Wantete wa Paulu Kuna kwa Esi Tesalonika

5 Vo i diambu dia kolo ye nsungi, ampangi, ke dina mfunu ko muna kunusonekena. 2 Kadi yeno kibeni nutomene wo zaya vo e lumbu kia Yave*+ kikwiza nze mwivi muna fuku.+ 3 Vava beyantika vova vo, “Luvuvamu ye ngemba!” vana vau, o lubukumuku lukubalwakila kuna kinsalukisa,+ nze nsongo mia nkento owutanga, ke bekala ye una betinina ko. 4 Vo i yeno ampangi, ke luna mu tombe ko, kimana o mwini wanuluakila nze una uluakilanga mwivi, 5 kadi yeno awonso nu wan’a ntemo ye wan’a mwini.+ Oyeto ke tuvuilu kwa fuku ko ngatu kwa tombe.+

6 Dianu vo, ka tuleki ko nze ankaka,+ kansi tuyingila+ yo lungalala.+ 7 Kadi awana belekanga, mu fuku belekanga, awana bekolwanga mu fuku bekolwanga.+ 8 Vo i yeto tuvuilu kwa mwini, yambula twalungalala yo vuata nkikw’a ntulu a lukwikilu yo zola ye mpu a vita ina vo i vuvu kia luvuluku,+ 9 e kuma kadi, Nzambi watusola, ke mu makasi ko, kansi twavuluzwa+ muna Mfumu eto Yesu Kristu. 10 Yandi watufwila,+ kimana kana tusikama yovo leka,* tuzinga yandi kumosi.+ 11 Dianu vo, nukasakesanga* yo kumika muntu yo nkwandi,+ wauna nuvanganga.

12 Tunudodokele ampangi, nuazitisanga awana befuntukanga yo vita o ntu vovo nuina muna salu kia Mfumu yo kunulonga; 13 lutoma kubazitisanga kuna zola muna diambu dia salu kiau.+ Nukadilanga muna luvuvamu muntu yo nkwandi.+ 14 Vana ntandu, tunukasakese ampangi, lulukisa * akwa mvuanga,+ lufiaulwisa awana bakendalala, lusadisa ana batovokele, lusonga luzindalalu kwa wantu awonso.+ 15 Nukeba, valembi kala muntu ovutula mbi muna mbi,+ kansi nuvavanga edi diambote kwa muntu yo nkwandi ye kw’awonso.+

16 Nuyangalalanga ntangwa zawonso.+ 17 Nusambanga ntangwa zawonso.+ 18 Nuvutulanga matondo muna mambu mawonso.+ Lwalu i luzolo lwa Nzambi kwa yeno muna Kristu Yesu. 19 Ke nuzimi tiya twa mwanda ko.+ 20 Ke nuvezi ungunza ko.+ 21 Nufimpa mambu mawonso;+ nutatidila mambu mambote. 22 Nuyikenga muna bi wa mpila zawonso.+

23 Yambula Nzambi a luvuvamu kanuvaula emvimba. Ampangi, yambula mwanda yo moyo ye nitu zeno zalundwa emvimba yo kondwa lusembo muna ngiz’a Mfumu eto Yesu Kristu.+ 24 Ndiona okunubokelanga nkwa kwikizi, ovanga wo kikilu.

25 Ampangi, nukwamanana samba muna wete dieto.+

26 Nuvana mavimpi kwa mpangi zawonso ye mfibu avelela.

27 Inudodokele muna Mfumu vo nkanda wau watangwa kwa mpangi zawonso.+

28 Yambula e nsambu za Mfumu eto Yesu Kristu zakala yeno.