Nsiku
20 “Avo wele nuana vita ye mbeni zaku, wamona vo e mvalu miau yo makalu mau ma vita yo makesa mau masundidi o maku muna lutangu, kubamoni wonga ko, kadi o Yave wa Nzambi aku ona wavaikisa muna nsi ya Engipito una yaku.+ 2 Avo se nukwenda nuana e vita, o nganga kafwete finama yo vova kwa nkangu.+ 3 Kafwete kubavovesa vo: ‘E Isaele wá, se nunuana e vita ye mbeni zeno. Ke nutelami ntima ko. Ke numoni wonga ko yovo vumiswa ngatu zakama mu kuma kiau, 4 kadi o Yave wa Nzambi eno okwenda yeno kanuana ye mbeni zeno mu kuma kieno yo kunuvuluza.’+
5 “Akengi mpe bafwete yuvula nkangu vo: ‘Nani otungidi e nzo ye kasidi mo leka ko? Yambula kavutuka kuna nzo andi. Avo ke wau ko, olenda fwa muna vita, o muntu ankaka oleka mo. 6 Nani okunini mpatu a vinyu ye kasidi mo vela bundu yandi ko? Yambula kenda, kavutuka kuna nzo andi. Avo ke wau ko, olenda fwa muna vita, o muntu ankaka ovela mo e bundu. 7 Nani ozitikidi nkento ye kasompane yandi ntete ko? Yambula kavutuka kuna nzo andi.+ Avo ke wau ko, olenda fwa muna vita, o muntu ankaka osompana yandi.’ 8 Akengi bafwete yuvula mpe nkangu vo: ‘Nani una yo wonga yo lukendalalu?+ Kavutuka kuna nzo andi, kimana kalembi yoyesa e ntima mia mpangi zandi nze i ntim’andi.’*+ 9 Vava akengi befokola mokena yo nkangu, bafwete tumbika mfumu za vu kia makesa zafila o nkangu.
10 “Avo ofinamene mbanza mu nuanisa yo, ofwete zayisa kwa nkangu a mbanza yoyo dina bafwete vanga kimana vakala luvuvamu.+ 11 Avo batambulwidi vanga yaku o luvuvamu yo kuziulwila mavitu ma mbanz’au, o wantu awonso owana mo bekituka se wantu aku, oyau bekusadila salu yangolo.+ 12 Kansi, avo ke bazolele vanga yaku luvuvamu ko, beza nuana yaku e vita, ongeye ofwete zunga e mbanz’au, 13 Yave wa Nzambi aku oyekola yo kikilu vana moko maku, ofwete vonda muna nsosolo wan’amakala awonso bena muna mbanza. 14 Kansi, akento, yingiana-ngiana, twelezi ye lekwa yawonso ina muna mbanza, e sanzu diandi diawonso,+ olenda dio nata mu kuma kiaku, ongeye odia e sanzu dia mbeni zaku, dina o Yave wa Nzambi aku kavene.+
15 “Ediadi i diambu ovanga muna mbanza zawonso zina kwandá yo ngeye, ezi zina vo ke mbanza za zula ina yaku lukufi ko. 16 Kansi, kuyambula ko vo konso lekwa kifulumunanga kiasala o moyo muna mbanza za nkangu wowo, zina Yave wa Nzambi aku kekuvana se vua.+ 17 Ofwete kubafwasa emvimba, i sia vo, Anekete, Aneyamore, Anekenani, Anekivi, Aneperese ye Aneyebuse,+ wauna o Yave wa Nzambi aku kakanikina; 18 kimana balembi kunulonga nualanda mavangu mau mawonso mangemi mana bevanganga kwa nzambi zau yo kunufila nuasumukina Yave wa Nzambi eno.+
19 “Avo ozungidi mbanza yo nuanisa yo mu lumbu yayingi, i bosi wakutumuna yo, kufwete fwasa nti miandi ko muna zenga mio mu soka.* Olenda kwaku dia e bundu yandi, kansi e nti kufwete mio zenga ko.+ Kufwete nuanisa nti ko nze una onuanisinanga o muntu. 20 Ofwete fwasa kaka o nti una ozeye vo ke wa dia ko. Olenda wo zenga mu tunga e yaka yazungila e mbanza ina ikunuanisa, yavana ibwa.