Afundisi
1 Vava Yosua kafwa,+ Aneyisaele* bayuvuidi Yave vo:+ “Nani muna yeto ovita tomboka mu nuanisa Anekenani?” 2 Yave ovutwidi vo: “Yuda otomboka.+ Kadi, ngiekwele nsi vana moko mandi.” 3 I bosi, Yuda ovovese Simeone wa mpangi andi vo: “Tomboka yame kuna zunga*+ yavewa twanuanisa Anekenani. Omono mpe ikwenda yaku muna zunga kina wavewa.” O Simeone wele yandi.
4 Vava Yuda katombokele, Yave oyekwele Anekenani ye Aneperese vana moko mau,+ bavondele 10.000 ma wantu muna Bezeke. 5 Basolwele Adoni-bezeke muna Bezeke, banuene yandi kwakuna yo tufakesa Anekenani+ ye Aneperese.+ 6 Adoni-bezeke vava katinini, banlakamene yo kumbaka, babutwini nlembo miandi miasina mia moko ye mia malu. 7 Adoni-bezeke ovovele vo: “Vena ye 70 lwa atinu babutunua nlembo miasina mia moko ye mia malu ana benonanga madia kunansi a meza mame. Wauna yavanga, i una kamputwidi o Nzambi.” Bantuese kuna Yerusaleme,+ i kuna kafwila.
8 O wan’a Yuda banuanisi Yerusaleme+ yo baka yo; bafwasidi yo muna nsosolo, bayokele e mbanza. 9 I bosi, wan’a Yuda bakulumukini, bele nuanisa Anekenani, ana bakala muna zunga kia miongo, muna Nengebe yo Sefela.+ 10 Yuda wele nuanisa Anekenani ana bakala kuna Keberone (entete Keberone yayikilwanga vo Kireyate-araba), bavondele Sesai yo Akimani yo Talemai.+
11 Tuka kwakuna bele nuanisa esi Debi.+ (Entete Debi yayikilwanga vo Kireyate-sefe.)+ 12 Kalebe+ ovovele vo: “Ndiona ofwasa Kireyate-sefe yo baka yo, ikumvana Akesa wa mwan’ame kakala se nkaz’andi.”+ 13 Oteniele+ wa mwan’a Kenaze+ wa nleke a Kalebe, obakidi yo. Kalebe umvene Akesa wa mwan’andi kakala se nkaz’andi. 14 Vava Akesa kayendanga kuna nzo a nkaz’andi, olebele Oteniele kalomba kiana kwa se diandi. Okulumukini vana buluku.* Kalebe unyuvuidi vo: “Nki ozolele?” 15 Ovutwidi vo: “Dodokolo, unsambula, kadi kunku kia ntoto umpene kuna sude;* umpana mpe Ngulote-maime.”* O Kalebe umvene Ngulote ya Ntandu ye Ngulote ya Yanda.
16 O wan’a Nkene+ wa kô wa yakala a Mose,+ batombokele tuka kuna mbanz’a maba+ yo nkangu a Yuda, bele muna makanga ma Yuda mena kuna sude a Aradi.+ Bele kwakuna yo zinga kumosi yo nkangu.+ 17 O Yuda wele yo Simeone wa mpangi andi, banuanisi Anekenani ana bakala muna Sefate yo bukumuna yo.+ Bayikidi e mbanza vo Korema.*+ 18 I bosi, Yuda obakidi e Ngaza+ yo mvivu andi, Asekelone+ yo mvivu andi ye Ekerone+ yo mvivu andi. 19 Yave okedi yo Yuda, babakidi zunga ya miongo, kansi ke balendele yinga ko ana bazingilanga muna ndimba, kadi makalu ma vita mena ye sakilwa ya sengwa* bakala mau.+ 20 Bavene Keberone kwa Kalebe, wauna Mose kasila o nsilu.+ Kalebe oyingidi wana tatu a Anaki ana bakala mo.+
21 Kansi, Anebenyamini ke bayinga Aneyebuse muna Yerusaleme ko, kiaki i kuma Aneyebuse bekadilanga ye Anebenyamini muna Yerusaleme yamu unu kiaki.+
22 Muna kolo kiakina, esi nzo a Yosefe+ batombokele, bele nuanisa Betele, o Yave okedi yau.+ 23 Esi nzo a Yosefe batumini wantu benda langa Betele (entete, e mbanza yayi yayikilwanga vo Luzi),+ 24 alangi bamwene muntu ovaikanga muna mbanza. Bamvovese vo: “Utusonga una tulenda kotela muna mbanza, ozevo tukusonga e ngemba.” 25 Ubasongele nzil’a mbanza, bafwasidi e mbanza muna nsosolo, vo i muntu ndiona banyambwidi kenda ye nzo andi yawonso.+ 26 O muntu ndiona wele kuna nsi ya Anekete, otungidi e mbanza yo yikila yo vo Luzi, i nkumbu iyikilwanga yamu unu kiaki.
27 Manase kabaka Bete-sani ko ye mavata mandi,* yovo Tanaki+ ye mavata mandi, yovo esi Dore ye mavata mandi, yovo esi Yibelame ye mavata mandi, yovo esi Mengido ye mavata mandi.+ Anekenani batatamene zingila muna nsi yayina. 28 Vava wan’a Isaele bakumama, babundwini Anekenani muna salu,+ ke bamana kubayinga ko.+
29 Eferaime kayinga Anekenani ko ana bakala kuna Ngeze. Anekenani bakwamanana zinga yo Eferaime muna Ngeze.+
30 Zebulune kayinga esi Kiterone ko ye esi Nalole.+ Anekenani bakwamanana zinga yau yo bundunua muna salu.+
31 Asere kayinga esi Ako ko ye esi Sidone,+ esi Akelabe, esi Akezibe,+ esi Keleba, esi Afiki+ ye esi Rekobe.+ 32 Aneyasere bakwamanana zinga ye Anekenani ana bakala muna nsi, kadi ke babayinga ko.
33 Nafetali kayinga esi Bete-semese ko ye esi Betanati,+ bakwamanana zinga ye Anekenani ana bakala muna nsi.+ Esi Bete-semese ye esi Beta-nati babundunua kwa yau muna salu.
34 Aneyamore bayinga Anedani yakuna zunga kia miongo, kadi ke babayambula ko bakulumuka kuna ndimba.+ 35 Aneyamore batatamene zingila muna Mongo a Kerese, ye muna Ayalone,+ ye muna Salebimi.+ Kansi vava e nzo a Yosefe yakumama,* bababundwini muna salu. 36 E mvivu wa Aneyamore wayatikila kuna ntomboka ya Akerabimi,+ tuka kuna Sela yakuna ntandu.