Yosua
8 Yave ovovese Yosua vo: “Kumoni wonga ko ngatu vumiswa.+ Nata makesa mawonso, wanuanisa Ai. Tala, ngiekwele o ntinu a Ai yo nkangu andi ye mbanza andi ye nsi andi+ vana moko maku. 2 Vanga mbanz’a Ai yo ntinu andi wauna wavangidi mbanz’a Yeriko yo ntinu andi,+ kansi, e sanzu ye twelezi yandi, nubaka yo se yeno. Tuma makesa benda swamina kuna nim’a mbanza.”
3 Yosua yo makesa mawonso bele nuanisa Ai. O Yosua osolele 30.000 ma makesa, ubatumini muna fuku. 4 Ubakanikini vo: “Tala, nuswamina kuna nim’a mbanza. Ke nuvavuka e mbanza ko, yeno awonso nukala nuakubama. 5 Omono yo nkangu wawonso ngina wau, tufinama e mbanza, vava bevaika mu kutunuanisa nze una bateka vanga,+ tukubatina. 6 Vava bevaika yo kutulanda, tukubatunta bavavuka e mbanza, kadi bevova vo: ‘Batutinini nze una bateka kututinina.’+ I mpila yayi tutinina vana bena. 7 Ozevo, nuvaika muna fulu nuswamini yo baka e mbanza; Yave wa Nzambi eno oyekola yo vana moko meno. 8 Vava nubaka e mbanza, nuyoka yo.+ Nuvanga wo mun’owu wa diambu dia Yave. Owau i nkanikinu inuvene.”
9 I bosi, Yosua ubatumini, bele vana fulu beswamina; bakiatamene vana kati kwa Betele ye Ai, kuna weste a Ai, ekolo Yosua kakedi vana vena nkangu o fuku wauna.
10 Vava Yosua kasikamene muna mene-mene, okutakese makesa, oyandi ye mbuta za Isaele bele kumosi kuna Ai. 11 Makesa mawonso+ makala yandi, batombokele, balueke kuna ntwal’a mbanza. Bakubikidi e ndo kuna node a Ai, ndimba wakala va kati kwau ye Ai. 12 Muna ntangwa yayina, Yosua onete 5.000 ma wantu, ubaswekele+ vana kati kwa Betele+ ye Ai kuna weste a mbanza. 13 O nkangu bakubikidi e ndo kuna node a mbanza,+ akaka kuna weste a mbanza.+ Muna fuku wauna o Yosua wele vana kati kwa ndimba.
14 O ntinu a Ai vava kamwene wo, oyandi yo nkangu a mbanza bavaikidi mu nzaki muna mene-mene kimana banuanisa Isaele vana fulu kiakala mantalani yo makanga vana ndimba. Kansi kazaya wo ko vo makesa masweme kuna nim’a mbanza. 15 Vava esi Ai babanuanisi, o Yosua ye Isaele yawonso, batinini muna nzil’a makanga.+ 16 Esi Ai babokelese nkangu awonso muna mbanza babalakama; ekolo balandanga Yosua, batuntilu mu sisa e mbanza kwandá. 17 Ke mwasala yakala ko muna Ai ye Betele ona walembi vaika mu landa Isaele. Basisidi e mbanza kondwa lutaninu yo lakama Isaele.
18 Yave ovovese Yosua vo: “E dionga dina vana koko kwaku lambula dio kuna Ai,+ kadi ngiekwele yo vana koko kwaku.”+ Yosua olambwidi e dionga dina vana koko kwandi kuna mbanza. 19 Una kalambwidi kaka koko, makesa mana maswama matelamene mu nswalu muna fulu yau, balundumukini muna mbanza yo baka yo. Vana vau, bayokele e mbanza.+
20 Esi Ai vava batadidi kuna nima, bamwene mwisi a mbanza ufutumukini kuna zulu, ke basidi diaka ye nkuma watinina konso fulu ko. O nkangu una watinina kuna makanga uvilukìdi alakami. 21 O Yosua ye Isaele yawonso vava bamona vo makesa maswama babakidi e mbanza yo mona mwisi a mbanza ufutumukini, bavutukidi yo vonda esi Ai. 22 Akaka muna mbanza bavaikidi benda wanana yau, i dianu vo esi Ai bakedi vana kati, akaka muna Aneyisaele oku sambu edi, akaka kuna sambu dina. Babavondele yavana ke mwasala kana mosi ko ngatu mosi katina.+ 23 Babakidi ntinu a Ai+ kimoyo, banete kwa Yosua.
24 Vava Isaele kamana vonda esi Ai awonso muna nzanza, muna makanga muna babalakamena, awonso bafwididi muna nsosolo, Aneyisaele awonso bavutukidi kuna Ai, bavondèle yo muna nsosolo. 25 Awonso bafwa mu lumbu kiakina, 12.000, akala ye akento, esi Ai awonso. 26 Yosua kakulwidi koko ko, olambwidi kaka e dionga+ yavana kafwasa esi Ai awonso.+ 27 Aneyisaele babongele twelezi ye sanzu dia mbanza yayina mu kuma kiau, landila nkanikinu mina Yave kavana kwa Yosua.+
28 Yosua oyokele Ai, okitwidi yo se zumbu diampwena,+ diakinu yamu unu kiaki. 29 Ozembekele ntinu a Ai muna nti yakuna masika, muna ndimuk’a ntangwa, o Yosua okanikini vo bakulumuna e vimbu muna nti.+ I bosi, batubidi dio vana vitu dia mbanza yo tumbidika dio ulolo wa matadi, makinu vana yamu unu kiaki.
30 Muna ntangwa yayina, Yosua otungidi Yave wa Nzambi a Isaele e ziku vana Mongo a Ebale,+ 31 nze una Mose wa ntaudi a Yave kakanikina Aneyisaele, una wasonama muna nkand’a Nsiku+ a Mose: “E ziku dia matadi mamvimba, mana ke maviakana salanganu ya sengwa ko.”+ I vana bayokele tukau kwa Yave ye yimenga ya ungudi.+
32 Osonekene Nsiku+ vana ntandu a matadi, o nsiku una Mose kasonekena vana ndose a Aneyisaele.+ 33 Isaele yawonso, tuka akuluntu au ye afidi au, ye afundisi batelamene kuna sambu dimosi dia Nkela yakuna sambu diankaka, vana ntadisi a angang’a Anelevi ana banatanga nkel’a kangu dia Yave. Anzenza ye mingutukila bakala vana.+ Ndambu muna yau bakala mantalani yo Mongo a Ngerezime ye ndambu yakaka mantalani yo Mongo a Ebale+ (una kateka kanikina o Mose wa selo kia Yave),+ kimana nkangu a Isaele wasambulwa. 34 I bosi otangidi mambu mawonso ma Nsiku,+ nsambu+ ye sibu,+ landila mawonso masonama muna nkand’a Nsiku. 35 Ke vakondwa diambu ko muna mawonso kakanikina o Mose dina kalembi tanga o Yosua vana vena nkutakani yawonso ya Isaele,+ ye akento ye yingiana-ngiana ye nzenza+ ana bazinganga* yau.+