyalangene ko, ozevo e fulu kiavimba vumbu kwandi, o nganga okunyikila vo wavelela.+

24 “Yovo, avo muntu ovidi muna tiya, o nsuni a mputa wayantika kituka se tona diampembe a kimbwaki yovo diampembe, 25 o nganga ofimpa dio. Avo e mika vana tona diodio mikitukidi se miampembe, e tona dikotele yakuna nsi a nkand’a nitu, ozevo wazi uvaikidi vana mputa; o nganga okunyikila vo wafunzuka. E kiokio kimbevo kia wazi. 26 Kansi, avo nganga ofimpidi e tona yo mona vo ke vena mika miampembe ko, ke dikotele yakuna nsi a nkand’a nitu ko ye mu yuma se dina, o nganga okunsia va fulu kia yandi kaka mu lumbu nsambwadi.+ 27 O nganga okumfimpa muna lumbu kiansambwadi, avo e tona diyalangene kikilu muna nkand’a nitu, o nganga okunyikila vo wafunzuka. E kiokio kimbevo kia wazi. 28 Kansi, avo e tona ke disobele ko, ke diyalangene ko muna nkand’a nitu ye diyantikidi yuma, ozevo vimbu kwandi dia fulu kiavia muna tiya; o nganga okunyikila vo wavelela, kadi vimbu kwandi dia fulu kiavia muna tiya.

29 “Avo yakala yovo nkento ovaikilu basa-basa* kuna ntu yovo vana bobo, 30 o nganga ofimpa e kimbevo kiokio.+ Avo kiakuluka vioka o nkand’a nitu, e nsuki za fulu kiokio zikitukidi nga se kia mbum’a diaki ye ke zayingi diaka ko, o nganga oyikila muntu ndioyo vo wafunzuka; e kiokio kimbevo kia nkand’a ntu yovo kia nzevo. O wowo wazi wa ntu yovo wa bobo. 31 Kansi, avo nganga omwene vo e basa-basa* ke kikotele yakuna nsi a nkand’a nitu ko ye ke vena nsuki zandombe ko vana fulu kiokio, o nganga osia muntu ndioyo va fulu kia yandi kaka mu lumbu nsambwadi.+ 32 O nganga ofimpa e basa-basa* muna lumbu kiansambwadi, avo kimbevo kiokio ke kiyalangane ko, ke vavaikidi nsuki za se kia mbum’a diaki ko vana fulu kiokio ye basa-basa* ke kiviokele nkand’a nitu ko, 33 o muntu kafwete vala e nsuki, kansi e fulu kina e kimbevo kafwete kio vala ko. I bosi, o nganga osia muntu ndioyo va fulu kia yandi kaka mu lumbu nsambwadi.

34 “Muna lumbu kiansambwadi, o nganga ofimpa diaka e fulu kina kimbevo; avo e basa-basa* kia nkand’a ntu yovo vana bobo ke kiyalangene ko muna nkand’a nitu, ke kikotele yakuna nsi a nkand’a nitu ko, o nganga okunyikila vo wavelela, kafwete sukula e mvuatu miandi yo kala wavelela. 35 Kansi, avo muntu oveleleso kala, i bosi e basa-basa* kiyalangene diaka muna nkand’a nitu, 36 o nganga okumfimpa; avo kinsampala kiyalangene muna nkand’a nitu, ke dikala diaka mfunu ko kwa nganga kavava e nsuki za se kia mbum’a diaki; o muntu wafunzuka. 37 Kansi, avo nganga ofimpidi yo mona vo basa-basa* ke kiyalangene ko ye vamenene nsuki za ndombe, ozevo e basa-basa kisasukidi. Muntu ndioyo wavelela kena, o nganga okunyikila vo wavelela.+

38 “Avo yakala yovo nkento ovaikidi matona muna nkand’a nitu, avo matona mampembe, 39 o nganga ofimpa mo.+ Avo matona ma nkand’a nitu mampembe, ozevo nkand’a nitu kwandi uwazumukini. O muntu ndioyo wavelela.

