Mavangu ma Zintumwa
12 Muna kolo kiakina, Erodi wa ntinu wayantika bangika akaka muna nkutakani.+ 2 Ovondèle Yakobo wa mpangi a Yoane+ muna nsosolo.+ 3 Vava kamwene vo diyangidikidi Ayuda, okangidi diaka Petelo. (Ediadi diavangama muna lumbu ya Mbolo Zakondwa Mfuna.)+ 4 Vava kankangidi, unsidi muna pelezo,+ unyekwele kwa buka yá ya makesa banlangidila, konso buka kiakala ye makesa mayá, okanini kunsunzula* vana ndose a nkangu vava kivioka e Nduta. 5 Petelo wakangama kakala muna pelezo, kansi nkutakani yakwamanana samba kwa Nzambi mu kuma kiandi.+
6 Vava Erodi kazola kunsunzula, o fuku wauna Petelo olele vana kati kwa makesa mole, wakangwa mu tuvambu tole, vana mwelo vakala mpe ye ayingidi bayingilanga pelezo. 7 Kansi, mbasi a Yave* otelamene vana kakala,+ o ntemo utemene muna suku dia pelezo. Oviakane Petelo vana luvati, unsikamese, oku vo: “Telama nswalu!” O tuvambu muna moko mandi tusotokele.+ 8 O mbasi umvovese vo: “Vuata e mvuatu miaku yo kanga nsampatu zaku.” Ovangidi wo. I bosi, umvovese vo: “Vuata yunga kiaku, undanda.” 9 Petelo ovaikidi, unlende, kansi kazeye wo ko vo dina divangamene muna mbasi dialudi. Edi kabenze vo mona-meso kamwene. 10 Vava baviokele e buka kiantete kia ayingidi ye kina kiazole, balweke vana vitu dia sengwa diatala kuna mbanza, diziukidi diau kibeni. Bavaikidi, vava bayendanga muna nzila, vana vau mbasi ovididi vana kena. 11 Petelo vava kamwene dina divangamene, ovovele vo: “Owau nzeye wo vo Yave* otumini mbasi andi, umpulwizi vana moko ma Erodi ye muna mawonso Ayuda bavingidingi vo mambwila.”+
12 Vava kabakwidi ediadi, wele kuna nzo a Maria wa ngudi a Yoane, ona wayikilwanga vo Maku,+ kuna kwalungalakana alongoki ayingi, basambanga. 13 Vava kadodela e kielo, o ntaudi ankento, nkumbu andi Roda, wizidi tala kana nani. 14 Una kawidi e nding’a Petelo, ovilakene ziula kielo mu kuma kia kiese, ozawidi muna nzo, wele samuna vo Petelo otelamene vana mwelo. 15 Bamvovese vo: “Olaukidi.” Kansi, osiandamene vova vo i Petelo kikilu. Bavovele vo: “Nanga mbasi andi.” 16 Kansi Petelo okwamanene dodela. Vava baziudi kielo, bamwene, basivikidi kikilu. 17 Ubababididi o koko bakala e pi-i, ubazayisi una Yave* kamvaikisidi muna pelezo, ubavovese vo: “Nusamuna mambu mama kwa Yakobo+ ye kw’ampangi.” I bosi, ovaikidi, wele ku fulu kiankaka.
18 Vava kuma kwakia, vabwidi mavuanga mangolo vana vena makesa, bayantikidi yuvuziana kana nkia diambu diabwila Petelo. 19 Erodi umvavidi ye sungididi kiawonso, wau kalembi kunsolola, ofundisi ayingidi, okanikini vo batumbwa;+ okatukidi kuna Yuda, okulumukini kuna Kaisaria, kûna kakala mu fikolo.
20 Erodi wa ntinu wafungila nkangu a Turo ye Sidone o makasi. Dianu vo, yau awonso bezidi kwa yandi, vava balebele Belaseto ona walunga-lunganga nzo a ntinu,* balombele luvuvamu, kadi o madia badianga muna nsi au kuna nsi a ntinu matukanga. 21 Muna lumbu kiasikidiswa, Erodi ovuete mvuatu a kintinu, ovuende vana kunda kia lufundisu, oyantikidi vova kwa nkangu. 22 I bosi, e ndonga yakutakana iyantikidi kaza, oku vo: “Nding’a nzambi, ke ya muntu ko!” 23 Vana vau, mbasi a Yave* unwende, e kuma kadi kavene nkembo kwa Nzambi ko, odilu kwa mimvidi, ofwidi.
24 E diambu dia Yave* dinungunukini yo wokela.+
25 Vava Banaba+ yo Saulu bamana vana lusadisu kuna Yerusaleme,+ bavutukidi yo nata Yoane,+ ona wayikilwanga mpe vo Maku.