Wantete wa Samuele
4 E diambu dia Samuele dimwangane muna Isaele yawonso.
Aneyisaele bavaikidi banuanisa Afelesetia; basikidisi e ndo vana ndambu a Ebeneza. Afelesetia basikidisi e ndo kuna Afeke. 2 Afelesetia bakubamene mu nuanisa Isaele, vava bayantikidi o nuana, Isaele otufakeso kwa Afelesetia, bavondele 4.000 ma makesa vana banuanini. 3 Vava nkangu uvutukidi kuna ndo, akuluntu a Isaele bavovele vo: “Ekuma Yave kayambulwidi vo twatufakeswa kwa Afelesetia o unu?+ Yambula twenda bonga e nkel’a kangu dia Yave kuna Silo,+ yakala yeto kimana yatuvuluza vana moko ma mbeni zeto.” 4 O nkangu batumini wantu kuna Silo, babongele ko e nkel’a kangu dia Yave a vu, ona ofongele vana kunda kiandi vana ntandu a* Akelubi.+ Wana wole a Ele, Kofene yo Finekase,+ bakedi kûna ye nkel’a kangu dia Nzambi aludi.
5 Vava nkel’a kangu dia Yave ilweke muna ndo, Aneyisaele awonso bayantikidi kaza, ntoto uzakamene. 6 Afelesetia vava bawidi mazu, bavovele vo: “E mazu mena kuna ndo ya Ayibere ma nki?” Bawidi wo vo e Nkel’a Yave ilweke muna ndo. 7 Afelesetia bamwene o wonga, bavovele vo: “Nzambi olweke muna ndo.”+ Bavovele vo: “Tuladidi kweto, kadi yamu wau e diambu diadi ke diasidi vangama ko! 8 Tuladidi kweto! Nani okutuvuluza vana moko ma Nzambi ndioyo wanene? Ndioyo i Nzambi ona wawanda Engipito muna vuku ya mpila mu mpila muna makanga.+ 9 E yeno Afelesetia, nukala yo unkabu, nusonga vo nu makesa, nualembi sadila Ayibere nze una banusadila.+ Nusonga vo nu makesa, nunuana!” 10 Afelesetia banuene, Isaele batufakeso,+ konso muntu otinini kuna saba kiandi. Ndonga ifwidi; kuna sambu dia Isaele, 30.000 ma makesa bakangalelanga kiamalu bafwidi. 11 E Nkel’a Nzambi ikutumwinu, o wana Ele yau awole, Kofene yo Finekase, bafwidi.+
12 O Mbenyamini wele ntinu tuka kuna vita olweke kuna Silo muna lumbu kiakina ye mvuatu miandi miatiazuka yo ntoto vana ntu andi.+ 13 Vava kalweke, Ele wavuanda kakala vana kunda, vana ndambu a nzila, watalanga, kadi ntim’andi uyangamene mu kuma kia Nkel’a Nzambi aludi.+ Muntu okotele muna mbanza, osamwini e nsangu, wantu awonso muna mbanza bayantikidi dila. 14 Ele vava kawidi e dilu, oyuvuidi vo: “E dilu kiaki kia nki?” O muntu otwese nsangu wele tikuni, ozayisi e nsangu kwa Ele. 15 (Ele mvu 98 kakala miau; o meso mandi mafwa, kamonanga diaka ko.)+ 16 O muntu ovovele kwa Ele vo: “Mono ntukidi kuna vita! Unu ntinini kuna vita.” Ele unyuvuidi vo: “E mwan’ame, adieyi dibwidi?” 17 O muntu watwasa e nsangu ovutwidi vo: “Isaele batinini vana vena Afelesetia, ndonga ivondelo muna nkangu;+ wan’aku mpe yau wole, Kofene yo Finekase bafwidi,+ e Nkel’a Nzambi aludi ikutumwinu.”+
18 Vava kayikidi e Nkel’a Nzambi aludi, Ele obwidi mambemba vana fulu kiandi kuna ndambu a vitu, e nsingu andi itolokele, ofwidi, kadi se nunu kwandi ye wanene kakala. Mvu 40 kafundisa Isaele. 19 Mwan’andi a longo wa nkaz’a Finekase, wayimita kakala, e ntangw’andi a wuta yafinama. Vava kawidi wo vo e Nkel’a Nzambi aludi ikutumwinu, o kô wandi yo nkaz’andi bafwidi, ofukamene, kadi e nsongo mimbakidi, owutidi. 20 Una se kefwa, akento ana bakala yandi bamvovese vo: “Kumoni wonga ko, kadi mwan’a yakala owutidi.” Kansi kavutwidi diambu ko ngatu sila dio ntima. 21 Ovene mwana e nkumbu vo, Ikabode,*+ yo vova vo: “Banete nkembo a Isaele kuna kinkole,”+ wau vo e Nkel’a Nzambi aludi ikutumwinu, o kô wandi yo nkaz’andi bafwidi.+ 22 Ovovele vo: “O nkembo ukatukidi muna Isaele, kadi e Nkel’a Nzambi aludi ikutumwinu.”+