Afundisi
10 Vava Abimeleke kafwa, o Tola wa mwan’a Pua wa mwan’a Dodo wa kanda dia Yisakare, ovaikidi muna vuluza Isaele.+ Kuna Sami kazingilanga, muna zunga kia miongo mia Eferaime. 2 Mvu 23 kafundisa Isaele. I bosi, ofwidi yo zikwa muna Sami.
3 Vava Tola kafwa, vatelamene Yaire wa Mungiladi, mvu 22 kafundisa Isaele. 4 Wana 30 amakala kakala yau ana bakangalelanga muna mabuluku 30; mavata 30 bakala mau muna nsi a Ngiladi, yamu unu meyikilwanga vo Kavote-yaire.+ 5 I bosi, Yaire ofwidi yo zikwa muna Kamone.
6 Aneyisaele bavangidi diaka mambu mambi vana meso ma Yave,+ bayantikidi sadila teke ya Bale,+ teke ya Asetorete, nzambi za Arami,* nzambi za Sidone, nzambi za Moabe,+ nzambi za Aneyamone+ ye nzambi za Afelesetia.+ Bayambwidi Yave yo lembi kunsadila. 7 Makasi ma Yave mafusukidi Isaele, ubayekwele* vana moko ma Afelesetia ye vana moko ma Aneyamone.+ 8 O mvu wauna banuanisa yo bangika Aneyisaele—mvu 18 babangika Aneyisaele awonso ana bakala kuna simu dia Yodani muna nsi a Aneyamore ina kuna Ngiladi. 9 Aneyamone mpe basaukidi Yodani mu nuanisa Yuda, Benyamini ye nzo a Eferaime; mpasi zayingi bamwesa Isaele. 10 I bosi Aneyisaele babokele kwa Yave,+ oku vo: “Tusumukini, kadi tuyambwidi Nzambi eto yo sadila teke ya Bale.”+
11 Yave ovovese Aneyisaele vo: “Nga kianuvuluza ko vana moko ma esi Engipito,+ ma Aneyamore,+ ma Aneyamone, ma Afelesetia,+ 12 ma Anesidone, ma Amaleke ye Midiani ana banubangika? Vava nuankazila, omono yanuvuluza vana moko mau. 13 Kansi, oyeno nuangiambwidi yo sadila nzambi zankaka.+ I dianu vo kikunuvuluza diaka ko.+ 14 Nuenda lomba lusadisu kwa nzambi zina nusolele.+ Yambula banuvuluza muna ntangw’a mpasi zeno.”+ 15 Aneyisaele bavutwidi kwa Yave vo: “Tusumukini. Utuvanga konso dina omwene vo diambote vana meso maku. Tudodokele, utuvuluza kaka o unu.” 16 Bakatwidi nzambi za nzenza vana bena yo sadila Yave,+ i dianu vo kalendele diaka zizidila* mpasi za Isaele ko.+
17 I bosi, Aneyamone+ bakutakene, basikidisi ndo au kuna Ngiladi. Aneyisaele mpe bakutakene yo sikidisa ndo au kuna Misepa. 18 O nkangu ye mfumu za Ngiladi bavovele kwa muntu yo nkwandi vo: “Nani ovita o ntu mu nuanisa Aneyamone?+ Yambula kakala ntu a nkangu awonso a Ngiladi.”