Mavangu ma Zintumwa

13 Muna nkutakani ya Antiokia mwakala angunza ye alongi:+ Banaba, Simeone ona wayikilwanga vo Nige,* Lukio wa musi Kurene, Manaene ona walongwa kumosi yo Erodi wa nyadi a mvivu yo Saulu. 2 Una basadilanga Yave* yo fionkonona,* mwand’avelela uvovele vo: “Numpaulwila Banaba yo Saulu+ basala e salu kina ibabokelele.”+ 3 Vava bafionkonuene* yo samba, babatensekele moko, babasindikidi.

4 Dianu vo, wantu awaya batumwa kwa mwand’avelela, bakulumukini kuna Selùkia, bakotele muna nzaza bele kuna Kupero. 5 Vava balweke kuna Salami, bayantikidi samuna e diambu dia Nzambi muna masambilu ma Ayuda. O Yoane mpe okedi yau se selo kiau.*+

6 Vava bavioka e sanga kiawonso yo lwaka kuna Pafo, bawananene yo Nyuda mosi, wa ngang’a mpandu ye ngunz’a luvunu, nkumbu andi Ba-Yesu. 7 Vamosi kakala yo Sengio Pauluse wa nguvulu, nkwa ngangu. Obokelese Banaba yo Saulu, kadi wakala ye tima diayingi dia wá e diambu dia Nzambi. 8 Kansi Elima wa ngang’a mpandu (kadi eyayi i nsas’a nkumbu andi) oyantikidi kubasia kitantu, ovavidi kakidila nguvulu kalembi kwikila muna Mfumu. 9 I bosi Saulu, ona oyikilwanga mpe vo Paulu, ozele yo mwand’avelela, untungunuini, 10 umvovese vo: “Ongeye wazala ye umpuki yo bi wawonso, e mwan’a Nkadi ampemba,+ mbeni a mambu mawonso ma unsongi, nga kuyambula bendomona nzila zasingama za Yave* ko e? 11 Tala! O koko kwa Yave* kuna omu ngeye, okituka se mpofo, kumona mwini ko mu fikolo.” Vana vau, e mbungezi ye tombe kimfukidi, wele avavi muntu kimana kansimba muna koko yo kumfila. 12 O nguvulu wau kamwene dina dibwidi, okwikidi yo toma sivika malongi ma Yave.*

13 O Paulu ye akwandi, bakotele muna nzaza tuka kuna Pafo, balondokele yo lwaka kuna Penga muna Pamfulia. Kansi Yoane+ ubasisidi, ovutukidi kuna Yerusaleme.+ 14 Vo i yau, bakatukidi muna Penga bezidi kuna Antiokia muna Pisidia. Muna Lumbu kia Vundu, bele muna sambilu,+ bafongele. 15 Vava kimene tangwa o Nsiku+ ye sono ya Angunza, ambuta za sambilu babavovese vo: “Ampangi, avo diambu nuna diau muna kasakesa o nkangu, nuvova dio.” 16 Paulu otelamene, ubababididi o koko badingalala, ovovele vo:

“E Aneyisaele yo yeno nuvuminanga Nzambi, nuwá. 17 O Nzambi a nkangu wau wa Isaele wasola mase meto, watundidika nkangu ekolo bakala se nzenza muna nsi a Engipito yo kubavaikisa muna koko kwandi kwa nkuma.+ 18 Wazizidila mavangu mau muna makanga, tezo kia mvu 40.+ 19 Vava kafwasa zula nsambwadi muna nsi ya Kenani, wavana e nsi au kwa Aneyisaele se vua diau.+ 20 Mawonso mama mu tezo kia mvu 450 mavangamena.

“Vava kiavioka mambu mama, wabavana afundisi yamuna tandu kia Samuele wa ngunza.+ 21 Kansi muna kolo kiakina balomba o ntinu,+ Nzambi wabavana Saulu wa mwan’a Kisi, musi kanda dia Benyamini,+ wabayala mu mvu 40. 22 Vava kankatula, wabavana Davidi se ntinu,+ ona kasila umbangi, oku vo: ‘Nsolwele Davidi wa mwan’a Yisai,+ ona oyangidikidi ntim’ame;+ ona ovanga mawonso nzolele.’ 23 Muna mbongo a muntu ndioyu, o Nzambi i katwasila Yesu wa mvuluzi kwa Isaele, mun’owu wa nsilu andi.+ 24 Vitila muntu ndioyu keza, Yoane wasamuna kwa nkangu wawonso wa Isaele vo bavubwa muna songa luviluku lwa ntima.+ 25 Kansi ekolo Yoane kafokolanga e salu kiandi, wavova vo: ‘Muna ngindu zeno, mono i nani? Ke mono ko ona nuyindulanga. Kansi, vena ye ndiona okwiza ndandi, kifwene nkutu kutulula nsinga mia nsampatu zandi ko.’+

