Wanzole wa Paulu Kuna kwa Esi Korinto
2 Ngina ye kani dia kwiza kunukingula diaka, kansi ke mu ntantu ko. 2 Kadi avo inumwesese ntantu, nani okumbwesa e kiese, avo ke ndiona yamwesa ntantu ko e? 3 Dina mpangidi i diau nsonekene kimana vava ikwiza, yalembi mweswa e ntantu kw’awana bafwete kumbwesa e kiese, kadi ngina ye vuvu vo dina dikuntwasila e kiese, ditwasa mpe kiese kwa yeno awonso. 4 Kadi muna mpasi zayingi yo lukendalalu lwa ntima ye kinsanga kiayingi yanusonekena, ke mu kunumwesa ntantu ko,+ kansi mu kunusadisa nuazaya wo vo zola kwayingi ngina kwau mu yeno.
5 Avo muntu wavanga diambu diatwasa lukendalalu,+ ke mono ko kakendeleka, kansi yeno awonso—kizolele viokesa tezo ko muna diambu diadi. 6 E tumbu kaveno kwa ndonga, kifwene kwa muntu ndioyo; 7 owau nufwete loloka yo fiaulwisa muntu ndioyo ye nsi a ntima,+ kimana kalembi sundwa* kwa ulolo wa ntantu.+ 8 Dianu vo, inukasakese nuansonga diaka o zola.+ 9 Kiaki i kuma mpe yanusonekena: yazaya kana vo nusonga nlemvo eno muna mambu mawonso. 10 Avo nulolokele muntu muna konso diambu, omono mpe inlolokele. Konso diambu ndolokele (avo ndolokele konso diambu) i muna wete dieno vana ndose a Kristu, 11 kimana twalembi sundwa kwa Satana,+ kadi tuzeye ntambu miandi.*+
12 Vava yalwaka kuna Teroa+ mu samuna e nsangu zambote mu kuma kia Kristu, yaziulwilwa mwelo muna salu kia Mfumu,* 13 o ntim’ame ke wavuvama ko wau yalembi solola Tito+ wa mpangi ame. Dianu vo, yabakanina yo kwenda kuna Makedonia.+
14 Matondo kwa Nzambi, ona okutudiatisanga ntangwa zawonso muna nkembo a nsundidi kumosi yo Kristu, omu yeto kesayanesenanga* e nsunga za zayi wandi muna fulu yawonso! 15 Kadi kuna kwa Nzambi, oyeto tu nsunga zambote za Kristu vana vena awana bena muna nzil’a luvuluzu ye awana bena muna nzil’a lufwasu; 16 kuna kwa awaya a nsuka, nsudi a lufwa itwasanga lufwa,+ kuna kw’awana bena muna nzila luvuluzu nsunga za moyo zitwasanga moyo. Nani ofwanukini muna mambu mama? 17 Kadi oyeto ke tutekanga* diambu dia Nzambi ko+ nze wantu ayingi, kansi wau vo kwa Nzambi twatumwa, i tuvovelanga ye ziku kiawonso vana ndose a Nzambi kumosi yo Kristu.