Lusengomono kwa Yoane
14 I bosi, mbwene Mwan’a meme+ otelamene vana Mongo a Zione,+ ana bena yandi 144.000,+ e nkumbu andi ye nkumbu a Se diandi+ yasonama vana mbunzu zau. 2 Ngwidi e zú ditukidi kuna zulu nze zú dia maza mayingi, nze zú diangolo dia mwandazi;* e zú dina ngwidi nze zú dia ndinga za ayimbidi besikanga kokolo yau ekolo beyimbilanga. 3 Beyimbilanga nkunga owu wina nze nkunga wampa+ vana ntadisi a kunda ye vana ntadisi a vangwa yá yamoyo+ ye akuluntu,+ ye ke vena muntu ko olenda longoka nkunga wau nanga vo 144.000 kaka,+ ana basumbwa ova nza. 4 Awaya ke bayisafula ye akento ko; kieleka, mienze kwau.+ I yau belandanga Mwan’a meme konso kuna kekwendanga.+ Basumbwa+ vana vena wantu nze ntomoni*+ kuna kwa Nzambi ye kuna kwa Mwan’a meme, 5 muna nua miau ke musolokele luvunu ko; bakondwa twangu.*+
6 Mbwene mbasi yankaka itilumukanga muna kati kwa zulu, ina ye nsangu zambote mu samununa kw’awana bekalanga ova nza, kwa zula yawonso, makanda, ndinga ye nkangu.+ 7 Ivovele mu nding’a ngolo, oku vo: “Nuvumina Nzambi yo kumvana nkembo, kadi e ntangw’a mfundis’andi ilweke,+ nusambila Ndiona wasema e zulu yo ntoto, ye kalunga ye nto za maza.”+
8 E mbasi ina yanzole ilende, ivovele vo: “Obwidi! Obwidi,+ o Babele Anene,+ ona wanuikanga zula yawonso e vinyu a zinu* dia zumba yandi!”*+
9 E mbasi ina yatatu, ibalende, ivovele mu nding’a ngolo, oku vo: “Konso ona osambila bulu kiansisi+ ye teke kiandi yo tambula dimbu vana nkut’a lose lwandi yovo vana koko kwandi,+ 10 onuikwa mpe e vinyu a makasi ma Nzambi ina ibukwilu muna mbungw’a makasi Mandi,+ yalembi sangwa lekwa, yo bangikwa vana tiya ye lengo vana ndose a mbasi zavelela ye vana ndose a Mwan’a meme.+ 11 O mwisi a tiya twa lubangamu lwau utomboka yamu mvu ya mvu,+ ke bevundanga ko fuku yo mwini, ana besambilanga e bulu kiansisi ye teke kiandi ye konso ona otambwidi e dimbu kia nkumbu andi.+ 12 Ovava i vevavilwanga luzindalalu kuna kwa avauki,+ ana belundanga e nkanikinu mia Nzambi yo simbinina lukwikilu lwa Yesu.”+
13 Ngwidi e ndinga itukidi kuna zulu, ivovele vo, “Soneka: Kiese kwa amafwa ana befwila muna Mfumu,+ tuka owau yakuna kulanda. Elo, i uvovele o mwanda, yambula bavunda muna salu yau, kadi mavangu mau mekubalanda.”
14 I bosi, mbwene tuti diampembe, ndiona ofongele vana tuti una nze mwan’a muntu,+ una ye kolowa kia wolo vana ntu andi ye sâkilwa kiatwá vana koko kwandi.
15 E mbasi yankaka ivaikidi muna nzo avauka a tempelo, ibokele mu nding’a ngolo kwa ndiona ofongele vana tuti, oku vo: “Yantika sadila e sâkilwa kiaku yo kutika e mbongo, kadi e ntangw’a nkutika ifwene, e nkutik’a mbongo a ntoto ifwene.”+ 16 Ndiona ofongele vana tuti okotese sâkilwa kiandi ova ntoto, e mbongo a ntoto ikutikilu.
17 E mbasi yankaka ivaikidi muna nzo avauka a tempelo ina kuna zulu, ina mpe ye sâkilwa kiatwá.
18 E mbasi yankaka ivaikidi vana ziku, ina ye wisa kia tiya. Ibokele mu nding’angolo kwa ndiona una ye sâkilwa kia twa, oku vo: “Sadila e sâkilwa kiaku kiatwá, wasâka e saki ya nsing’a vinyu ya ntoto, e kuma kadi e bundu yandi ibweke.”+ 19 E mbasi isidi e sâkilwa kiandi ova ntoto, isâkidi nsing’a vinyu a ntoto, itubidi wo muna kaminu dia vinyu dia makasi ma Nzambi.+ 20 E kaminu dia vinyu didiatakeso kuna mbazi a mbanza, muna kaminu dia vinyu muvaikidi menga, malueke yakuna bindikilwa ya mvalu, makukwidi mu tini kia 1.600 za stadia.*