26 “Ampangi, yeno mbongo a luvila lwa Abarayama ye akaka ana bevuminanga Nzambi vovo nuina, e diambu diadi dia luvuluzu, kwa yeto difidilu.+ 27 Kadi esi Yerusaleme ye akuluntu au ke bazaya muntu ndiona ko, kansi vava bamfundisa, balunganesa mambu mavovua kwa Angunza,+ mana metangwanga muna nding’angolo e lumbu yawonso ya vundu. 28 Kana una vo ke basolola kuma kia kumvondela ko,+ balomba kwa Pilato vo kavondwa.+ 29 Vava balunganesa mawonso masonama mu kuma kiandi, bankulumuini vana nti, bansidi muna ziami.+ 30 Kansi, Nzambi wamfutumuna muna mafwa,+ 31 wamoneka lumbu yayingi kw’awana bayenda yandi tuka kuna Ngalili yakuna Yerusaleme. Awaya bekunsilanga umbangi kuna kwa nkangu.+

32 “Muna kuma kiaki, tukunusamunuinanga nsangu zambote za nsilu kasia kwa mase meto. 33 O Nzambi olungisi wo kwa yeto wan’au wau kafula Yesu;+ wauna wasonama muna nkunga wanzole vo: ‘Ngeye u mwan’ame; o unu nkitukidi se diaku.’+ 34 Nzambi wamfutumuna muna mafwa, ke vutuka diaka ko muna nitu ilenda fwa yo wola. Kadi Nzambi edi kavova: ‘Ikunusonga o walakazi una yasila nsilu kwa Davidi, o nsilu wau wa ziku.’+ 35 Muna kuma kiaki, diavovua muna nkunga ankaka vo: ‘Kuyambula ko vo nitu ya munkwikizi aku yawola.’+ 36 Davidi wasadila Nzambi* muna mbandu andi, i bosi waleka tulu muna lufwa, wazikwa kumosi yo mase mandi yo wola.+ 37 Kansi, ndiona kafutumuna o Nzambi, kawola ko.+

38 “Dianu vo, ampangi, nuzaya wo vo muna muntu ndioyo inusamunuinuanga luloloko lwa masumu,+ 39 muna mawonso ke nuadi lungisilwa ko muna Nsiku a Mose,+ muna yandi, konso ona okwikila, olungiswa.+ 40 Dianu vo, nuyikenga kimana mana mavovua kwa Angunza malembi kunubwila: 41 ‘Se nutadi, yeno akwa luvezo, nusivika yo vila, kadi e salu isalanga omu lumbu yeno, ke nulendi kio kwikila ko, kana nkutu muntu otomene kio kunusasila.’”+

42 Paulu yo Banaba una se bevaika, o nkangu uyantikidi kubadodokela vo basamuna mambu mama muna Lumbu kia Vundu kina kilanda. 43 Vava ndonga yamwangana muna sambilu, Ayuda ayingi ye minkwikila mia kiyuda ana basambilanga Nzambi balende Paulu yo Banaba, ekolo bamokenanga yau, babawondelele kimana batatidila e nsambu za Nzambi.+

44 Muna Lumbu kia Vundu kialanda, ndonga muna mbanza yawonso bakutakana mu wá diambu dia Yave.* 45 Vava Ayuda bamwene e ndonga, bazele ye kimpala, bayantikidi tianguna yo fidisa e mpaka mana Paulu kavovanga.+ 46 Ozevo, Paulu yo Banaba kuna unkabu wawonso babavovese vo: “Diamfunu vo e diambu dia Nzambi diateka samunua kwa yeno.+ Wau vo nubembwele dio yo kuyibadikila vo ke nuafwana ko muna vua moyo a mvu ya mvu, tala, twele kweto kwa esi zula.+ 47 Kadi o Yave* watukanikina muna mvovo emi: ‘Itumbikidi se ntemo kwa zula, kimana wasamuna luvuluzu yakuna nsuk’a nza.’”+

48 Vava esi zula bawidi diambu diadi, bayangalele yo sanisina diambu dia Yave,* awonso ana bakala kikilu ye luzolo lwa vua moyo a mvu ya mvu, bakwikidi. 49 Vana ntandu, e diambu dia Yave* diamwangana muna nsi yawonso. 50 Kansi Ayuda baleba akento a zitu ana bavuminanga Nzambi ye akuluntu a mbanza, oyau bayantika bangika+ Paulu yo Banaba yo kubayinga muna zunga kiau. 51 Babakubulwidi mbundukutu a tambi yau, bele kwau kuna Ikonio.+ 52 Alongoki bakwamanana zadiswa yo mwand’avelela ye kiese.+