40 “Avo muntu oyantikidi vuzuka e nsuki vana ntu andi yo kituka nkwa vandu, muntu ndioyo wavelela. 41 Avo ovuzukidi e nsuki vana ndambu a lose lwandi, e fulu kiokio kiakituka se vandu, muntu ndioyo wavelela. 42 Kansi, avo mputa yampembe a kimbwaki ivaikidi vana nkand’a vandu kiandi yovo vana ndambu a lose lwandi, ozevo wazi uvaikidi vana nkand’a vandu kiandi yovo vana ndambu a lose lwandi. 43 O nganga okumfimpa, avo e vimbu diampembe a kimbwaki divaikidi vana vandu, vana ntandu a ntu andi yovo kuna ndambu a lose lwandi ye dina nze wazi muna nkand’andi a nitu, 44 ozevo nkwa wazi. Wafunzuka, o nganga okunyikila vo wafunzuka mu kuma kia kimbevo kina vana ntu andi. 45 Vo i muntu una ye kimbevo kia wazi, kafwete vuata mvuatu miatiazuka, e nsuki zandi ke zikubikwa ko. Kafwete fuka o nu’andi* yo kaza vo: ‘Yafunzuka, yafunzuka!’ 46 Okala wafunzuka muna kolo kiawonso kekala ye kimbevo. Wau vo wafunzuka, kafwete zingila va fulu kia yandi kaka. Kuna mbazi a ndo kezingila.+

47 “Avo kimbevo kia wazi kisambukidi muna mvuatu, kiakala mvuatu a mika yovo mvuatu a lino, 48 kiakala muna nsinga watungilwa o nlele a lino yovo a mika yovo muna nkand’a bulu yovo muna konso lekwa kiavangilwa muna nkand’a bulu, 49 ye mwavaika tona dia kimbevo dia se kia lukaya lwa nkunzu a mbum’a diaki yovo diambwaki muna mvuatu, muna nkand’a bulu, muna nsinga watungilwa o nlele yovo muna konso lekwa kiavangilwa mu nkand’a bulu, ozevo wazi usambukidi mo, e lekwa kiokio kifwete songwa kwa nganga. 50 O nganga ofimpa kimbevo kiokio, osia mbevo va fulu kia yandi kaka mu lumbu nsambwadi.+ 51 Muna lumbu kiansambwadi ofimpa e kimbevo, avo omwene vo kiyalangene muna mvuatu, muna nsinga watungilwa o nlele yovo muna nkanda (kiakala nkia mpila usadilwanga), ozevo e kimbevo kiokio wazi wa nsambukila, e lekwa kiokio kiafunzuka.+ 52 Kafwete yoka e mvuatu, e nsinga miatungilwa o nlele a mika yovo a lino yovo konso lekwa kia nkand’a bulu eki kisolokele tona, kadi wazi wa nsambukila. Kifwete yokwa vana tiya.

53 “Kansi, avo nganga ofimpidi e tona yo mona vo ke diyalangene ko muna mvuatu yovo muna nsinga watungilwa o nlele yovo muna konso lekwa kiavangilwa muna nkand’a bulu, 54 o nganga okanikina vo basukula e lekwa kisambukidi wazi, osia kio va fulu kia yandi kaka mu lumbu nsambwadi diaka. 55 Vava e lekwa kitoma sukulwa, o nganga ofimpa e lekwa kiokio kisambukidi kimbevo. Avo e tona ke disobele ko, kana nkutu vo ke diyalangene ko, e lekwa kiokio kiafunzuka. Ofwete kio yoka vana tiya, kadi e lekwa kiokio kidilu kwa wazi muna kati y’oku mbazi.

56 “Kansi, vava e lekwa kitoma sukulwa, avo nganga ofimpidi e tona yo mona vo diyantikidi vunzuka, okatula e ndambu a mvuatu ina ye tona yovo nkand’a bulu yovo nsinga miatungilwa o nlele. 57 Kansi, avo e tona dimonekene diaka va fulu kiankaka muna mvuatu, muna nsinga miatungilwa o nlele, muna konso lekwa kiavangilwa mu nkand’a bulu, ozevo mu yalangana dina, konso lekwa kisambukidi e kimbevo ofwete kio yoka vana tiya.+ 58 Kansi, avo e tona divunzukini muna mvuatu yovo muna nsinga miatungilwa o nlele yovo muna konso lekwa kiavangilwa muna nkand’a bulu kina osukwidi, kifwete sukulwa mu nkumbu anzole, kikala kiavelela.

59 “Owau i nsiku a kimbevo kia wazi muna mvuatu a mika yovo a lino, muna nsinga miatungilwa o nlele yovo muna konso lekwa kiavangilwa muna nkand’a bulu, muna kio yikila vo kiavelela yovo kiafunzuka.”